തിരുവനന്തപുരം: വിവാദങ്ങള്‍ക്കിടെ രണ്ട് ദിവസത്തെ സിപിഎം സംസ്ഥാന നേതൃയോഗങ്ങൾക്ക് ഇന്ന് തുടക്കം. ഇന്ന് സംസ്ഥാന സെക്രട്ടറിയേറ്റും തുടർന്ന് സംസ്ഥാന സമിതിയും യോഗം ചേരും. ലോക്‌സഭാ തെരഞ്ഞെടുപ്പിലെ കനത്ത തിരിച്ചടി സംബന്ധിച്ച കേന്ദ്രകമ്മിറ്റിയുടെ റിപ്പോർട്ട് ചർച്ച ചെയ്യുന്നതാണ് യോഗത്തിന്‍റെ പ്രധാന അജണ്ട. സംസ്ഥാന സെക്രട്ടറി കോടിയേരി ബാലകൃഷ്ണന്‍റെ മകൻ ബിനോയ് കോടിയേരിക്കെതിരെ ഉയർന്ന ലൈംഗിക പീഡനപരാതി യോഗത്തിൽ ചർച്ചയാകും.
തെരഞ്ഞെടുപ്പ് പരാജയത്തിന് ശബരിമല വിഷയം കാരണമായെന്നും പാർട്ടി അനുഭാവികളുടെ വോട്ടുകൾ പോലും ഇതുമൂലം അകന്നുവെന്നുമാണ് കേന്ദ്രകമ്മിറ്റിയുടെ വിലയിരുത്തൽ. ഇത് മറികടക്കാൻ ആവശ്യമായ നടപടികൾ സംസ്ഥാന നേതൃത്വം സ്വീകരിക്കണമെന്നും നിർദേശമുണ്ട്. ഇക്കാര്യം നേതൃയോഗം പരിശോധിക്കും. ബിനോയ് കോടിയേരിക്കെതിരായ ലൈംഗിക പീഡന പരാതി ജനങ്ങള്‍ക്കിടയില്‍ പാർട്ടിക്ക് അവമതിപ്പ് ഉണ്ടാക്കിയെന്ന് ശക്തമായ അഭിപ്രായമുണ്ട്. ഇത് യോഗത്തില്‍ ചര്‍ച്ചയാകും. ആന്തൂർ നഗരസഭയിൽ പ്രവാസി വ്യവസായി ആത്മഹത്യ ചെയ്ത സംഭവവും യോഗത്തിൽ ഉന്നയിക്കും. നഗരസഭാ അധ്യക്ഷ ശ്യാമളക്കെതിരെ നടപടി വേണമെന്ന ഏരിയ-ജില്ലാ ഘടകങ്ങളുടെ ആവശ്യവും ഇന്ന് പരിശോധിക്കും. സംഭവത്തിന് കാരണം സിപിഎമ്മിനുള്ളിലെ വിഭാഗീയതയാണെന്ന പ്രചരണവും ശക്തമാണ്.
