ന്യൂഡൽഹി: പ്രളയം രൂക്ഷമായി ബാധിച്ച ഉത്തരാഖണ്ഡിൽ കേന്ദ്ര ആഭ്യന്തരമന്ത്രി അമിത് ഷാ സന്ദർശനം നടത്തും. അവലോകന യോഗത്തിൽ പങ്കെടുക്കുന്ന അമിത് ഷാ നിലവിലെ സാഹചര്യം വിലയിരുത്തുമെന്ന് അടുത്ത വൃത്തങ്ങൾ പറയുന്നു. വ്യാഴാഴ്‌ച അമിത് ഷാ പ്രളയ ബാധിത പ്രദേശങ്ങളിൽ ഏരിയൽ സർവെ നടത്തും.
പെട്ടെന്നുണ്ടായ മഴയിലും മണ്ണിടിച്ചിലിലും നിരവധി പേരാണ് മരിച്ചത്. ഒക്‌ടോബർ 17നാണ് സംസ്ഥാനത്ത് മഴ തുടങ്ങിയത്. മൂന്ന് ദിവസത്തിനുള്ളിൽ 46 മരണമാണ് സംസ്ഥാനത്ത് റിപ്പോർട്ട് ചെയ്‌തത്. ഒക്‌ടോബർ 17ന് ചംബാവത് പ്രദേശത്ത് ഒരാളും ഒക്‌ടോബർ 18ന് ആറ് പേരും ഒക്‌ടോബർ 19ന് 39 പേരുമാണ് പ്രളയത്തിലും മണ്ണിടിച്ചിലിലുമായി മരിച്ചത്.
ഉത്തരാഖണ്ഡ് മുഖ്യമന്ത്രി പുഷ്‌കർ സിങ് ദാമി ചൊവ്വാഴ്‌ച പ്രളയ ബാധിത പ്രദേശങ്ങളിൽ ഏരിയൽ സർവെ നടത്തിയിരുന്നു. ഒമ്പത് വീടുകൾക്കാണ് കേടുപാടുകൾ സംഭവിച്ചത്. പ്രളയ ബാധിത പ്രദേശങ്ങളിൽ രക്ഷാപ്രവർത്തനങ്ങളും ദുരിതാശ്വാസ പ്രവർത്തനങ്ങളും തുടരുകയാണ്. 11 പേർക്കായുള്ള തെരച്ചിലാണ് തുടരുന്നത്. വിവിധ പ്രദേശങ്ങളിൽ നിരവധി പേരാണ് കുടുങ്ങിക്കിടക്കുന്നത്. ഇവരെ രക്ഷപ്പെടുത്താനുള്ള പ്രവർത്തനങ്ങളും പുരോഗമിക്കുകയാണ്. ദുരന്തത്തിൽ പ്രധാനമന്ത്രി നരേന്ദ്രമോദി ദുഃഖം രേഖപ്പെടുത്തി.
ALSO READ: മഴ മുന്നറിയിപ്പ്: എല്ലാ വിദ്യാഭ്യാസ സ്ഥാപനങ്ങള്‍ക്കും ശനിയാഴ്‌ച വരെ അവധി
