ന്യൂഡൽഹി: ജഡ്‌ജിമാരുടെ ശമ്പളവും പെൻഷനും റിട്ടയർമെന്‍റ് ആനുകൂല്യങ്ങളും രണ്ടാം ജുഡീഷ്യൽ ശമ്പള കമ്മീഷൻ പ്രകാരമാണെന്ന് ഉറപ്പാക്കണമെന്ന് സുപ്രീം കോടതി. ഇതിനായി എല്ലാ ഹൈക്കോടതികളിലും ജഡ്‌ജിമാരുടെ രണ്ടംഗ പാനൽ രൂപീകരിക്കണമെന്നും കോടതി ശുപാർശ ചെയ്‌തു. ഈ വിഷയത്തിൽ വിധി തയ്യാറാണെന്നും ഉടൻ തന്നെ പ്രഖ്യാപിക്കുമെന്നും ചീഫ് ജസ്റ്റിസ് ഡി.വൈ.ചന്ദ്രചൂഡ് അധ്യക്ഷനായ ബഞ്ച് പറഞ്ഞു. ജസ്റ്റിസ് ജെ.ബി.പർദിവാല, ജസ്റ്റിസ് മനോജ് മിശ്ര എന്നിവർ കൂടി അടങ്ങിയതാണ് ബഞ്ച്. (Supreme Court on Implementation of SNJPC)
ജുഡീഷ്യൽ ഓഫീസർമാരുടെ ശമ്പള ഘടന, പെൻഷൻ, കുടുംബ പെൻഷൻ, അലവൻസുകൾ എന്നിവയെല്ലാം രണ്ടാം ജുഡീഷ്യൽ പേ കമ്മീഷൻ പരിഗണിച്ചിട്ടുണ്ട്. ജില്ലാ ജുഡീഷ്യറിയുടെ സേവന വ്യവസ്ഥകളുടെ വിഷയങ്ങൾ നിർണ്ണയിക്കാൻ ഒരു സ്ഥിരം സംവിധാനം സ്ഥാപിക്കുന്നതിനുള്ള നിർദേശവും കമ്മീഷൻ ശുപാർശ ചെയ്യുന്നു. (Second National Judicial Pay Commission)
ഹൈക്കോടതിയിൽ രൂപീകരിക്കുന്ന രണ്ടംഗ പാനലിലെ ഒരാൾ ജില്ലാ ജുഡീഷ്യറിയിൽ നിന്നുള്ളയാളാകുമെന്ന് ചീഫ് ജസ്റ്റിസ് വ്യക്തമാക്കി. ഇവർ വിരമിച്ച ജഡ്‌ജിമാരുടെ ശമ്പള കമ്മീഷനുമായി ബന്ധപ്പെട്ട പരാതികളും മറ്റ് പരാതികളും പരിഗണിക്കും. മുൻ ജില്ലാ ജഡ്‌ജി നോഡൽ ഓഫീസറായുള്ള പാനലിന്‍റെ എക്‌സ് ഒഫീഷ്യോ സെക്രട്ടറി ഹൈക്കോടതി രജിസ്ട്രാർ ജനറലായിരിക്കുമെന്നും അദ്ദേഹം പറഞ്ഞു. "ഹൈക്കോടതി ചീഫ് ജസ്റ്റിസ് നാമനിർദ്ദേശം ചെയ്യുന്ന ഏറ്റവും മുതിർന്ന ഹൈക്കോടതി ജഡ്‌ജി ആയിരിക്കും കമ്മിറ്റിയുടെ ചെയർപേഴ്‌സൺ. എസ്എൻജെപിസി ശരിയായി നടപ്പിലാക്കുന്നുണ്ടോ എന്ന് നിരീക്ഷിക്കലാണ് കമ്മിറ്റിയുടെ പ്രവർത്തനം." ചീഫ് ജസ്റ്റിസ് പറഞ്ഞു. (Two Judge Panel in All High Courts)
നിലവിലുള്ള ജഡ്‌ജിമാർക്കും വിരമിച്ചവർക്കും ആശുപത്രികളിൽ ക്യാഷ്‌ലെസ് സൗകര്യം ലഭ്യമാക്കണമെന്നും ബഞ്ച് ശുപാർശ ചെയ്‌തു. ജുഡീഷ്യൽ ഓഫീസർമാർക്ക് ക്യാഷ്‌ലെസ് ചികിത്സ നൽകാൻ ഉത്തർപ്രദേശിൽ എംപാനൽ ചെയ്‌ത ചില ആശുപത്രികൾ നിലവാരമില്ലാത്തതാണെന്ന വാദങ്ങളും ബെഞ്ച് പരിഗണിച്ചു. ഈ സാഹചര്യത്തിൽ കേന്ദ്ര സർക്കാരിന്‍റെ ഹെൽത്ത് സ്‌കീം പാനലിലുള്ള ആശുപത്രികളെ ജുഡീഷ്യൽ ഓഫീസർമാർക്ക് പണരഹിത ചികിത്സ നൽകുന്നതിനുള്ള എംപാനൽമെന്‍റിനായി പരിഗണിക്കാം. ജുഡീഷ്യൽ ഓഫീസർമാർക്ക് അവരുടെ സ്വന്തം ജില്ലയിലെ എംപാനൽ ചെയ്‌ത ആശുപത്രിയിൽ ഇല്ലാത്ത സൗകര്യങ്ങൾക്കായി മറ്റ് ജില്ലകളിലെ ആശുപത്രികളെ ആശ്രയിക്കാമെന്നും ചീഫ് ജസ്റ്റിസ് വ്യക്തമാക്കി.
ഹൈക്കോടതി കമ്മിറ്റികളോട് രണ്ടാം ജുഡീഷ്യൽ പേ കമ്മീഷൻ നടപ്പിലാക്കിയതിന്‍റെ റിപ്പോർട്ട് വരുന്ന ഏപ്രിൽ 7 ന് സമർപ്പിക്കണമെന്നും സുപ്രീം കോടതി നിർദേശിച്ചു. ജുഡീഷ്യൽ ഓഫീസർമാരുടെ ശമ്പളവും സേവന വ്യവസ്ഥകളും സംബന്ധിച്ച് ഓൾ ഇന്ത്യ ജഡ്‌ജസ് അസോസിയേഷൻ അടക്കമുള്ളവർ സമർപ്പിച്ച ഹർജി പരിഗണിക്കുകയായിരുന്നു കോടതി. ജുഡീഷ്യൽ പേ കമ്മീഷൻ ശുപാർശകൾ അനുസരിച്ച് ജില്ലാ കോടതി ജഡ്‌ജിമാരുടെ ശമ്പള കുടിശ്ശികയും മറ്റ് കുടിശ്ശികകളും തീർക്കാൻ വീഴ്‌ച വരുത്തിയ സംസ്ഥാനങ്ങൾക്കും കേന്ദ്ര ഭരണ പ്രദേശങ്ങൾക്കും നവംബർ 23 വരെ സുപ്രീം കോടതി സമയം അനുവദിച്ചിരുന്നു. ജുഡീഷ്യൽ ഓഫീസർമാർക്ക് മാന്യമായ തൊഴിൽ സാഹചര്യങ്ങൾ ഉണ്ടെന്ന് ഉറപ്പാക്കാൻ സംസ്ഥാനത്തിന് ബാധ്യതയുണ്ടെന്നും, വിരമിച്ചതിന് ശേഷം അവർക്ക് മാനുഷികമായ അന്തസ്സ് നിഷേധിക്കാൻ കഴിയില്ലെന്നും ബെഞ്ച് പറഞ്ഞിരുന്നു.
