ബിഹാർ : ഒളിച്ചോടി വിവാഹം ചെയ്‌ത കമിതാക്കളെ ഗ്രാമവാസികൾ കൂട്ടം ചേർന്ന്‌ മർദിക്കുകയും തലമുടി മുറിക്കുകയും അർദ്ധനഗ്നരാക്കി വീഡിയോ എടുത്ത്‌ സാമൂഹിക മാധ്യമങ്ങൾ വഴി പ്രചരിപ്പിക്കുകയും ചെയ്‌തു (People Beated Couples In Bihar). കമിതാക്കളോട്‌ ഗ്രാമം വിടാനും ആവശ്യപ്പെട്ടു. കൂടാതെ ഇവരെ ഗ്രാമത്തിൽ പ്രവേശിപ്പിച്ചാൽ കൊന്നു കളയുമെന്ന്‌ ഇരുവരുടെയും മാതാപിതാക്കളെ ഭീഷണിപ്പെടുത്തുകയും ചെയ്‌തു(People Beated Couples In Bihar).
വീഡിയോ സാമൂഹിക മാധ്യമങ്ങളിൽ വൈറലായതോടെ മൂന്ന് പേർ അറസ്റ്റിലായി. ബുധനാഴ്‌ചയാണ് (4-10-2023) അമാസ് പൊലീസ് സ്റ്റേഷൻ പരിധിയിലെ ബേല ബിഘ ഗ്രാമത്തിൽ കേസിനാസ്‌പദമായ സംഭവം റിപ്പോർട്ട് ചെയ്യുന്നത്. കഴിഞ്ഞ കുറച്ചുമാസങ്ങളിലായി പ്രണയത്തിലായിരുന്ന യുവതിയും യുവാവും ബുധനാഴ്ച ബലിയാരി ദേവി ക്ഷേത്രത്തിൽ വച്ച് വിവാഹിതരായിരുന്നു.
വിവാഹത്തെ കുറിച്ച്‌ വിവരം ലഭിച്ച ഗ്രാമവാസികൾ ദമ്പതികളെ പിടികൂടി. ഇവരെ കൂടാതെ, രക്ഷിക്കാൻ ശ്രമിച്ച പെൺകുട്ടിയുടെ പിതാവിനെയും ഗ്രാമവാസികൾ മർദിച്ചിരുന്നു. സംഭവത്തിനുശേഷം ദമ്പതികൾ അമാസ് പോലീസ് സ്റ്റേഷനിൽ പരാതി നൽകി എഫ്‌ഐആർ ഫയൽ ചെയ്‌തു. ഇതുപ്രകാരം ഗ്രാമവാസികളായ മഹേന്ദ്ര മഞ്ജി, പ്രകാശ് ഭൂയ, ധനഞ്ജയ് കുമാർ എന്നിവരെ പൊലീസ് അറസ്റ്റുചെയ്‌തു. മൂവരും തങ്ങളെ ക്രൂരമായി മർദിക്കുകയും കൊല്ലുമെന്ന്‌ ഭീഷണിപ്പെടുത്തുകയും ചെയ്‌തതായി ദമ്പതികൾ പൊലീസിനോട്‌ പറഞ്ഞു.
സംഭവത്തിനുശേഷം ദമ്പതികൾ പൊലീസ് സംരക്ഷണത്തിലാണ്‌. വിശദമായ അന്വേഷണം ആരംഭിച്ചതായി അമാസ് പോലീസ് സ്റ്റേഷൻ മേധാവി മൃത്യുഞ്ജയ് കുമാർ പറഞ്ഞു.
