ഭുവനേശ്വര്‍ : വിമാനത്താവളത്തില്‍ നിന്നും പുറപ്പെട്ട് നിമിഷങ്ങള്‍ക്കകം സാങ്കേതിക തകരാറിനെ തുടര്‍ന്ന് പൂനെ എയര്‍ ഏഷ്യ വിമാനം ബിജു പട്‌നായിക് അന്താരാഷ്‌ട്ര വിമാനത്താവളത്തില്‍ അടിയന്തരമായി ഇറക്കി. ഭുവനേശ്വറില്‍ നിന്ന് പുറപ്പെട്ട വിമാനം പക്ഷിയെ ഇടിച്ചതിനെ തുടര്‍ന്നുണ്ടായ സാങ്കേതിക തകരാറാണ് അടിയന്തരമായി ഇറക്കാന്‍ കാരണമായത്. വിമാനത്തിലുണ്ടായിരുന്ന യാത്രക്കാര്‍ സുരക്ഷിതരാണെന്നും തകരാറുകള്‍ പരിഹരിച്ച ശേഷം ഉടനടി സ്ഥലത്ത് നിന്നും പുറപ്പെടുമെന്നും അധികൃതര്‍ അറിയിച്ചു.
വിമാനം താഴയിറക്കിയതിന് ശേഷം, തകരാറുകള്‍ പരിശോധിച്ചു. വ്യക്തമായ പരിശോധനകള്‍ക്ക് ശേഷം മാത്രമേ വിമാനം പുറപ്പെടുവാന്‍ തയ്യാറാവുകയുള്ളൂ. സമാനമായ രീതിയില്‍ ബുധനാഴ്‌ച മസ്‌കറ്റിലേയ്‌ക്ക് പുറപ്പെട്ട സലാം എയര്‍ ഫ്ലൈറ്റ് മഹാരാഷ്‌ട്രയിലെ നാഗ്‌പൂര്‍ വിമാനത്താവളത്തില്‍ ഇറക്കിയിരുന്നു.
