ന്യൂഡല്‍ഹി : കുട്ടികളെ ലൈംഗികമായി ചൂഷണം ചെയ്യുക, നഗ്നത പ്രദര്‍ശിപ്പിക്കുക തുടങ്ങിയ കുറ്റകൃത്യങ്ങള്‍ പ്രോത്സാഹിപ്പിക്കുന്ന 44,661 ട്വിറ്റര്‍ അക്കൗണ്ടുകള്‍ക്ക് നിരോധനം. ഇലോണ്‍ മസ്‌ക് ട്വിറ്ററിന്‍റെ അധികാരമേറ്റെടുത്തതിന് ശേഷം സെപ്റ്റംബര് 26നും ഒക്‌ടോബര്‍ 25നും ഇടയിലാണ് ഇതുസംബന്ധിച്ച് നടപടി സ്വീകരിച്ചത്. നേരത്തെ ഓഗസ്‌റ്റ് 26 മുതല്‍ സെപ്റ്റംബര് 25 വരെയുള്ള കാലയളവില്‍ ഇന്ത്യയില്‍ നിന്നുമുള്ള 52.141 വ്യാജ അക്കൗണ്ടുകള്‍ നിരോധിക്കപ്പെട്ടതിന് പുറമെയാണ് പുതിയ നടപടി.
ഇലോണ്‍ മസ്‌ക്, ട്വിറ്ററിന്‍റെ അധികാരം ഏറ്റെടുത്തത് മുതല്‍ വലിയ രീതിയിലുള്ള മാറ്റങ്ങളാണ് മൈക്രോബ്ലോഗിങ് സൈറ്റില്‍ സംഭവിക്കുന്നത്. ഭീകരവാദ പ്രവര്‍ത്തനങ്ങള്‍ പ്രോത്സാഹിപ്പിക്കുന്നു എന്നാരോപിച്ച് മുമ്പ് 4,014 അക്കൗണ്ടുകള്‍ നിരോധിച്ചിരുന്നു. 2021ലെ ഐടി നിയമങ്ങള്‍ പ്രകാരം പരാതി പരിഹാര സംവിധാനങ്ങള്‍ വഴി ഒരേസമയം ഇന്ത്യയിലെ 582 ഉപയോക്താക്കളില്‍ നിന്നും പരാതികള്‍ ലഭിച്ചുവെന്ന് ട്വിറ്ററിന്‍റെ പ്രതിമാസ റിപ്പോര്‍ട്ടില്‍ പറയുന്നു. എന്നാല്‍, അതില്‍ വെറും 20 യുആര്‍എല്ലുകള്‍ക്ക് (URL) എതിരെ മാത്രമേ നടപടി സ്വീകരിച്ചിട്ടുള്ളൂ.
അതേസമയം, ഓഗസ്‌റ്റ് 26നും സെപ്റ്റംബര് 25നും ഇടയില്‍ 157 പരാതികള്‍ ഉയര്‍ന്നതില്‍ 129 എണ്ണത്തിലാണ് നടപടി സ്വീകരിച്ചത്. അതേസമയം നിരോധിക്കപ്പെട്ട ശേഷം അപ്പീല്‍ നല്‍കിയ 61 പരാതികള്‍ സ്വീകരിച്ചുവെന്ന് ട്വിറ്റര്‍ അറിയിച്ചു. എന്നാല്‍, ഇവ പ്രത്യേകമായി നിരീക്ഷിച്ചതിന് ശേഷമേ നിരോധനം അസാധുവാക്കണോ എന്ന തരത്തില്‍ തീരുമാനം എടുക്കുകയുള്ളൂവെന്നും എല്ലാ അക്കൗണ്ടുകളും താത്കാലികമായി നിര്‍ത്തിവച്ചിരിക്കുകയാണെന്നും ട്വിറ്റര്‍ വ്യക്തമാക്കി.
എന്നാല്‍, കുട്ടികളുടെ അശ്ലീല ചിത്രങ്ങള്‍ പ്രദര്‍ശിപ്പിക്കുന്നു എന്ന പരാതികളിന്‍മേല്‍ ട്വിറ്ററില്‍ നിന്ന് ലഭിച്ച മറുപടി അപൂര്‍ണമാണെന്നും തൃപ്‌തികരമല്ലെന്നുമാണ് ഡല്‍ഹി വനിത കമ്മിഷന്‍ അധ്യക്ഷ സ്വാതി മലിവാള്‍ വ്യക്തമാക്കിയത്. ഇത്തരത്തിലുള്ള അക്കൗണ്ടുകളെക്കുറിച്ച് മസ്‌ക് റിപ്പോര്‍ട്ടുകളില്‍ കടുത്ത ആശങ്ക പ്രകടിപ്പിച്ചിരുന്നു. പുതുക്കിയ, 2021ലെ ഐടി നിയമങ്ങള്‍ പ്രകാരം അഞ്ച് ദശലക്ഷത്തിലധികം ഉപയോക്താക്കളുള്ള ഡിജിറ്റല്‍ സോഷ്യല്‍ മീഡിയ പ്ലാറ്റ്‌ഫോമുകളില്‍ പ്രതിമാസം ലഭിക്കുന്ന പരാതിയുടെ റിപ്പോര്‍ട്ടുകള്‍ പ്രസിദ്ധീകരിക്കേണ്ടതുണ്ട്.
