ന്യൂഡൽഹി: ജി20 ഉച്ചകോടിയ്‌ക്കായി (G20 Summit) ഇന്ത്യയിലെത്തുന്ന രാഷ്‌ട്രത്തലവന്മാരെ സ്വീകരിക്കാന്‍ വലിയ ഒരുക്കങ്ങളാണ് രാജ്യം നടത്തുന്നത്. ഇന്ന് വൈകിട്ടോടെ മിക്ക രാജ്യങ്ങളുടേയും തലവന്മാര്‍ ഡൽഹിയിലെത്തിയിട്ടുണ്ട്. വിദേശ രാജ്യങ്ങളില്‍ നിന്നുള്ള 400 അതിഥികള്‍ക്കായി നാളെ രാഷ്ട്രപതി ഭവനിൽ ഒരുക്കുന്ന അത്താഴ വിരുന്നിൽ മൃദംഗം (Mridangam Performance In G20 Summit) വായിച്ച് അതിഥികളെ അമ്പരപ്പിക്കാനൊരുങ്ങുകയാണ് ഒരു 12കാരന്‍.
വി ദക്ഷ് ഭൂപതിയെന്ന കൊച്ചുമിടുക്കനാണ് മൃദംഗ വായന അവതരിപ്പിച്ച് അതിഥികളായെത്തുന്ന വിവിധ രാഷ്‌ട്രങ്ങളിലെ നേതാക്കളെ അമ്പരപ്പിക്കാനൊരുങ്ങുന്നത്. ഡൽഹി വസുന്ധര എൻക്ലേവിലെ സോമർവില്ലെ സ്‌കൂളിൽ എട്ടാം ക്ലാസുകാരനാണ് ഈ മിടുമിടുക്കന്‍. 12 വയസുള്ള ദക്ഷിന്‍റെ കലാപ്രകടനത്തിനായി രാജ്യം കാത്തിരിക്കുകയാണ്. ജി20 ഉച്ചകോടിയുടെ ഭാഗമാകാൻ കഴിഞ്ഞത് അഭിമാനകരമാണെന്ന് 12കാരന്‍ ഇടിവി ഭാരത് നെറ്റ്‌വര്‍ക്ക് പ്രതിനിധിയോട് പറഞ്ഞു. ഇതിനായി അവസരം തന്ന പ്രധാനമന്ത്രി നരേന്ദ്ര മോദി, കേന്ദ്ര സംഗീത നാടക അക്കാദമി ചെയർമാൻ, സെക്രട്ടറി, സ്‌കൂള്‍ പ്രിൻസിപ്പാള്‍, ഗുരു എന്നിവർക്കുള്ള നന്ദിയും ദക്ഷ് പറഞ്ഞു.
അത്താഴസമയത്താണ് സംഗീത കച്ചേരി നടക്കുക. മധുരമുള്ള ഭക്ഷണത്തോടൊപ്പം മധുരമൂറുന്ന സംഗീതം അവതരിപ്പിക്കാനാണ് ദക്ഷ് ഉള്‍പ്പെടുന്ന കലാകാരന്മാരുടെ ശ്രമം. രാജ്യത്തിന്‍റെ വിവിധ സംസ്ഥാനങ്ങളിൽ നിന്നുള്ള 78 സംഗീതജ്ഞരാണ് ഈ പരിപാടിയില്‍ പങ്കെടുക്കുക. ഇതില്‍, ദക്ഷ് ഉൾപ്പെടെയുള്ള നിരവധി കലാകാരന്മാര്‍ കഴിഞ്ഞ ഒന്‍പത് ദിവസമായി പ്രഗതി മൈതാനത്തെ ഭാരത് മണ്ഡപത്തിൽ എല്ലാ ദിവസവും പരിശീലനം നടത്തുന്നുണ്ട്.
അഞ്ച് മുതൽ ആറ് മണിക്കൂർ വരെയാണ് ഇവരുടെ റിഹേഴ്‌സൽ. സാംസ്‌കാരിക മന്ത്രാലയത്തിന്‍റെ സെന്‍റര്‍ ഫോർ കൾച്ചറൽ റിസോസസ് ആൻഡ് ട്രെയിനിങ് (സിസിആർടി) സെന്‍ററിന്‍റെ സ്കോളർഷിപ്പ് ദക്ഷിന് ലഭിച്ചിട്ടുണ്ട്. 10 മുതൽ 14 വയസ് വരെ പ്രായമുള്ള കലാകാരന്മാരുടെ വിഭാഗത്തിലാണ് ഈ നേട്ടം.
ജോ ബൈഡനുമായി ഉഭയകക്ഷി ചര്‍ച്ച നടത്തി മോദി: യുഎസ്‌ പ്രസിഡന്‍റ് ജോ ബൈഡനുമായി ഉഭയകക്ഷി ചര്‍ച്ച നടത്തി പ്രധാനമന്ത്രി നരേന്ദ്രമോദി. രാജ്യം ആതിഥ്യം വഹിച്ചുകൊണ്ട് ഭാരത് മണ്ഡപത്തില്‍ നടക്കുന്ന ജി20 ഉച്ചകോടി ആരംഭിക്കാനിരിക്കെയാണ് ബൈഡനും പ്രധാനമന്ത്രിയും തമ്മില്‍ കൂടിക്കാഴ്‌ച നടത്തിയത്. ജി20 ഉച്ചകോടിയില്‍ പങ്കെടുക്കാനായി വെള്ളിയാഴ്‌ച (08.09.2023) വൈകുന്നേരത്തോടെയാണ് ജോ ബൈഡന്‍ ഇന്ത്യയിലെത്തിയത്.
പ്രധാനമന്ത്രിയും യുഎസ്‌ പ്രസിഡന്‍റുമായി ഡല്‍ഹിയിലെ ലോക്‌ കല്യാണ്‍ മാര്‍ഗില്‍ വച്ച് ചര്‍ച്ചകള്‍ നടക്കുന്നതായി പ്രധാനമന്ത്രിയുടെ ഓഫിസ് ഔദ്യോഗിക എക്‌സ്‌ അക്കൗണ്ടിലൂടെയാണ് അറിയിച്ചത്. അവരുടെ ചര്‍ച്ചകളില്‍ വിശാലമായ വിഷയങ്ങള്‍ ഉള്‍പ്പെടുന്നുവെന്നും ഇത് ഇന്ത്യയും യുഎസ്‌എയും തമ്മിലുള്ള ബന്ധം ഇനിയും ആഴത്തിലാക്കുമെന്നും പ്രധാനമന്ത്രിയുടെ ഓഫിസ് എക്‌സില്‍ കുറിച്ചു. ട്വീറ്റില്‍ പ്രധാനമന്ത്രി നരേന്ദ്രമോദി, യുഎസ്‌ പ്രസിഡന്‍റിന്‍റെ ഔദ്യോഗിക അക്കൗണ്ട്, ജോ ബൈഡന്‍റെ ഔദ്യോഗിക അക്കൗണ്ട് എന്നിവരെ ടാഗ് ചെയ്‌തിട്ടുമുണ്ട്.
