സെക്കന്തരാബാദ് : ഇൻകം ടാക്‌സ് ഉദ്യോഗസ്ഥർ എന്ന വ്യാജേന ജ്വല്ലറിയിൽ നിന്ന് 1.7 കിലോഗ്രാം സ്വർണം മോഷ്‌ടിച്ച എട്ടംഗ സംഘത്തിലെ നാല് പേർ പിടിയിൽ. തെലങ്കാന - സെക്കന്തരബാദിലെ മോണ്ട മാർക്കറ്റിലാണ് സംഭവം.സക്കീർ, റഹീം, പ്രവീൺ, അക്ഷയ് എന്നിവരാണ് പൊലീസ് പിടിയിലായത്.
കവർച്ചയിൽ പങ്കുള്ള മറ്റ് നാല് പേർക്കായി തെരച്ചിൽ തുടരുകയാണെന്ന് പൊലീസ് അറിയിച്ചു. മോഷണം നടത്തിയ ശേഷം പ്രതികൾ മഹാരാഷ്‌ട്രയിലേക്ക് രക്ഷപ്പെട്ടിരുന്നു. തുടർന്ന് പൊലീസ് നടത്തിയ അന്വേഷണത്തിൽ നാല് പേരെ മഹാരാഷ്‌ട്രയിൽ എത്തി പിടികൂടുകയായിരുന്നു.
അറസ്റ്റിലായ പ്രതികളെ ഇപ്പോൾ ടാസ്‌ക് ഫോഴ്‌സ് ഓഫിസിൽ ചോദ്യം ചെയ്‌തുവരികയാണെന്നും പൊലീസ് അറിയിച്ചു. മെയ് 27നായിരുന്നു കവർച്ച. ഇൻകം ടാക്‌സ് ഉദ്യോഗസ്ഥർ എന്ന വ്യാജേന ജ്വല്ലറിയിൽ എത്തിയ സംഘം സ്വർണവുമായി കടന്നുകളയുകയായിരുന്നു. ഹൈദരാബാദിലെ പട്‌നി സെന്‍ററിൽ സ്ഥിതി ചെയ്യുന്ന ലോഡ്‌ജിൽ താമസിച്ചാണ് കവർച്ച നടത്തിയത്. ലോഡ്‌ജിൽ നിന്ന് 750 മീറ്റർ അകലെയാണ് മോഷണം നടന്ന സ്വർണക്കട.
ഇൻകം ടാക്‌സ് റെയ്‌ഡ് എന്ന് വിശ്വസിപ്പിച്ച് കവർച്ച : മെയ് 27-ന് രാവിലെ ഇൻകം ടാക്‌സ് ഓഫിസർമാരാണെന്ന വ്യാജേന ജ്വല്ലറിയിലെത്തിയ സംഘം കടയിൽ സാമ്പത്തിക ക്രമക്കേട് നടക്കുന്നുണ്ടെന്നും റെയ്‌ഡ് നടത്തണമെന്നും പറഞ്ഞ് ജീവനക്കാരെ പുറത്തിറക്കി. തുടർന്ന് നികുതി അടയ്ക്കുന്നില്ലെന്ന് ആരോപിച്ച് 1.7 കിലോഗ്രാം സ്വർണ ബിസ്‌കറ്റുകൾ എടുത്തുകൊണ്ടുപോവുകയായിരുന്നു. എന്നാൽ, സംഭവത്തിൽ സമീപത്തെ കച്ചവടക്കാർ സംശയം പ്രകടിപ്പിച്ചതോടെ ജ്വല്ലറി ഉടമ പൊലീസിൽ പരാതിപ്പെട്ടു. പൊലീസ് എത്തി സിസിടിവി ദൃശ്യങ്ങൾ കേന്ദ്രീകരിച്ച് അന്വേഷണം ആരംഭിച്ചു.
കവർച്ച ആസൂത്രിതം : മെയ് 24 മുതൽ 27 വരെ പട്‌നി സെന്‍ററിൽ സ്ഥിതി ചെയ്യുന്ന ലോഡ്‌ജിൽ താമസിച്ച് ആസൂത്രണം ചെയ്‌താണ് പ്രതികൾ കവർച്ച നടത്തിയത്. മെയ് 24ന് രാവിലെ 7.30ഓടെ നാല് പേർ അടങ്ങുന്ന സംഘം ആദ്യം ഈ ഹോട്ടലിലേക്ക് എത്തി. പിന്നീട് രണ്ടാമത്തെ സംഘം വൈകിട്ട് 3.30ന് എത്തി ഇതേ ഹോട്ടലിൽ മറ്റൊരു മുറി എടുത്തു. ഹോട്ടൽ ജീവനക്കാർക്ക് സംശയം തോന്നാതിരിക്കാൻ ഇരു സംഘങ്ങളും പരസ്‌പരം പരിചയമില്ലാത്ത രീതിയിലാണ് പെരുമാറിയത്.
ഹോട്ടലിൽ മുറി എടുക്കുന്നതിന് സംഘത്തിലെ ഒരാൾ ആധാർ കാർഡിന്‍റെ കോപ്പി നൽകണമെന്ന് ഹോട്ടൽ മാനേജർ ആവശ്യപ്പെട്ടിരുന്നു. എന്നാൽ ആധാർ കാർഡിന്‍റെ കോപ്പി കൈയിൽ ഇല്ലെന്നും മൊബൈലിൽ പകർപ്പ് ഉണ്ടെന്നും അത് വാട്‌സ്ആപ്പ് ചെയ്യാമെന്നുമായിരുന്നു ഇരു സംഘങ്ങളും ഹോട്ടൽ മാനേജരോട് പറഞ്ഞത്.
'ഡിലീറ്റ് ഫോർ എവരിവൺ' വരുത്തിയ വിന : കവർച്ചയ്‌ക്ക് ശേഷം ഹോട്ടലിൽ തിരികെയത്തിയ പ്രതികൾ രാവിലെ 10.30-ഓടെ പണം അടച്ച് മുറി ഒഴിഞ്ഞ് മഹാരാഷ്‌ട്രയിലേക്ക് രക്ഷപ്പെട്ടു. എന്നാൽ പൊലീസ് അന്വേഷണത്തിൽ പ്രതികൾ താമസിച്ച ലോഡ്‌ജ് കണ്ടെത്തുകയും മാനേജരോട് യുവാക്കളുടെ വിശദാംശങ്ങൾ നൽകാൻ ആവശ്യപ്പെടുകയും ചെയ്‌തു. വാട്‌സ്ആപ്പിൽ, ആധാർ കാർഡിന്‍റെ പകർപ്പുകള്‍ക്കായി തെരഞ്ഞപ്പോഴാണ് അമളി മനസിലായത്.
ലോഡ്‌ജ് ഒഴിയുന്നതിന് മുൻപേ തന്നെ യുവാക്കൾ അത് ഡിലീറ്റ് ഫോർ എവരിവൺ ഒപ്ഷൻ ഉപയോഗിച്ച് നീക്കിയിരുന്നു. പിന്നീട് പൊലീസ് നടത്തിയ അന്വേഷണത്തിലാണ് സംഘത്തിലെ നാല് പേരെ മഹാരാഷ്‌ട്രയിൽ നിന്ന് പിടികൂടിയത്.
