കൊൽക്കത്ത: പശ്ചിമ ബംഗാളില്‍ 30 കോടിയുടെ 3,600 കിലോ മയക്കുമരുന്ന് പിടിച്ചെടുത്തു. പൊലീസിന്‍റെ പ്രത്യേക അന്വേഷണ സംഘം (എസ്‌ടിഎഫ്) വെള്ളിയാഴ്‌ച (ഒക്‌ടോബര്‍ 21) നടത്തിയ റെയ്‌ഡിലാണ് കറുപ്പ് (Opium) കസ്റ്റഡിയിലെടുത്തത്. സുൽത്താൻ അഹമ്മദ് (43), എംഡി കലിം (28), ഫയാസ് ആലം (55) എന്നിവരാണ് അറസ്റ്റിലായത്.
കൊല്‍ക്കത്തയിലെ ഗുൽഷൻ കോളനി പ്രദേശത്തിനടുത്തുള്ള ഒരു ഗോഡൗണില്‍ നിന്നാണ് മയക്കുമരുന്ന് പിടികൂടിയത്. ജാർഖണ്ഡ് സ്വദേശിയായ നൗഷാദ് അൻസാരിയെ ലഹരിയുമായി ഈ മാസം ആദ്യം എജെസി ബോസ് റോഡിന് സമീപമുള്ള പ്രദേശത്ത് നിന്ന് പൊലീസ് അറസ്റ്റുചെയ്‌തിരുന്നു. തുടര്‍ന്നുനടന്ന ചോദ്യം ചെയ്യലിലാണ് 30 കോടിയുടെ ലഹരി പിടികൂടുന്നതിലേക്ക് അന്വേഷണമെത്തിയത്.
