ചെന്നൈ: നടൻ പ്രകാശ് രാജിന് സമൻസയച്ച് എൻഫോഴ്‌സ്‌മെന്‍റ് ഡയറക്‌ടറേറ്റ് (ഇഡി). പ്രണവ് ജ്വല്ലറി നിക്ഷേപ തട്ടിപ്പ് കേസിലാണ് നടനെതിരെ ഇഡിയുടെ നടപടി. ഇഡിയുടെ ചെന്നൈ ഓഫിസിൽ അടുത്ത ആഴ്‌ച നേരിട്ട് ഹാജരാകണമെന്നാണ് നിർദേശം (prakash raj summoned by ed in pranav jewellery ponzi scam).
തിരുച്ചിറപ്പള്ളി ആസ്ഥാനമാക്കിയുള്ള പ്രണവ് ജ്വല്ലറിയുടെ ബ്രാൻഡ് അംബാസിഡർ ആയിരുന്നു പ്രകാശ് രാജ്. നൂറ് കോടിയുടെ നിക്ഷേപ തട്ടിപ്പ് കേസാണ് ജ്വല്ലറി ഗ്രൂപ്പിനെതിരെയുള്ളത്. സ്വർണ നിക്ഷേപ സ്‌കീം (പോൺസി) എന്ന പേരിൽ വലിയ തുക തിരിച്ച് നൽകുമെന്ന് വാഗ്‌ദാനം ചെയ്‌ത് ജനങ്ങളിൽ നിന്ന് നൂറ് കോടിയോളം രൂപ തട്ടിയെന്നാണ് കേസ്. നിക്ഷേപകർക്ക് ഇവർ നിക്ഷേപിച്ച തുക തിരികെ നൽകിയിട്ടില്ലെന്ന് ഇഡി പ്രസ്‌താവനയിൽ വ്യക്തമാക്കി.
കഴിഞ്ഞ മാസം 20 ന് ജ്വല്ലറിയിൽ ഇഡി പരിശോധന നടത്തിയിരുന്നു. കണക്കിൽപ്പെടാത്ത 23.70 ലക്ഷം രൂപയും സ്വർണാഭരണങ്ങളും വിവിധ രേഖകളും ഇഡി റെയ്‌ഡിൽ പിടിച്ചെടുത്തതായാണ് വിവരം. ചെന്നൈയിൽ ഉൾപ്പടെ തമിഴ്‌നാടിന്‍റെ വിവിധ ഭാഗങ്ങളിലും പുതുച്ചേരിയിലും പ്രണവ് ഗ്രൂപ്പിന് ശാഖകളുണ്ട്.
പരാതി ഉയർന്നതോടെ പ്രണവ് ജ്വല്ലേഴ്‌സിന്‍റെ കടകൾ ഒക്ടോബറിൽ അടച്ചുപൂട്ടിയിരുന്നു. പരാതിയുടെ അടിസ്ഥാനത്തിൽ തമിഴ്‌നാട്ടിലെ ട്രിച്ചിയിലെ സാമ്പത്തിക കുറ്റകൃത്യ വിഭാഗം (Economic Offences Wing in Tamil Nadu's Trichy) ഉടമ മദനെതിരെ കേസെടുക്കുകയും ചെയ്‌തിരുന്നു. പിന്നാലെ ഈ മാസം ആദ്യം ഉടമയ്‌ക്കും ഭാര്യയ്‌ക്കും എതിരെ ലുക്ക്ഔട്ട് നോട്ടീസും പുറപ്പെടുവിച്ചിരുന്നു.
അതേസമയം ബിജെപിയുടെയും കേന്ദ്ര സർക്കാരിന്‍റെയും രൂക്ഷ വിമർശകനാണ് നടൻ പ്രകാശ് രാജ്. രാജ്യത്ത് നടക്കുന്ന സമകാലിക വിഷയങ്ങളിൽ തന്‍റെ നിലപാട് കൃത്യമായി അറിയിക്കാറുണ്ട് അദ്ദേഹം. പ്രശസ്‌ത മാധ്യമ പ്രവർത്തകയും സാമൂഹ്യ പ്രവർത്തകയുമായ ഗൗരി ലങ്കേഷിന്‍റേതടക്കമുള്ള കൊലപാതകങ്ങളില്‍ കേന്ദ്രത്തിനെതിരെയും ബിജെപിക്കെതിരെയും അദ്ദേഹം ശബ്‌ദമുയർത്തിയിരുന്നു.
മുൻ ഇന്ത്യന്‍ താരം ശ്രീശാന്തിനെതിരെ വഞ്ചന കേസ്: മുൻ ഇന്ത്യൻ ക്രിക്കറ്റ് താരം എസ് ശ്രീശാന്തിനെതിരെ വഞ്ചന കേസെടുത്ത് പൊലീസ്. കണ്ണൂർ ടൗൺ പൊലീസാണ് കേസെടുത്തത് (Cheating case against former cricketer S Sreesanth). കോടതി നിർദേശ പ്രകാരമാണ് നടപടി.
സരീഗ് ബാലഗോപാൽ എന്ന കണ്ണൂർ കണ്ണപുരം സ്വദേശിയുടെ പക്കല്‍ നിന്ന്, കൊല്ലൂരിൽ വില്ല പണിയാമെന്ന് പറഞ്ഞ് 19 ലക്ഷം തട്ടിയെന്നാണ് പരാതി. ശ്രീശാന്ത് കേസിലെ മൂന്നാം പ്രതിയാണ്. ഉഡുപ്പി സ്വദേശികളായ രാജീവ് കുമാർ, കെ വെങ്കിടേഷ് കിനി എന്നിവരാണ് കേസിലെ ഒന്നും രണ്ടും പ്രതികൾ.
കർണാടകയിലെ കൊല്ലൂരിൽ രാജീവ് കുമാറിൻ്റെ ഉടമസ്ഥതയിലുള്ള സ്ഥലത്ത് റിസോർട്ട് പണിയാമെന്നും, പ്രസ്‌തുത റിസോർട്ടിൽ ആരംഭിക്കുന്ന സ്പോർട്‌സ് അക്കാദമിയിൽ പങ്കാളിയാക്കാമെന്നും പറഞ്ഞ് പണം തട്ടിയെന്നാണ് കണ്ണപുരം സ്വദേശിയുടെ പരാതിയിൽ പറയുന്നത് (Allegations Against S Sreesanth).
