ഭുവനേശ്വര്‍ : സ്വവര്‍ഗാനുരാഗികളെ (Homosexuals) തമ്മില്‍ ഗേ ഡേറ്റിങ് ആപ്പുകള്‍ (Gay Dating Apps) വഴി ബന്ധിപ്പിച്ച് പണം തട്ടിയിരുന്ന പ്രായപൂര്‍ത്തിയാവാത്ത ആണ്‍കുട്ടികള്‍ ഉള്‍പ്പടെ അഞ്ചുപേര്‍ പിടിയില്‍. പണത്തിനും വിലകൂടിയ മൊബൈല്‍ഫോണുകള്‍ക്കുമായി സ്വവര്‍ഗാനുരാഗവും സ്വവര്‍ഗരതിയും പ്രോത്സാഹിപ്പിച്ച് യുവാക്കളെ വലയിലാക്കിയിരുന്ന സംഘത്തെ ഭുവനേശ്വറിലെ കമ്മിഷണറേറ്റ് പൊലീസാണ് (Bhubaneswar Commissionarate Police) പിടികൂടിയത്. കസ്‌റ്റഡിയിലെടുത്ത് കോടതിയില്‍ ഹാജരാക്കിയ കുറ്റവാളികളില്‍ ഒരാളെ അറസ്‌റ്റ് ചെയ്യുകയും പ്രായപൂര്‍ത്തിയാവാത്ത മറ്റ് നാലുപേരെ ജുവനൈല്‍ ഹോമിലേക്ക് (Juvenile Home) മാറ്റുകയും ചെയ്‌തു.
തട്ടിപ്പ് ഇങ്ങനെ : സ്വവര്‍ഗാനുരാഗികളായ യുവാക്കളെയായിരുന്നു സംഘം ലക്ഷ്യം വച്ചിരുന്നത്. ഇവരെ ഗേ ഡേറ്റിങ് ആപ്പുകള്‍ ഉപയോഗിച്ച് സൗഹൃദപരമായ ചാറ്റുകളിലൂടെയാണ് സംഘം പരസ്‌പരം പരിചയപ്പെടുത്തിയിരുന്നത്. തുടര്‍ന്ന് ഇവരെ ശാരീരിക ബന്ധത്തിലേര്‍പ്പെടുന്നതിനായി അജ്ഞാതമായ സ്ഥലത്തേക്ക് വിളിച്ചുവരുത്തിയായിരുന്നു കെണിയിലാക്കിയിരുന്നത്. അറസ്‌റ്റിലായ പ്രതിയും മറ്റ് നാല് പ്രായപൂര്‍ത്തിയാകാത്ത ചെറുപ്പക്കാരും ചേര്‍ന്നാണ് ഈ സംഘം രൂപീകരിച്ചതെന്ന് ഭുവനേശ്വര്‍ സോണ്‍ 2 എസിപി ഗിരിജ ചക്രബര്‍ത്തി അറിയിച്ചു (Sextortion Through Gay Dating Apps).
പണവും ആഡംബരവും : പുതിയ വാഹനങ്ങള്‍ ഓടിക്കുന്നതിലും പുത്തന്‍ മൊബൈല്‍ഫോണുകള്‍ കൈവശം വയ്‌ക്കുന്നതിലുമാണ് ഇവര്‍ക്ക് താല്‍പര്യമുണ്ടായിരുന്നത്. ഇതിനായി പ്രായപൂര്‍ത്തിയാവാത്ത കോളജ് വിദ്യാര്‍ഥികളായ ഇവര്‍ ഫ്രണ്ട്‌ഷിപ്പ് ആപ്പുകളിലും ഗേ ഡേറ്റിങ് ആപ്പുകളിലും ഐഡികള്‍ നിര്‍മിക്കുകയായിരുന്നു. തുടര്‍ന്ന് ഇതുവഴി മെസേജുകളിലൂടെ നിരവധി യുവാക്കളുമായി ചങ്ങാത്തം സ്ഥാപിക്കുകയായിരുന്നുവെന്നും തട്ടിപ്പിനിരയായവരെല്ലാം തന്നെ സ്വവര്‍ഗാനുരാഗികളായിരുന്നുവെന്നും എസിപി ഗിരിജ ചക്രബര്‍ത്തി അറിയിച്ചു.
പിന്നീട് ഇവരില്‍ തന്നെ ശാരീരിക ബന്ധത്തിലേര്‍പ്പെടാന്‍ താല്‍പര്യം പ്രകടിപ്പിക്കുന്നവരെ ലിംഗരാജ്‌ താന എന്ന പ്രദേശത്തെ മുന്‍കൂട്ടി നിശ്ചയിച്ച സ്ഥലത്തേക്ക് ക്ഷണിച്ചുവരുത്തും. തുടര്‍ന്ന് ഇവിടെ നടക്കുന്ന സംഭവങ്ങള്‍ വീഡിയോ ആയി ഷൂട്ട് ചെയ്‌ത് ഇതുകാണിച്ച് യുവാക്കളെ ഭീഷണിപ്പെടുത്തി പണം തട്ടുകയായിരുന്നുവെന്നും അദ്ദേഹം വ്യക്തമാക്കി.
അന്വേഷണവുമായി പൊലീസ് : കുറ്റകൃത്യത്തില്‍ ഗഞ്ചം ജില്ല സ്വദേശിയായ മനോജ് ഡോറയാണ് മുഖ്യപ്രതി. സംഭവത്തെ കുറിച്ചുള്ള കൂടുതല്‍ തെളിവുകള്‍ക്കായി ഭുവനേശ്വറിലെ സമന്ത്രപൂർ ലക്ഷ്മി മണ്ഡപിന് സമീപത്തുള്ള പ്രതിയുടെ വീട്ടില്‍ നിന്നും നിരവധി മൊബൈൽ ഫോണുകളും മോട്ടോർ സൈക്കിളുകളും പൊലീസ് പിടിച്ചെടുത്തിട്ടുണ്ട്. തട്ടിപ്പിനിരയായവരില്‍ നിന്നായി ഒരു ലക്ഷത്തി പതിനായിരം രൂപ പ്രതികൾ തട്ടിയെടുത്തതായും, നിലവില്‍ പ്രതിയിൽ നിന്ന് 34,000 രൂപയും ഐഫോണും ബൈക്കും ഉൾപ്പടെ പിടിച്ചെടുത്തതായും പൊലീസ് അറിയിച്ചു.
മാത്രമല്ല ഇയാള്‍ക്കെതിരെ ലിംഗരാജ്‌ പൊലീസ് സ്‌റ്റേഷനില്‍ നാല് കേസുകള്‍ രജിസ്‌റ്റര്‍ ചെയ്‌തിട്ടുള്ളതായും എത്രപേരെ സംഘം ലക്ഷ്യംവച്ചിരുന്നുവെന്ന് അന്വേഷിക്കുന്നതായും ഇവര്‍ വ്യക്തമാക്കി. അതേസമയം കഴിഞ്ഞദിവസവും കുറ്റവാളികള്‍ തട്ടിപ്പിനിരയായിരുന്നവരില്‍ നിന്നും ഓണ്‍ലൈന്‍ പേയ്‌മെന്‍റ് ആപ്പായ ഫോണ്‍പേ വഴി പണം വാങ്ങിയിരുന്നു. മാത്രമല്ല ക്രൂരമായി മര്‍ദിച്ച ശേഷം ബാങ്ക് അക്കൗണ്ടില്‍ നിന്ന് പണം പിന്‍വലിക്കുകയും ചെയ്‌തിരുന്നു. ഈ സംഭവത്തില്‍ ഭുവനേശ്വറിലെ ഖോധ്രയില്‍ നിന്നുള്ള ഒരാള്‍ രേഖാമൂലം പരാതി നല്‍കിയതിനെ തുടര്‍ന്നാണ് തട്ടിപ്പ് സംഘം പിടിയിലാകുന്നത്.
