നാഗർകൂർനൂൽ: തെലങ്കാനയില്‍ ക്രെയിന്‍ തകര്‍ന്നു വീണതിനെ തുടര്‍ന്ന് അഞ്ച് തൊഴിലാളികള്‍ക്ക് ദാരുണാന്ത്യം. പാലമുരു - രംഗറെഡ്ഡി ജലസേചന പദ്ധതിയുടെ നിര്‍മാണതൊഴിലില്‍ ഏര്‍പ്പെട്ട ബിഹാര്‍ സ്വദേശികളാണ് മരിച്ചത്. വെള്ളിയാഴ്‌ച രാവിലെ നാഗർകൂർനൂല്‍ ജില്ലയിലെ കോലാപുര്‍, റെഗുമാന ഗദ്ദയിലാണ് സംഭവം.
ഒരാള്‍ക്ക് ഗുരുതരമായി പരിക്കേറ്റിട്ടുണ്ട്. ക്രെയിൻ ഉപയോഗിച്ച് പമ്പ് ഹൗസിലേക്ക് ഇറങ്ങുന്നതിനിടെ കമ്പികൾ പൊട്ടുകയുണ്ടായി. തുടര്‍ന്നാണ് ക്രെയിന്‍ തകര്‍ന്ന് വീണ് അപകടം. അഞ്ച് തൊഴിലാളികളും സംഭവസ്ഥലത്ത് തന്നെ മരിച്ചു. മൃതദേഹങ്ങൾ ഹൈദരാബാദിലെ ഉസ്‌മാനിയ ആശുപത്രിയിലേക്ക് മാറ്റിയതായി അധികൃതർ അറിയിച്ചു.
