ഛണ്ഡീഗഡ്: പഞ്ചാബ് സർക്കാരിനെതിരെ രൂക്ഷ വിമർശനവുമായി കേന്ദ്ര മന്ത്രി ഹർദീപ് സിംഗ് പുരി. കൊവിഡ് സാഹചര്യത്തിൽ ഏറ്റവുമധികം സഹായം ലഭിച്ചിട്ടുള്ളത് പഞ്ചാബിനാണന്നും അദ്ദേഹം പറഞ്ഞു.
സ്വകാര്യ ആശുപത്രികളിൽ കൊവിഡ് വാക്സിൻ വിൽക്കുന്നതിലൂടെ കോൺഗ്രസ് സർക്കാർ ലാഭമുണ്ടാക്കുന്നുവെന്നും കേന്ദ്രമന്ത്രി ഹർദീപ് സിംഗ് പുരി ആരോപിച്ചു. പ്രധാനമന്ത്രി കെയർസ് പ്രകാരം പഞ്ചാബിനായി 41 ഓക്സിജൻ പ്ലാന്റുകൾ അനുവദിച്ചതായി അറിയിച്ചു. അസമിനേക്കാളും ഉത്തർപ്രദേശിനേക്കാളും കൂടുതൽ റിംഡെസിവർ പഞ്ചാബിന് കേന്ദ്രസർക്കാർ നൽകിയിട്ടുണ്ടെന്നും ഹർദീപ് സിംഗ് പുരി പറഞ്ഞു.
പ്രധാനമന്ത്രി പഞ്ചാബിനായി നിരവധി കാര്യങ്ങൾ ചെയ്തിട്ടുണ്ട്. നേരത്തെ അനുവദിച്ച 14ഓക്സിജൻ പ്ലാന്റുകൾ കൂടാതെ 41 ഓക്സിജൻ പ്ലാന്റുകൾ കൂടി സ്ഥാപിക്കാൻ പിഎം കെയയർസിൽ നിന്നും പണം അനുവദിച്ചിട്ടുണ്ടെന്നും അദ്ദേഹം പറഞ്ഞു.
സർക്കാരിനെതിരെ കേന്ദ്രം
"വാക്സിൻ വിതരണത്തിൽ കേന്ദ്ര സർക്കാർ പക്ഷപാതപരമായി പെരുമാറുന്നുവെന്ന് പഞ്ചാബ് സർക്കാർ ആരോപിച്ചിരുന്നു. എന്നാൽ അസം, ഉത്തർ പ്രദേശ് എന്നീ സംസ്ഥാനങ്ങളെക്കാൾ പരിഗണന കേന്ദ്രം പഞ്ചാബിന് നൽകിയിട്ടുണ്ട്. പഞ്ചാബിലെ ജനസംഖ്യയേക്കാൾ കൂടുതൽ റെംഡെസിവിർ കേന്ദ്രം അനുവദിച്ചിട്ടുണ്ട്", കേന്ദ്രമന്ത്രി പറഞ്ഞു.
സമാന ജനസംഖ്യയുള്ള അസമിൽ ആയിരം ജനസംഖ്യയ്ക്ക് 323 റെംഡെസിവിർ ആണ് ലഭിച്ചത്. പഞ്ചാബിന് ഇത് 623 എന്ന കണക്കിലാണ് ലഭിച്ചത്. ആയിരം ജനസംഖ്യയിൽ 264 റെംഡെസിവിർ മരുന്നുകളാണ് ഉത്തർപ്രദേശിൽ ലഭിച്ചതെന്നും പുരി വ്യക്തമാക്കി.
