വിജയവാഡ (ആന്ധ്രപ്രദേശ്): നഗരസഭയിലെ സ്വിമ്മിങ് പൂളില്‍ നിന്നും ക്ലോറിന്‍ വാതകം ചോര്‍ന്നതിനെ തുടര്‍ന്ന് പത്തിലധികം വിദ്യാര്‍ഥികള്‍ ആശുപത്രിയില്‍. ആന്ധാപ്രദേശിലെ വിജവാഡയില്‍ ബുധനാഴ്‌ച (ഡിസംബര്‍ 7) ആയിരുന്നു സംഭവം. ഡിസംബര്‍ 11ന് എളൂരുവില്‍ വച്ച് നടക്കാനിരിക്കുന്ന നീന്തല്‍ മത്സരത്തിന്‍റെ പരിശീലനത്തിനിടെയാണ് വാതകം ചോര്‍ന്നതെന്ന് സ്വിമ്മിങ് പൂള്‍ അക്കാദമിയിലെ സൂപ്പര്‍വൈസര്‍ പറഞ്ഞു.
സംഭവ ദിവസം രാത്രി 8.30ഓടെ തങ്ങള്‍ക്ക് മത്സരമുണ്ടെന്നും അതിനായുള്ള പരിശീലനത്തിനായി സ്വിമ്മിങ് പൂള്‍ അനുവദിക്കണമെന്നും ആവശ്യപ്പെട്ട് കുറച്ച് ഹൈസ്‌ക്കൂള്‍ വിദ്യാര്‍ഥികള്‍ തന്നെ സമീപിച്ചിരുന്നുവെന്ന് സൂപ്പര്‍വൈസര്‍ അറിയിച്ചു. നീന്താന്‍ മുന്‍സിപ്പല്‍ കമ്മിഷന്‍റെ അനുവാദം ആവശ്യമാണന്ന് പറഞ്ഞപ്പോള്‍ തങ്ങള്‍ അനുവാദവുമായാണ് എത്തിയിരിക്കുന്നതെന്ന് അവര്‍ മറുപടി നല്‍കി. തുടര്‍ന്ന് വിദ്യാര്‍ഥികള്‍ക്ക് പരിശീലനത്തിനായി നീന്തല്‍കുളം അനുവദിക്കുകയായിരുന്നുവെന്ന് അദ്ദേഹം വ്യക്തമാക്കി.
അബോധാവസ്ഥയിലായ കുട്ടികളെ ഉടന്‍ തന്നെ അടുത്തുള്ള സര്‍ക്കാര്‍ ആശുപത്രിയില്‍ പ്രവേശിപ്പിച്ചു. ഗുരുതരാവസ്ഥയിലായ ഒരു കുട്ടിയെ സ്വകാര്യ ആശുപത്രിയിലേക്കും പിന്നീട് ഭേദമായപ്പോള്‍ സര്‍ക്കാര്‍ ആശുപത്രിയിലും പ്രവേശിപ്പിച്ചു. നിലവില്‍ എല്ലാ കുട്ടികളുടെയും നില മെച്ചപ്പെട്ടുവെന്ന് ആശുപത്രി അധികൃതര്‍ അറിയിച്ചു.
ക്ലോറിൻ സംവിധാനത്തിന്‍റെ അറ്റകുറ്റപ്പണിയും പരിപാലനവും ശരിയായ വിധം നടക്കാത്തതാണ് അപകടത്തിന് കാരണമെന്ന് രക്ഷിതാക്കൾ ആരോപിക്കുന്നു. കുട്ടികള്‍ക്ക് പുറമെ ഒരു ജീവനക്കാരനും അപകടം സംഭവിച്ചിട്ടുണ്ട്. സംഭവത്തിന്‍റെ സത്യാവസ്ഥയെക്കുറിച്ച് ഉന്നത അധികാരികളെ അറിയിച്ചിട്ടുണ്ടെന്നും അവര്‍ രക്ഷിതാക്കളോട് സംസാരിച്ചുവെന്നും മേല്‍നോട്ടക്കാരന്‍ പറഞ്ഞു.
