മിര്‍സാപുർ (യുപി) : ഓടുന്ന ട്രെയിനില്‍ കയറാന്‍ ശ്രമിക്കുന്നതിനിടെ പ്ലാറ്റ്‌ഫോമിനും ട്രെയിനിനുമിടയില്‍ കുടുങ്ങി അധ്യാപികയ്ക്ക് ദാരുണാന്ത്യം. യുപിയിലെ മിര്‍സാപുര്‍ റെയില്‍വേ സ്റ്റേഷനില്‍ വെള്ളിയാഴ്‌ച രാവിലെയാണ് നടുക്കുന്ന സംഭവം. ഭക്ഷണം വാങ്ങാനായി പ്ലാറ്റ്‌ഫോമില്‍ ഇറങ്ങിയ ശേഷം തിരികെ കയറുന്നതിനിടെയാണ് അപകടത്തില്‍പ്പെട്ടത്.
ഇതിന്‍റെ ദൃശ്യം സ്റ്റേഷനിലെ സിസിടിവി ക്യാമറയില്‍ പതിഞ്ഞിരുന്നു. സംഭവത്തെക്കുറിച്ച് റെയില്‍വേ പൊലീസ് പറയുന്നതിങ്ങനെ - സഹോദരിയുമായി മഗദ എക്‌സ്‌പ്രസ് ട്രെയിനില്‍ ഡാർജിലിങ്ങിലേക്ക് യാത്ര ചെയ്യുകയായിരുന്നു ഗീതാഞ്ജലി. മിര്‍സാപുർ റെയില്‍വേ സ്റ്റേഷനില്‍ ട്രെയിന്‍ നിര്‍ത്തിയപ്പോള്‍ ഭക്ഷണം വാങ്ങാനായി ഇവര്‍ പുറത്തിറങ്ങി.
ഇതിനിടെ ട്രെയിനെടുത്തു. തുടര്‍ന്ന് ഓടി കയറാന്‍ ശ്രമിക്കുന്നതിനിടെ കാല്‍ വഴുതി പ്ലാറ്റ്‌ഫോമിനും ട്രെയിനിനും ഇടയില്‍ കുടുങ്ങുകയായിരുന്നു. അപകടത്തിന് പിന്നാലെ ട്രെയിന്‍ നിര്‍ത്തി ഗീതാഞ്ജലിയെ പുറത്തെടുത്തെങ്കിലും മരണം സംഭവിച്ചിരുന്നു.
