മലപ്പുറം: താനൂരിലുണ്ടായ രാഷ്ട്രീയ സംഘര്‍ഷത്തില്‍ ലീഗ് കൗണ്‍സിലര്‍ ഉള്‍പ്പെടെ രണ്ട് പേര്‍ക്ക് വെട്ടേറ്റു. ലീഗ് കൗണ്‍സിലര്‍ സലാം, മൊയ്തീന്‍ കോയ എന്നിവര്‍ക്കാണ് വെട്ടേറ്റത്. വെള്ളിയാഴ്ച രാത്രിയാണ് സംഭവം. ഒരു സംഘം ആളുകള്‍ ലീഗ് കൗണ്‍സിലര്‍ സി പി സലാമിനെ അക്രമിക്കാന്‍ എത്തുകയായിരുന്നു. അക്രമികളെ കണ്ട് ഓടിയ സലാം അടുത്തുള്ള കുഞ്ഞായിഷയുടെ വീട്ടില്‍ കയറി. പിറകെ എത്തിയ അക്രമികള്‍ സലാമിനെ വീട്ടില്‍ കയറി വെട്ടുകയായിരുന്നു. തടയാന്‍ ശ്രമിച്ച കുഞ്ഞായിഷയെ ചവിട്ടി വീഴ്ത്തി. അക്രമിസംഘം വീടിന്റെ ജനല്‍ ചില്ലുകള്‍ പൂര്‍ണ്ണമായും തകര്‍ത്തു.
വീട്ടിലേക്ക് അതിക്രമിച്ച് കയറിയാണ് മൊയ്തീന്‍ കോയയെയും അക്രമികള്‍ വെട്ടിയത്. തുടര്‍ന്ന് വീടിന്റെ ജനല്‍ച്ചില്ലുകള്‍ അടിച്ചുതകര്‍ത്തു. സമീപത്തെ ചിരായിന്‍റെ പുരയ്ക്കല്‍ ഖജീവിയുടെ വീടും അക്രമിസംഘം അടിച്ച് തകര്‍ത്തു. കൂടാതെ പ്രദേശത്തെ മൂന്നു വീടുകള്‍ക്ക് നേരെയും ആക്രമണം നടത്തിയിട്ടുണ്ട്. അക്രമ സംഭവങ്ങള്‍ കൂടുതല്‍ പ്രദേശങ്ങളിലേക്ക് വ്യാപിക്കാതിരിക്കാന്‍ വന്‍ പൊലീസ് സന്നാഹമാണ് സ്ഥലത്ത് വിന്ന്യസിച്ചിരിക്കുന്നത്.
