ന്യൂഡൽഹി: കൊവിഷീൽഡിൻ്റെ ക്ലിനിക്കൽ പരീക്ഷണം പൂർത്തിയാക്കാനൊരുങ്ങി സെറം ഇൻസ്റ്റിറ്റ്യൂട്ട് ഓഫ് ഇന്ത്യയും (എസ്.ഐ.ഐ) ഇന്ത്യൻ കൗൺസിൽ ഓഫ് മെഡിക്കൽ റിസർച്ചും (ഐ.സി.എം.ആർ). യു.എസിലെ നോവാവാക്‌സ് വികസിപ്പിച്ചെടുത്ത വാക്‌സിൻ്റെ പരീക്ഷണത്തിൽ ഐ.സി.എം.ആറും എസ്.ഐ.ഐ.യും സംയുക്തമായി പങ്കുചേരുകയായിരുന്നു.
പകർച്ചാവ്യാധിയുടെ ഭവിഷ്യത്തുകൾ ലഘൂകരിക്കാൻ സ്വകാര്യ-പൊതു സ്ഥാപനങ്ങൾ സഹകരിക്കുന്നതിൻ്റെ ഉത്തമ ഉദാഹരണമാണ് പങ്കാളിത്തമെന്ന് ഐ.സി.എം.ആർ പ്രസ്‌താവനയിൽ പറയുന്നു. ക്ലിനിക്കൽ ട്രയൽ സൈറ്റ് ഫീസുകൾ‌ക്ക് ഐ.സി.എം.ആറും കൊവിഷീൽ‌ഡിനായി എസ്.ഐ.ഐയും ധനസഹായം നൽകുകയായിരുന്നു. ഇതുവരെയുള്ള പരീക്ഷണങ്ങളുടെ അടിസ്ഥാനത്തിൽ വൈറസ് വ്യാപനം തടയാനാകുമെന്നും പ്രസ്‌താവനയിൽ പറയുന്നു. ഐ.സി.എം.ആറിൻ്റെ സഹായത്തോടെ എസ്.സി.ഐ ഇതിനകം 80 ദശലക്ഷം ഡോസ് വാക്‌സിൻ നിർമ്മിച്ചിട്ടുണ്ട്. കൊവിഷീൽഡ് എസ്.ഐ.ഐ പൂനൈ ലബോറട്ടറിയിലാണ് വികസിപ്പിച്ചത്.
യു.കെ ഓക്സ്ഫോർഡ് യൂണിവേഴ്‌സിറ്റിയിൽ നിർമ്മിച്ച അസ്ട്രസെനെക്ക മാസ്റ്റർ സീഡ് വാക്‌സിൻ പരീക്ഷണം ഫലപ്രാപ്രതിയിലേക്ക് അടുക്കുന്നു. യു.കെ, ബ്രസീൽ, ദക്ഷിണാഫ്രിക്ക, യു.എസ് എന്നിവിടങ്ങളിലാണ് പരീക്ഷണം നടത്തിയത്. ദക്ഷിണാഫ്രിക്കയിലും യു.കെയിലും നൊവവാക്‌സ് പരീക്ഷണം അവസാനഘട്ടത്തിലേക്കും അടുക്കുന്നു.
അതേസമയം കൊവിഡ് -19 നെതിരായ ഇന്ത്യയുടെ പോരാട്ടം ശക്തിപ്പെടുത്തുന്നതിൽ ഐ.സി.എം.ആർ വലിയ പങ്കുവഹിച്ചെന്നും ഫലപ്രദമായ വാക്‌സിൻ വികസിപ്പിക്കുന്നതിൽ ഇന്ത്യയെ മുൻ‌നിരയിൽ എത്തിക്കാൻ സാധിക്കുമെന്നും ലോകത്തെ ഏറ്റവും വലിയ വാക്‌സിൻ നിർമാതാക്കളായ എസ്.ഐ.ഐ.യുടെ സി.ഇ.ഒ അദർ പൂനവല്ല പറഞ്ഞു. ആഗോളതലത്തിൽ വാക്‌സിൻ വികസനത്തിലും നിർമ്മാണത്തിലും ഇന്ത്യക്ക് പ്രധാന പങ്കുണ്ടെന്ന് ഐ.സി.എം.ആർ ഡയറക്‌ടർ ജനറൽ ബൽറാം ഭാർഗവ പറഞ്ഞു.
