കാസര്‍കോട്: നൂറ്റാണ്ടുകൾക്ക് ശേഷം വിരുന്നെത്തുന്ന പെരുങ്കളിയാട്ടത്തെ വരവേല്‍ക്കാന്‍ ഒരുങ്ങി പെരിയയിലെ കല്ല്യോട്ട് ഗ്രാമം. കളിയാട്ടത്തിനായി നാടാകെ പങ്കുചേര്‍ന്ന് വയലില്‍ വിത്തിറക്കി. ഏഴ്‌ പതിറ്റാണ്ടുകൾക്ക് ശേഷം വിരുന്നെത്തുന്ന പെരുങ്കളിയാട്ടത്തിൽ പങ്കുചേരാനെത്തുന്നവരെ ഇവിടെ വിളയിച്ചെടുത്ത നെല്ല് കുത്തിയാണ് ഊട്ടുക.
പെരുങ്കളിയാട്ടത്തിനെ വരവേല്‍ക്കാന്‍ പാടത്തിറങ്ങി കല്ല്യോട്ട് ഗ്രാമം
ചേറും ചെളിയും ചവിട്ടി പരിചയമില്ലാത്ത പുതുതലമുറ വരെ ഞാറു നടീലിനായി കണ്ടത്തിലിറങ്ങി. ഉത്സവത്തിന് നെല്ലൊരുക്കാൻ ഇളക്കിമറിച്ച വയലേലകളിൽ ഒത്തൊരുമയോടെ അവര്‍ ഞാറ് നട്ടു. കല്യോട്ട് ഭഗവതി ക്ഷേത്രത്തിന്റെ ഉടമസ്ഥതയിലുള്ള ഏക്കറ് കണക്കിന് പാടത്താണ് ഞാറു നട്ടത്. ആറ് മാസം കൊണ്ട് കൊയ്ത്ത് നടത്തി ഉത്സവത്തിനുള്ള അരി സംഭരിക്കുകയാണ് ലക്ഷ്യം. പാടത്തിറങ്ങിയവരെല്ലാം പെരുങ്കളിയാട്ടത്തിന്റെ കേളി കൊട്ടിനായുള്ള കാത്തിരിപ്പിലാണ്.
