ലിയോണ്‍: ചാമ്പ്യന്‍സ് ലീഗ് ക്വാര്‍ട്ടര്‍ ഫൈനലില്‍ വമ്പന്‍ ടീമുകള്‍ മുഖാമുഖം വരാന്‍ സാധ്യത. സ്വിറ്റസര്‍ലാന്‍ഡിലെ ലിസ്ബണില്‍ ഫൈനല്‍സിന്‍റെ നറുക്കെടുപ്പ് പൂര്‍ത്തിയായതോടെയാണ് ആവേശകരമായ മത്സരങ്ങള്‍ക്ക് സാധ്യത തെളിഞ്ഞത്. രണ്ട് ക്വാര്‍ട്ടര്‍ ഫൈനല്‍ മത്സരങ്ങളുടെ ചിത്രം വ്യക്തമായപ്പോള്‍ പ്രീക്വാര്‍ട്ടര്‍ മത്സരങ്ങള്‍ പൂര്‍ത്തിയാകാത്തതിനാല്‍ മറ്റ് രണ്ട് ക്വാര്‍ട്ടര്‍ ഫൈനല്‍ പോരാട്ടങ്ങളുടെ അന്തിമരൂപം ആയിട്ടില്ല.
റെഡ്ബുള്‍ ലെയ്‌പ്‌സിഗും അത്‌ലറ്റിക്കോ മാഡ്രിഡും തമ്മിലാണ് ഒരു ക്വാര്‍ട്ടര്‍ ഫൈനല്‍ മത്സരം. മറ്റൊരു മത്സരത്തില്‍ അറ്റ്ലാന്‍ഡ ഫ്രഞ്ച് ലീഗിലെ നിലവിലെ ചാമ്പ്യന്‍മാരായ പിഎസ്‌ജിയെ നേരിടും. കൊവിഡ് 19 കാരണമാണ് നാല് പ്രീക്വാര്‍ട്ടര്‍ മത്സരങ്ങള്‍ പൂര്‍ത്തിയാക്കാന്‍ സാധിക്കാതെ പോയത്. ഈ മത്സരങ്ങള്‍ ഓഗസ്റ്റ് എട്ട്, ഒമ്പത് തീയതികളിലായി നടക്കും.
ഇംഗ്ലീഷ് പ്രീമിയര്‍ ലീഗിലെ കരുത്തരായ മാഞ്ചസ്റ്റര്‍ സിറ്റിയും സ്പാനിഷ് ലാലിഗയില്‍ കിരീട പോരാട്ടം തുടരുന്ന റയല്‍ മാഡ്രിഡു തമ്മിലുള്ള പ്രീ ക്വാര്‍ട്ടറിലെ വിജയികള്‍ യുവന്‍റസും ല്യോണും തമ്മിലുള്ള പ്രീക്വാര്‍ട്ടറിലെ വിജയികളെ നേരിടും. നേരത്തെ ആദ്യപാദ പ്രീക്വാര്‍ട്ടര്‍ മത്സരത്തില്‍ റയലിന് എതിരെ മാഞ്ചസ്റ്റര്‍ സിറ്റി ഒന്നിനെതിരെ രണ്ട് ഗോളുകളുടെ വിജയം സ്വന്തമാക്കിയിരുന്നു. അതേസമയം മറ്റൊരു ആദ്യപാദ പ്രീ ക്വാര്‍ട്ടറില്‍ ഇറ്റാലിയന്‍ സീരി എയിലെ നിലവിലെ ചാമ്പ്യന്‍മാരായ യുവന്‍റസിനെ ലിയോണ്‍ ഏകപക്ഷീയമായ ഒരു ഗോളിനും പരാജയപ്പെടുത്തി.
ചാമ്പ്യന്‍സ് ലീഗ്; റയലിനെതിരായ റോണാള്‍ഡോയുടെ കളിക്കായി ആരാധകര്‍
ചാമ്പ്യന്‍സ് ലീഗിലെ മറ്റൊരു ക്വാര്‍ട്ടര്‍ ഫൈനല്‍ മത്സരത്തില്‍ സ്പാനിഷ് ലാലിഗയിലെ നിലവിലെ ചാമ്പ്യന്‍മാരായ ബാഴ്സലോണയും ഇറ്റാലിയന്‍ സീരി എയിലെ നാപ്പോളിയും തമ്മിലുള്ള മത്സരത്തിലെ വിജയികളും ബുണ്ടസ് ലീഗ ജേതാക്കളായ ബയേണ്‍ മ്യൂണിക്കും ചെല്‍സിയും തമ്മിലുള്ള മത്സരത്തിലെ വിജയികളും തമ്മില്‍ ഏറ്റുമുട്ടും. ബാഴ്സയും നാപ്പോളിയും തമ്മിലുള്ള ആദ്യ പാദ പ്രീ ക്വാര്‍ട്ടര്‍ മത്സരത്തില്‍ ഇരു ടീമുകളും ഒരോ ഗോള്‍ വീതം അടിച്ച് സമനിലയില്‍ പിരിഞ്ഞിരുന്നു. അതേസമയം ചെല്‍സിയെ ഏകപക്ഷീയമായ മൂന്ന് ഗോളുകള്‍ക്ക് പരാജയപ്പെടുത്തിയ ബയേണിന്‍റെ ക്വാര്‍ട്ടര്‍ ഫൈനല്‍ പ്രതീക്ഷകള്‍ കൂടുതല്‍ സജീവമാണ്.
ക്വാര്‍ട്ടര്‍ ഫൈനലില്‍ ഇരുപാദ മത്സരങ്ങളില്ലെന്ന പ്രത്യകതയുമുണ്ട്. ഓഗസ്റ്റ് 12, 15 തീയതികളിലായി നടക്കുന്ന ക്വാര്‍ട്ടര്‍ ഫൈനല്‍ മത്സരങ്ങള്‍ക്ക് പോര്‍ച്ചുഗലിലെ ലിസ്ബണ്‍ വേദിയാകും. സെമി ഫൈനല്‍ മത്സരങ്ങള്‍ ഓഗസ്റ്റ് 18, 19 തീയതികളിലും കലാശപ്പോര് ഓഗസ്റ്റ് 23നും നടക്കും.
