ബാലസോര്‍ (ഒഡിഷ): 'കോറോമണ്ഡല്‍ എക്‌പ്രസിന്‍റെ എസ് അഞ്ച് കോച്ചിലായിരുന്നു ഞങ്ങള്‍. എന്താണ് യഥാര്‍ഥത്തില്‍ സംഭവിക്കുന്നത് എന്ന് ആദ്യം മനസിലായില്ല. പിന്നീടാണ് ട്രെയിന്‍ അപകടത്തില്‍ പെട്ടു എന്ന് വ്യക്തമായത്. ഭാഗ്യം കൊണ്ട് ഞങ്ങളുടെ കോച്ചില്‍ ഉണ്ടായിരുന്നവര്‍ക്ക് കാര്യമായ പരിക്കൊന്നും സംഭവിച്ചില്ല' -രാജ്യത്തെ നടുക്കിയ ബാലസോര്‍ ട്രെയിന്‍ അപകടത്തില്‍ നിന്ന് തലനാരിഴക്ക് രക്ഷപ്പെട്ട യാത്രക്കാരന്‍റെ വാക്കുകളാണിത്. സംഭവ സമയത്തെ അനുഭവം പറഞ്ഞ് അവസാനിപ്പിക്കുമ്പോഴും അയാളുടെ മുഖത്തെ അമ്പരപ്പ് വിട്ടുമാറിയിരുന്നില്ല.
കൊല്‍ക്കത്തയില്‍ നിന്ന് ചെന്നൈയിലേക്ക് പുറപ്പെട്ട പെയിന്‍റിങ് തൊഴിലാളികളില്‍ ഒരാളാണ് തന്‍റെ അനുഭവം പങ്കുവച്ചത്. ഷാലിമാർ-ചെന്നൈ സെൻട്രൽ കോറോമണ്ഡല്‍ എക്സ്പ്രസ് ട്രെയിനിന്‍റെ എസ് അഞ്ച് കോച്ചിലായിരുന്നു ഇവര്‍ യാത്ര ചെയ്‌തിരുന്നത്. ഈ കോച്ചിലെ യാത്രക്കാരെ അപകടം വലിയ തോതില്‍ ബാധിച്ചിട്ടില്ല എന്നാണ് യാത്രക്കാരന്‍ നല്‍കിയ വിവരം.
ട്രെയിനിന്‍റെ നിരവധി കോച്ചുകള്‍ പാളം തെറ്റി മറിയുന്നത് കണ്ടു എന്നും ആ നിമിഷം ഹൃദയം നിലയ്‌ക്കുന്നത് പോലെ തോന്നിയെന്നും യാത്രക്കാരന്‍ കൂട്ടിച്ചേര്‍ത്തു. വലിയ ശബ്‌ദം കേട്ടുവെന്നും കൂടെയുണ്ടായിരുന്ന യാത്രക്കാര്‍ ഭയന്ന് നിലവിളിച്ചു എന്നും അദ്ദേഹം പറഞ്ഞു. 'ഞങ്ങൾ ഇപ്പോൾ വീട്ടിലേക്ക് പോകുന്നു, ഞങ്ങൾ സുഖമായിരിക്കുന്നുവെന്ന് കുടുംബത്തെ അറിയിച്ചിട്ടുണ്ട്' -യാത്രക്കാരന്‍ കൂട്ടിച്ചേര്‍ത്തു.
ഇന്നലെ രാത്രി ആണ് രാജ്യത്തെ നടുക്കിയ ട്രെയിന്‍ ദുരന്തം ഉണ്ടായത്. ബാലസോറിലെ ബഹനാഗ സ്റ്റേഷന് സമീപമാണ് അപകടം നടന്നത്. പാളം തെറ്റി മറിഞ്ഞ ബെംഗളൂരു-ഹൗറ സൂപ്പർഫാസ്റ്റ് എക്സ്പ്രസ് ട്രെയിനില്‍ ഷാലിമാർ-ചെന്നൈ സെൻട്രൽ കോറോമണ്ഡല്‍ എക്സ്പ്രസ് ട്രെയിന്‍ വന്ന് ഇടിക്കുകയായിരുന്നു. ഇടിയുടെ ആഘാതത്തില്‍ കോറോമണ്ഡൽ എക്‌സ്‌പ്രസിന്‍റെ ബോഗികള്‍ നിര്‍ത്തിയിട്ടിരുന്ന ഗുഡ്‌സ് ട്രെയിനില്‍ പതിച്ചു. അപകടത്തില്‍ 233 പേര്‍ മരിച്ചു. 900ലധികം പേര്‍ക്ക് പരിക്കേറ്റതായാണ് റിപ്പോര്‍ട്ട്.
Also Read: ഒഡിഷ ട്രെയിൻ ദുരന്തം, രക്ഷപ്രവർത്തനത്തിന്‍റെ ആകാശദൃശ്യങ്ങൾ
സംഭവത്തില്‍ ഉന്നതതല അന്വേഷണത്തിന് ഉത്തരവിട്ടതായി കേന്ദ്ര റെയിൽവേ മന്ത്രി അശ്വനി വൈഷ്‌ണവ് അറിയിച്ചു. സംഭവത്തെക്കുറിച്ച് പ്രതികരിച്ച അദ്ദേഹം അപകടം നിർഭാഗ്യകരമാണെന്നും സംഭവത്തെക്കുറിച്ചുള്ള വാർത്ത തന്‍റെ മന്ത്രാലയത്തിൽ എത്തിയതിന് തൊട്ടുപിന്നാലെ തന്നെ രക്ഷാപ്രവർത്തനം ആരംഭിച്ചതായും പറഞ്ഞു. പാസഞ്ചർ ട്രെയിൻ കോച്ചുകൾ പാളം തെറ്റിയതിന്‍റെ കാരണം കണ്ടെത്താൻ അന്വേഷണത്തിന് ഉത്തരവിട്ടിട്ടുണ്ടെന്നും അദ്ദേഹം കൂട്ടിച്ചേര്‍ത്തു.
അതേസമയം രാഷ്‌ട്രപതി, പ്രധാനമന്ത്രി, മുഖ്യമന്ത്രിമാര്‍, രാഷ്‌ട്രീയ നേതാക്കള്‍, ലോക നേതാക്കള്‍, സിനിമ-കാലിക താരങ്ങള്‍ തുടങ്ങിയവര്‍ അപകടത്തില്‍ അനുശോചനം രേഖപ്പെടുത്തി. ഒഡിഷയിലെ ബാലസോറിലുണ്ടായ നിർഭാഗ്യകരമായ ട്രെയിൻ അപകടത്തിൽ വളരെ ദുഃഖമുണ്ടെന്നും തന്‍റെ ചിന്ത ദുഃഖിതരായ കുടുംബങ്ങൾക്ക് ഒപ്പമാണെന്നും രാഷ്‌ട്രപതി ദ്രൗപതി മുർമു ട്വിറ്ററിൽ കുറിച്ചു.
ഒഡിഷയിലെ ട്രെയിന്‍ അപകടം അങ്ങേയറ്റം ദുഃഖകരമാണെന്നും സംഭവസ്ഥലത്തെ സ്ഥിതിഗതികളെ കുറിച്ച് അന്വേഷിച്ചു എന്നും അപകടത്തില്‍ പരിക്കേറ്റവര്‍ വേഗം സുഖം പ്രാപിക്കട്ടെയെന്നും പ്രധാനമന്ത്രി നരേന്ദ്ര മോദിയും പ്രതികരിച്ചു.
Also Read: ഒഡിഷ ട്രെയിൻ ദുരന്തം; ഹെൽപ് ലൈൻ നമ്പറുകൾ അറിയാം, ദുഃഖം രേഖപ്പെടുത്തി പ്രമുഖര്‍
