ലക്‌നൗ : ഉത്തർപ്രദേശ് നിയമസഭ തെരഞ്ഞെടുപ്പിന്‍റെ അഞ്ചാം ഘട്ട പോളിങ്ങില്‍ ഇതുവരെ 15 ശതമാനം വോട്ടിങ്. 12 ജില്ലകളിലായി 61 സീറ്റുകളിലേക്ക് നടക്കുന്ന തെരഞ്ഞെടുപ്പില്‍ ഉപമുഖ്യമന്ത്രി കേശവ് പ്രസാദ് മൗര്യ ഉൾപ്പടെ 692 സ്ഥാനാർഥികളാണ് മത്സരിക്കുന്നത്.
അമേഠി, റായ്ബറേലി, അയോധ്യ (ഫൈസാബാദ്), സുൽത്താൻപൂർ, ചിത്രകൂട്, പ്രതാപ്‌ഗഡ്, കൗശാംബി, പ്രയാഗ്‌രാജ് (അലഹബാദ്), ബരാബങ്കി, ബഹ്‌റൈച്ച്, ശ്രാവസ്‌തി, ഗോണ്ട എന്നി ജില്ലകളിലാണ് വോട്ടെടുപ്പ് നടക്കുന്നത്. കൗശാംബി ജില്ലയിലെ സിറത്തുവിൽ നിന്ന് മത്സരിക്കുന്ന ഉപമുഖ്യമന്ത്രി കേശവ് പ്രസാദ് മൗര്യയാണ് തെരഞ്ഞെടുപ്പില്‍ ജനവിധി തേടുന്നവരില്‍ പ്രമുഖരിലൊരാള്‍. അപ്‌നാ ദൾ സ്ഥാനാർത്ഥി പല്ലവി പട്ടേലിനെയാണ് മൗര്യ നേരിടുന്നത്.
അലഹബാദ് വെസ്റ്റിൽ നിന്നുള്ള സിദ്ധാർഥ് നാഥ് സിങ്, പ്രതാപ്‌ഗഡില്‍ നിന്ന് രാജേന്ദ്ര സിങ്, അലഹബാദ് സൗത്തിൽ നിന്ന് നന്ദ് ഗോപാൽ ഗുപ്‌ത നാഡി, ഗോണ്ടയില്‍ നിന്ന് രമാപതി ശാസ്‌ത്രി എന്നിവരാണ് മത്സരരംഗത്തുള്ള മറ്റ് മന്ത്രിമാർ. കോൺഗ്രസ് നിയമസഭാകക്ഷി നേതാവ് ആരാധന മിശ്രയും ജനവിധി തേടുന്നുണ്ട്.
Also read: 'ഓപ്പറേഷൻ ഗംഗ' ; 250 പേരുമായി രണ്ടാം വിമാനം ഡൽഹിയില്‍, 17 മലയാളികൾ
അഞ്ചാം ഘട്ട തെരഞ്ഞെടുപ്പ് പ്രചാരണത്തിന്‍റെ ഭാഗമായി പ്രധാനമന്ത്രി നരേന്ദ്ര മോദി, പ്രതിരോധ മന്ത്രി രാജ്‌നാഥ് സിങ്, കേന്ദ്ര ആഭ്യന്തര മന്ത്രി അമിത് ഷാ, ഉത്തർപ്രദേശ് മുഖ്യമന്ത്രി യോഗി ആദിത്യനാഥ്, സമാജ്‌വാദി പാർട്ടി അധ്യക്ഷൻ അഖിലേഷ് യാദവ്, കോൺഗ്രസ് ജനറൽ സെക്രട്ടറി പ്രിയങ്ക ഗാന്ധി, കോണ്‍ഗ്രസ് നേതാവ് രാഹുല്‍ ഗാന്ധി, ബിഎസ്‌പി അധ്യക്ഷ മായാവതി തുടങ്ങിയ പ്രമുഖരെല്ലാം മണ്ഡലങ്ങളിൽ വിപുലമായ പര്യടനം നടത്തിയിരുന്നു.
കോൺഗ്രസ് അധ്യക്ഷ സോണിയാഗാന്ധി തന്‍റെ മണ്ഡലമായ റായ്ബറേലിയില്‍ സംഘടിപ്പിച്ച റാലിയെ ഓണ്‍ലൈനിലാണ് അഭിസംബോധന ചെയ്‌തത്. ഏഴ് ഘട്ടങ്ങളായി നടക്കുന്ന ഉത്തർപ്രദേശ് നിയമസഭ തെരഞ്ഞെടുപ്പിന്‍റെ അവസാന രണ്ടെണ്ണം മാർച്ച് 3, 7 തീയതികളിൽ നടക്കും. മാർച്ച് 10നാണ് വോട്ടെണ്ണൽ.
