ചെന്നൈ : വീട്ടമ്മമാര്‍ക്ക് പ്രതിമാസം ആയിരം രൂപ ധനസഹായം നല്‍കുന്ന തമിഴ്നാട് സര്‍ക്കാര്‍ പദ്ധതിയായ ‘കലൈഞ്ജര്‍ മകളിർ ഉറിമൈ’ (Kalaignar Magalir Urimai) മുഖ്യമന്ത്രി എം കെ സ്റ്റാലിന്‍ (M K Stalin) ഉദ്ഘാടനം ചെയ്തു (Tamil Nadu Launched Rs 1000 Monthly Assistance Scheme for Women). മുൻ മുഖ്യമന്ത്രിയും ഡി എം കെ സ്ഥാപകനുമായ അണ്ണാദുരൈയുടെ (Annadurai) ജന്മദിനത്തിൽ അദ്ദേഹത്തിന്‍റെ ജന്മസ്ഥലമായ കാഞ്ചീപുരത്ത് (Kanchipuram) വച്ചായിരുന്നു പദ്ധതിയുടെ ഉദ്ഘാടനം. പ്രധാന ചടങ്ങിനുപുറമെ ഓരോ ജില്ലകളിലും സംസ്ഥാന മന്ത്രിമാരുടെ നേതൃത്വത്തില്‍ ഉദ്‌ഘാടന പരിപാടി സംഘടിപ്പിച്ചിരുന്നു (Kalaignar Magalir Urimai).
വാർഷിക വരുമാനം 2.5 ലക്ഷം രൂപയിൽ താഴെയുള്ള 1.06 കോടി സ്ത്രീകളാണ് പദ്ധതിയില്‍ ഗുണഭോക്താക്കളായിട്ടുള്ളത്. വീട്ടമ്മമാർക്ക് പരിപാടിയിൽവച്ച് എ ടി എം കാർഡുകള്‍ വിതരണം ചെയ്തു. ഉദ്ഘാടനം ഇന്നായിരുന്നെങ്കിലും കഴിഞ്ഞ ദിവസം തന്നെ ഗുണഭോക്താക്കള്‍ക്ക് ബാങ്ക് അക്കൗണ്ടിലൂടെ പണം കൈമാറിത്തുടങ്ങിയിരുന്നു.
വീട്ടമ്മമാര്‍ക്ക് പ്രതിമാസം നല്‍കുന്ന പണം സര്‍ക്കാര്‍ സഹായമല്ല, അവകാശമാണെന്ന പ്രഖ്യാപനത്തോടെയാണ് ഡി എം കെയുടെ തെരഞ്ഞെടുപ്പ് പ്രകടന പത്രികയിലെ വാഗ്ദാനമായിരുന്ന ‘കലൈഞ്ജര്‍ മഗളിര്‍ ഉറിമൈ’ പദ്ധതി നടപ്പാക്കുന്നത്. സര്‍ക്കാര്‍ അധികാരത്തിലേറി 2 വർഷത്തിനുശേഷമാണ് പദ്ധതിക്ക് തുടക്കം കുറിക്കാനായത്. തമിഴ്നാട് സർക്കാർ നടപ്പാക്കുന്ന ഏറ്റവും വലിയ ക്ഷേമ പദ്ധതിയായ ഇത് നടപ്പാക്കാൻ പ്രതിവർഷം 12,780 കോടി രൂപ വേണ്ടിവരും. ഇപ്പോള്‍ തന്നെ 12,000 കോടി രൂപ സർക്കാർ പദ്ധതിക്കുവേണ്ടി നീക്കിവച്ചിട്ടുണ്ട്.
കോടിക്കണക്കിനുപേർ ഗുണഭോക്താക്കളായുള്ളതിനാൽ സര്‍ക്കാര്‍ വലിയ മുന്നൊരുക്കങ്ങളാണ് പദ്ധതിക്കുവേണ്ടി നടത്തിയത്. ഗുണഭോക്താക്കളെ കണ്ടെത്താന്‍ സംസ്ഥാനത്തുടനീളം 2 ഘട്ട ക്യാമ്പുകളും സ്പെഷ്യല്‍ ക്യാംപും നടത്തി. പ്രത്യേകം തയാറാക്കിയ അപേക്ഷാഫോമിൽ വിവരങ്ങൾ ശേഖരിച്ച് അർഹതപ്പെട്ടവരാണെന്ന് ഉറപ്പാക്കുകയും ചെയ്തു. സർക്കാരിനുലഭിച്ച 1.63 കോടി അപേക്ഷകളില്‍ സൂക്ഷ്മ പരിശോധന നടത്തിയശേഷം അർഹരെന്ന് കണ്ടെത്തിയ 1.06 കോടി കുടുംബനാഥകൾക്കാണ് ആനുകൂല്യം ലഭിക്കുക. പദ്ധതിയുടെ ഗുണഭോക്താക്കളുടെ വാർഷിക കുടുംബ വരുമാനം 2.5 ലക്ഷം രൂപയിൽ താഴെയായിരിക്കണം. വാർഷിക വൈദ്യുതി ഉപയോഗം പരമാവധി 3,600 യൂണിറ്റുമായിരിക്കണം.
നേരത്തെ കര്‍ണാടകയും ഗൃഹലക്ഷ്മി എന്നപേരില്‍ സമാന പദ്ധതി നടപ്പാക്കിയിരുന്നു. സംസ്ഥാനത്തെ ഗൃഹനാഥകൾക്ക് 2000 രൂപ വീതം പ്രതിമാസം നൽകുന്ന ക്ഷേമ പദ്ധതിയാണ് കര്‍ണാടക നടപ്പാക്കിയത്. 1.1 കോടി വീട്ടമ്മമാരാണ് പദ്ധതിയുടെ ഗുണഭോക്താക്കള്‍. തെരഞ്ഞെടുപ്പ് വാഗ്ദാനമായി കോൺഗ്രസ് മുന്നോട്ടുവച്ച 5 ജനക്ഷേമ പദ്ധതികളിൽ ഒന്നായ ഗൃഹലക്ഷ്മിക്കായി ഈ സാമ്പത്തിക വർഷം 17,500 കോടി രൂപയാണ് നീക്കിവച്ചിരിക്കുന്നത്.
