ന്യൂഡൽഹി : പറന്നുയരുന്നതിനിടെ വിമാനത്തിന്‍റെ എമർജൻസി എക്‌സിറ്റ് വാതിലിന്‍റെ കവർ തുറന്ന സംഭവത്തിൽ യാത്രക്കാരനെ കസ്റ്റഡിയിലെടുത്തു. ജൂലൈ എട്ടിന് ഹൈദരാബാദിൽ നിന്ന് ഡൽഹിയിലേക്കുള്ള ഇൻഡിഗോ വിമാനത്തിലാണ് യാത്രക്കാരൻ വാതിൽ തുറക്കാൻ ശ്രമിച്ച് പരിഭ്രാന്തി സൃഷ്‌ടിച്ചത്. സംഭവത്തിൽ 40കാരനായ ഫുറോഖോൺ ഹുസൈൻ എന്നയാളെ സുരക്ഷ അധികൃതർക്ക് കൈമാറി.
ഇൻഡിഗോയുടെ 6E 5605 വിമാനത്തിന്‍റെ എമർജൻസി എക്‌സിറ്റ് വാതിലിന്‍റെ കവർ തുറന്നതായാണ് ഡൽഹി വിമാനത്താവളം അധികൃതർ അറിയിച്ചത്. എമർജൻസി എക്‌സിറ്റ് വാതിലിനോട് ചേർന്നുള്ള 18 എ സീറ്റിലായിരുന്നു യാത്രക്കാരന്‍. സംഭവത്തിന് ശേഷം, എമർജൻസി എക്‌സിറ്റിന്‍റെ കവർ ഉടൻ പുനസ്ഥാപിക്കുകയും യാത്രക്കാരനെ മറ്റൊരു സീറ്റിലേക്ക് മാറ്റുകയും ചെയ്യുകയായിരുന്നു. സംഭവത്തെക്കുറിച്ച് അഭിപ്രായം തേടി ഇൻഡിഗോയിലേക്ക് അയച്ച കത്തിന് മറുപടി ലഭിച്ചിട്ടില്ലെന്നും അധികൃതർ കൂട്ടിച്ചേർത്തു.
വിമാനം ഡൽഹി എയർപോർട്ടിൽ ഇറങ്ങിയ ശേഷമാണ് ഫുറോഖോൺ ഹുസൈനെ സുരക്ഷ ഉദ്യോഗസ്ഥർക്ക് കൈമാറിയത്. ഇയാൾക്കെതിരെ എഫ്‌ഐആർ രജിസ്റ്റർ ചെയ്‌തിട്ടുണ്ട്. യാത്രക്കാരന്‍റെ അനിയന്ത്രിതമായ പെരുമാറ്റം മറ്റ് യാത്രക്കാരിലും ജീവനക്കാരിലും പൈലറ്റ്-ഇൻ-കമാൻഡിലും പരിഭ്രാന്തി സൃഷ്‌ടിച്ചതായും അധികൃതർ വ്യക്‌തമാക്കി.
'എമർജൻസി എക്‌സിറ്റ് ഡോറിന്‍റെ ഹാൻഡിൽ കാബിൻ മർദം അല്ലെങ്കിൽ മറ്റേതെങ്കിലും ആകസ്‌മിക കാരണങ്ങളാൽ തുറക്കുന്നതിൽ നിന്ന് സംരക്ഷിക്കുന്ന ഒരു കവർ ഉണ്ട്. ഈ കവർ നീക്കം ചെയ്‌താൽ ഹാൻഡിൽ ചെറിയ രീതിയിൽ തുറന്നിരിക്കുമെന്നതിനാൽ പറക്കുന്നതിനിടെയുള്ള ശക്തമായ മർദം കാരണം വായുവിൽ വച്ച് തുറക്കാൻ സാധ്യതയുണ്ട്. ഇത് വിമാനത്തിന്‍റെ സഞ്ചാരത്തിന് അപകടകരമാണ്', ഇന്ത്യൻ എയർലൈൻസിലെ മുൻ ഫ്ലൈറ്റ് സേഫ്റ്റി ഡയറക്‌ടർ എസ് എസ് പനേസർ പറഞ്ഞു.
എമർജൻസി എക്‌സിറ്റ് കവർ അബദ്ധവശാൽ തുറക്കാൻ പറ്റാത്ത തരത്തിലാണെന്ന് ഒരു എയർലൈനിലെ ഒരു ക്രൂ അംഗം പിടിഐയോട് പറഞ്ഞു. 'എമർജൻസി വാതിൽ തുറക്കണമെങ്കിൽ വലിയ പരിശ്രമം ആവശ്യമാണ്. ആർക്കെങ്കിലും അത് ചെയ്യാൻ കഴിയുക എന്നത് കുഴപ്പം സൃഷ്‌ടിക്കുക എന്ന ലക്ഷ്യത്തോടെ തുറക്കാൻ ശ്രമിക്കുമ്പോൾ മാത്രമാണ്' - ക്രൂ അംഗം പറഞ്ഞു.
എമർജൻസി എക്‌സിറ്റിന് അടുത്തായി സീറ്റുകൾ അനുവദിച്ചിരിക്കുന്ന യാത്രക്കാരോട് കവറോ ഹാൻഡിലോ തുറക്കാൻ പാടില്ലെന്ന കർശനമായ നിർദേശമുള്ളതാണ്. ഏതെങ്കിലും യാത്രക്കാരൻ ഇത്തരത്തിലുള്ള പ്രവൃത്തി ചെയ്‌താൽ അത് വിമാനത്തെ അപകടത്തിലാക്കുന്നതാണെന്നും ക്രൂ അംഗം കൂട്ടിച്ചേർത്തു.
എയർലൈൻ അധികൃതർ നൽകിയ പരാതിയുടെ അടിസ്ഥാനത്തിലാണ് ഡൽഹി പൊലീസ് ഇയാൾക്കെതിരെ എഫ്‌ഐആർ രജിസ്റ്റർ ചെയ്‌തത്. ഒരു വിമാനത്തിന്‍റെ പൈലറ്റ്-ഇൻ-കമാൻഡോ ജീവനക്കാരോ നൽകിയ നിയമാനുസൃത നിർദേശങ്ങൾ പാലിക്കാൻ വിസമ്മതിക്കുക, മറ്റുള്ളവരുടെ സ്വകാര്യ സുരക്ഷയെ അപകടപ്പെടുത്തുക എന്നി കുറ്റങ്ങളാണ് ചുമത്തിയിരിക്കുന്നത്. ഐപിസി സെക്ഷൻ 336, എയർക്രാഫ്റ്റ് നിയമങ്ങളിലെ സെക്ഷൻ 22 പ്രകാരവുമാണ് പൊലീസ് കേസ് ഫയൽ ചെയ്‌തിരിക്കുന്നതെന്ന് ഇൻഡിഗോ എയർലൈൻസ് അധികൃതർ പറഞ്ഞു.
ALSO READ : വിമാനങ്ങളിലെ യാത്രക്കാരുടെ അനുചിത പെരുമാറ്റം: എയർലൈൻ മേധാവികൾക്ക് ഡിജിസിഎയുടെ മാർഗനിർദേശം
