പ്രഖ്യാപനം മുതല്‍ ആരാധക ശ്രദ്ധ നേടിയ ചിത്രമാണ് 'വൃഷഭ' Vrushabha. എല്ലാ തലമുറകളിലും ആവേശം നിറയ്‌ക്കുന്ന ആക്ഷന്‍ എന്‍റര്‍ടെയിനറാണ് മോഹന്‍ലാല്‍ Mohanlal നായകനായി എത്തുന്ന തെലുഗു - മലയാളം ചിത്രം 'വൃഷഭ'. ഇപ്പോഴിതാ സിനിമയുമായി ബന്ധപ്പെട്ട് പുതിയൊരു അപ്‌ഡേറ്റ് പുറത്തുവിട്ടിരിക്കുകയാണ് അണിയറപ്രവര്‍ത്തകര്‍.
ചിത്രത്തില്‍ മോഹന്‍ലാലിന്‍റെ മകനായി എത്തുന്നത് തെലുഗു താരം റോഷന്‍ മെക ആണ്. മോഹന്‍ലാലിനൊപ്പം അഭിനയിക്കാന്‍ അവസരം ലഭിച്ചതിന്‍റെ ആവേശത്തിലാണ് റോഷന്‍ മെക. 'മോഹൻലാൽ സാറുമായി സ്‌ക്രീൻ സ്‌പേസ് ഷെയർ ചെയ്യാൻ കഴിയുന്നത് തന്നെ ഭാഗ്യമായികാണുന്നു. ഒരു ചലഞ്ചിംഗ് വേഷമാണ്, എന്നാൽ കൂടിയും നന്ദ കുമാർ സാറിന്‍റെ വിഷൻ അനുസരിച്ച് പ്രയത്നിക്കാൻ തയ്യാറാണ്. ഈ വലിയ സിനിമയുടെ ഭാഗമാകാൻ കഴിഞ്ഞതിൽ അഭിമാനിക്കുന്നു' - റോഷന്‍ മെക പറഞ്ഞു.
2024ലെ തന്നെ ഏറ്റവും വലിയ ചിത്രമായിട്ടാണ് 'വൃഷഭ' അണിയറയിൽ ഒരുങ്ങുന്നത്. അച്ഛനും മകനും ചേരുന്ന നാടകീയമായ കഥയാണ് 'വൃഷഭ' പറയുന്നത്. സിനിമയ്‌ക്കായി കണക്‌ട് മീഡിയ, എവിഎസ് സ്‌റ്റുഡിയോ എന്നിവരുമായി ബാലാജി ടെലിഫിലിംസ് സഹകരിക്കുന്നു.
സിനിമയെ കുറിച്ച് നിര്‍മാതാക്കളും പ്രതികരിക്കുന്നുണ്ട്. എവിഎസ് സ്‌റ്റുഡിയോസിന്‍റെ അഭിഷോക് വ്യാസ് 'വൃഷഭ'യെ കുറിച്ച് പറയുന്നത് ഇങ്ങനെ - 'എല്ലാ ആരാധകർക്കും ഇഷ്‌ടപ്പെടുന്ന തരത്തിലാണ് കാസ്‌റ്റിംഗ് നടത്തിയിരിക്കുന്നത്. റോഷൻ വളരെ അധികം കഴിവുള്ള വ്യക്തിയാണ്. ചിത്രത്തിലെ പ്രധാനപ്പെട്ട ഈ കഥാപാത്രത്തെ റോഷൻ ഗംഭീരമാക്കുമെന്ന ഉറപ്പുണ്ട്. അദ്ദേഹം ചിത്രത്തിലേക്ക് എത്തുന്നത് വളരെ സന്തോഷത്തോടെയാണ് കാണുന്നത്. മറ്റ് അഭിനേതാക്കളുടെ വിവരങ്ങൾ ഉടനടി പുറത്ത് വിടുന്നതായിരിക്കും' - അഭിഷോക് വ്യാസ് പറഞ്ഞു.
'വൃഷഭ'യിലേക്ക് റോഷനെ തെരഞ്ഞെടുക്കാനുള്ള കാരണം വ്യക്തമാക്കുകയാണ് സംവിധായകന്‍ നന്ദ കിഷോര്‍. 'ഞാൻ റോഷനെ കണ്ട നിമിഷം തന്നെ മോഹൻലാലിന്‍റെ മകനായി അഭിനയിക്കാൻ പോകുന്നത് ഇദ്ദേഹമാണെന്ന് മനസ്സിൽ ഉറപ്പിച്ചു. റോഷന്‍റെ മുൻപത്തെ ചിത്രങ്ങൾ ഞാൻ കണ്ടിട്ടുണ്ട്. അദ്ദേഹത്തിന്‍റെ അഭിനയ മികവ് കണ്ട് ഞാൻ ഞെട്ടിയിട്ടുണ്ട്. ചിത്രത്തിൽ റോഷന്‍റെ സാന്നിധ്യം വലിയ സംഭാവനയായിരിക്കുമെന്ന് പ്രതീക്ഷിക്കുന്നു' -നന്ദ കിഷോര്‍ പറഞ്ഞു.
സിനിമയില്‍ ഗായിക സഹ്‌റ എസ് ഖാനും Zahrah S Khan അഭിനയിക്കുന്നുണ്ട്. ചിത്രത്തില്‍ യോദ്ധാക്കളുടെ രാജകുമാരി ആയാണ് സഹ്‌റ എസ് ഖാന്‍ എത്തുന്നത്. ഇമോഷൻസ് കൊണ്ടും വിഎഫ്എക്‌സ്‌ കൊണ്ടും മികച്ച ദൃശ്യാനുഭവമാകും 'വൃഷഭ' പ്രേക്ഷകർക്ക് സമ്മാനിക്കുക. ഈ മാസം അവസാനത്തോടുകൂടി ചിത്രീകരണം ആരംഭിക്കുന്ന സിനിമ 2024ല്‍ തിയേറ്ററുകളില്‍ എത്തും. മലയാളം, തമിഴ്, തെലുഗു, കന്നട, ഹിന്ദി എന്നീ ഭാഷകളിലായി 4500 ഓളം സ്‌ക്രീനുകളിലാണ് 'വൃഷഭ' റിലീസിനെത്തുന്നത്.
Also Read: vrushabha| മോഹന്‍ലാല്‍ ചിത്രത്തില്‍ യോദ്ധാക്കളുടെ രാജകുമാരി ആയി ഗായിക സഹ്‌റ എസ് ഖാനും
എവിഎസ് സ്‌റ്റുഡിയോസിന്‍റെ ബാനറിൽ അഭിഷേക് വ്യാസ്, ഫസ്‌റ്റ് സ്‌റ്റെപ് മൂവീസിന്‍റെ ബാനറിൽ വിശാൽ ഗുർനാനി, ശ്യാം സുന്ദർ, ജൂറി പരേഖ് മെഹ്ത, ബാലാജി ടെലിഫിലിംസിന്‍റെ ബാനറിൽ ഏക്ത കപൂർ, ശോഭ കപൂർ, കണക്‌ട് മീഡിയയുടെ ബാനറിൽ വരുണ്‍ മാതുർ എന്നിവർ ചേര്‍ന്നാണ് ചിത്രം നിർമിക്കുക. പിആർഒ - ശബരി.
