ന്യൂഡല്‍ഹി: രാജ്യതലസ്ഥാനത്ത് കഴിഞ്ഞ ദിവസം നടന്ന അതിക്രൂരമായ കൊലപാതകത്തില്‍ പെണ്‍കുട്ടിയുടെ കുടുംബത്തിന് 10 ലക്ഷം രൂപ നഷ്‌ടപരിഹാരം പ്രഖ്യാപിച്ച് ഡല്‍ഹി മുഖ്യമന്ത്രി അരവിന്ദ് കെജ്‌രിവാള്‍. കഴിഞ്ഞ ദിവസം 16കാരിയായ പെണ്‍കുട്ടിയെ അതിക്രൂരമായി കത്തി ഉപയോഗിച്ച് കുത്തിയും കല്ലെറിഞ്ഞും കൊലപ്പെടുത്തിയ സംഭവം രാജ്യത്തെ നടുക്കിയ ഒന്നായിരുന്നു. ഉത്തര്‍ പ്രദേശ് സ്വദേശിയും എ സി, ഫ്രിഡ്‌ജ് മെക്കാനിക്കുമായ പ്രതി സാഹിലിനെ(20) കഴിഞ്ഞ ദിവസം പൊലീസ് അറസ്‌റ്റ് ചെയ്‌തിരുന്നു.
പ്രതി പൊലീസ് കസ്‌റ്റഡിയില്‍: അറസ്‌റ്റ് ചെയ്‌ത സാഹിലിനെ ഇന്ന് ഡല്‍ഹി പൊലീസ് പ്രാദേശിക കോടതിയില്‍ ഹാജരാക്കിയ ശേഷം, രണ്ട് ദിവസത്തെ പൊലീസ് കസ്‌റ്റഡിയില്‍ വിട്ടു. പൊതു ഇടത്തില്‍ വച്ച് പെണ്‍കുട്ടിയെ പ്രതി ക്രൂരമായി കൊലപ്പെടുത്തുന്നതിന്‍റെ ദൃശ്യങ്ങള്‍ സമൂഹ മാധ്യമങ്ങളില്‍ പ്രചരിച്ചിരുന്നു.
'ഹൃദയഭേദകമായ ഒരു സംഭവമായിരുന്നു അത്. മരണപ്പെട്ട പെണ്‍കുട്ടിയുടെ കുടുംബത്തിന് 10 ലക്ഷം രൂപ നഷ്‌ടപരിഹാരം ഡല്‍ഹി സര്‍ക്കാര്‍ നല്‍കും', അരവിന്ദ് കെജ്‌രിവാള്‍ വാര്‍ത്താസമ്മേളനത്തില്‍ പറഞ്ഞു. പ്രതിക്ക് കഠിന തടവ് ലഭിക്കുവാനുള്ള നടപടി സ്വീകരിക്കുമെന്ന് മുഖ്യമന്ത്രി പെണ്‍കുട്ടിയുടെ കുടുംബത്തിന് ഉറപ്പ് നല്‍കി.
'ഡല്‍ഹിയിലെ ക്രമസമാധാന നിലയെക്കുറിച്ചാണ് നിലവില്‍ ഞങ്ങളുടെ ആശങ്ക. പെണ്‍കുട്ടിയുടെ കുടുംബത്തെ മന്ത്രി ആതിശി സന്ദര്‍ശിക്കുമെന്ന്', മുഖ്യമന്ത്രി അറിയിച്ചു.
കുത്തിയത് 20 തവണ: 20 തവണയായിരുന്നു പ്രതി സാഹില്‍ പെണ്‍കുട്ടിയെ കത്തി ഉപയോഗിച്ച് കുത്തിയത്. ശേഷം, സിമന്‍റ് സ്ലാബ് എടുത്ത് തലയില്‍ നിരവധി തവണ എറിയുകയായിരുന്നു. ആക്രമണത്തില്‍ പെണ്‍കുട്ടിയുടെ തലയോട്ടി തകര്‍ന്നിരുന്നു.
34 ക്ഷതങ്ങളായിരുന്നു പെണ്‍കുട്ടിയുടെ ശരീരത്തില്‍ നിന്നും കണ്ടെത്തിയത്. തന്‍റെ പ്രവര്‍ത്തിയില്‍ യാതൊരു കുറ്റബോധവും തോന്നുന്നില്ല എന്ന് സാഹില്‍ ചോദ്യം ചെയ്യലിന്‍റെ സമയം പൊലീസിനോട് പറഞ്ഞു. കഴിഞ്ഞ മൂന്ന് വര്‍ഷമായി സാഹിലും പെണ്‍കുട്ടിയും പ്രണയത്തിലായിരുന്നു.
എന്നാല്‍, ചില അസ്വാരസ്യങ്ങളെ തുടര്‍ന്ന് ഇരുവരുടെയും ബന്ധത്തില്‍ വിള്ളല്‍ വീഴുകയും പരസ്‌പരം വേര്‍പിരിയാമെന്ന് തീരുമാനിക്കുകയുമായിരുന്നു. പെണ്‍കുട്ടി തന്നെ അവഗണിച്ചതിനാലാണ് പ്രകോപിതനായതെന്ന് സാഹില്‍ പൊലീസിനോട് പറഞ്ഞു. കൂടാതെ, പെണ്‍കുട്ടിക്ക് മുന്‍ കാമുകനുമായി ബന്ധമുണ്ടായിരുന്നതായി താന്‍ സംശയിച്ചതായും സാഹില്‍ പറഞ്ഞു.
രാജ്യത്തെ നടുക്കിയ കൊലപാതകം: 16 വയസുകാരിയായ പെണ്‍കുട്ടി സുഹൃത്തിന്‍റെ മകന്‍റെ പിറന്നാള്‍ ആഘോഷ ചടങ്ങില്‍ പങ്കെടുക്കുവാന്‍ പോയപ്പോഴായിരുന്നു കൊലപാതകത്തിന് ഇരയായത്. സുഹൃത്തിന്‍റെ വീടിന് പുറത്ത് നിന്നിരുന്ന പെണ്‍കുട്ടിയെ യുവാവ് സമീപിക്കുകയും ഇരുവരും തമ്മില്‍ സംഭാഷണത്തിലേര്‍പ്പെടുകയും ചെയ്‌തിരുന്നു. തുടര്‍ന്ന് പ്രകോപിതനായ യുവാവ് മുന്‍വിധി കൂടാതെ ഇരയെ കത്തി ഉപയോഗിച്ച് നിരവധി തവണ ക്രൂരമായി ആക്രമിക്കുകയായിരുന്നു.
ഗുരുതരമായി പരിക്കേറ്റ പെണ്‍കുട്ടി തല്‍ക്ഷണം ബോധരഹിതയായി വീണിരുന്നു. ശേഷം, പ്രതി സംഭവ സ്ഥലത്ത് നിന്നും കടന്നുകളഞ്ഞു. ബന്ധപ്പെട്ട അധികാരികള്‍ വിവരമറിയിച്ചതിനെ തുടര്‍ന്ന് പൊലീസ് സ്ഥലത്തെത്തി പെണ്‍കുട്ടിയെ ഉടന്‍ തന്നെ അടുത്തുള്ള ആശുപത്രിയില്‍ പ്രവേശിപ്പിച്ചു. എന്നാല്‍, ആശുപത്രിയിലെത്തുമ്പോഴേയ്‌ക്കും പെണ്‍കുട്ടി മരണപ്പെട്ടു.
also read: ഡല്‍ഹിയില്‍ 16കാരിയെ ക്രൂരമായി കുത്തിക്കൊലപ്പെടുത്തി യുവാവ്; പ്രതി അറസ്‌റ്റില്‍
