ന്യൂഡല്‍ഹി: രാജ്യത്തെ 257 പൊലീസ് സ്റ്റേഷനുകള്‍ക്ക് സ്വന്തമായി വാഹനങ്ങളില്ലെന്നും 638 സ്റ്റേഷനുകളില്‍ ടെലഫോണുകള്‍ ഇല്ലെന്നും പാര്‍ലമെന്‍ററി സ്റ്റാൻഡിങ് കമ്മിറ്റി റിപ്പോര്‍ട്ട്. രാജ്യത്ത് 16,833 പൊലീസ് സ്‌റ്റേഷനുകളാണുള്ളത്. 143 പൊലീസ് സ്റ്റേഷനുകളില്‍ വയര്‍ലെസോ മൊബൈലോ ഇല്ലെന്നും റിപ്പോര്‍ട്ടിലുണ്ട്.
കോണ്‍ഗ്രസ് നേതാവ് ആനന്ദ് ശര്‍മ ഉള്‍പ്പെട്ട സംഘമാണ് റിപ്പോര്‍ട്ട് സമര്‍പ്പിച്ചത്. ആധുനിക പൊലീസിങ്ങിന് ശക്തമായ ആശയവിനിമയ പിന്തുണയും അത്യാധുനിക ആയുധങ്ങളും വേഗത്തിലുള്ള പ്രതികരണത്തിന് പ്രത്യേക സംവിധാനങ്ങളും വേണമെന്നും കമ്മിറ്റി റിപ്പോര്‍ട്ടില്‍ ആവശ്യപ്പെട്ടു.
അരുണാചൽ പ്രദേശ്, ഒഡിഷ, പഞ്ചാബ് തുടങ്ങിയ സംസ്ഥാനങ്ങളിലാണ് ഇത്തരം പൊലീസ് സ്റ്റേഷനുകള്‍ കൂടുതലുള്ളത്. ജമ്മു കശ്മീർ പോലെയുള്ള വളരെ സെൻസിറ്റീവ് അതിർത്തി പൊലീസ് സ്റ്റേഷനുകളിലും ഇത്തരം പ്രശ്നങ്ങളുണ്ടെന്നും കമ്മിറ്റി അറിയിച്ചു.
Also Read: വാഹനത്തിൽ ഇടിച്ചു; ബസില്‍ കയറി ഡ്രൈവർക്ക് യുവതിയുടെ മർദ്ദനം
ഇത്തരം പൊലീസ് സ്റ്റേഷനുകളില്‍ കൂടുതല്‍ സംവിധാനങ്ങള്‍ ഒരുക്കാന്‍ അതത് സംസ്ഥാനങ്ങളോട് ആവശ്യപ്പെടുമെന്നും ആഭ്യന്തര മന്ത്രാലയത്തോട് കമ്മിറ്റി നിര്‍ദ്ദേശിച്ചു. പല സംസ്ഥാനങ്ങളിലും സേനക്കായി ആയുധങ്ങള്‍ നിര്‍മിക്കുന്നത് അടക്കമുള്ള കാര്യങ്ങളില്‍ പരിമിതിയുണ്ട്. മാത്രമല്ല സംസ്ഥാനങ്ങളില്‍ മാരകമല്ലാത്ത ആയുധങ്ങള്‍ നിര്‍മിക്കുന്നതിനുള്ള ഫാക്ടറികള്‍ തുടങ്ങാന്‍ കേന്ദ്രസര്‍ക്കാര്‍ തയ്യാറാകണമെന്നും റിപ്പോര്‍ട്ട് ശുപാര്‍ശ ചെയ്തു.
പൊലീസുകാര്‍ക്കുള്ള സുരക്ഷ കവചങ്ങളും പ്രശ്ന ബാധിത മേഖലളില്‍ ഉപയോഗിക്കാനുള്ള മാരകമല്ലാത്ത ആയുധങ്ങളും വാങ്ങുന്നതിന് കൂടുതല്‍ തുക വകയിരുത്താന്‍ കേന്ദ്ര മന്ത്രാലയം അനുമതി നല്‍കണമെന്നും റിപ്പോര്‍ട്ട് ആവശ്യപ്പെട്ടിട്ടുണ്ട്.
