ന്യൂഡല്‍ഹി: രാജ്യത്തിന്‍റെ പേര് ഭാരത് (Bharat) എന്നാക്കി മാറ്റാന്‍ ശ്രമം നടക്കുന്നുവെന്ന വാര്‍ത്തകള്‍ക്കും ചര്‍ച്ചകള്‍ക്കും പിന്നാലെ കേന്ദ്രത്തെ രൂക്ഷമായി വിമര്‍ശിച്ച് ഡല്‍ഹി മുഖ്യമന്ത്രിയും (Delhi Chief Minister) ആം ആദ്‌മി പാര്‍ട്ടി (Aam Aadmi Party) നേതാവുമായ അരവിന്ദ് കെജ്‌രിവാള്‍ (Arvind Kejriwal). പ്രതിപക്ഷ ഐക്യം തങ്ങളുടെ സഖ്യത്തിന്‍റെ പേര് ഭാരത് എന്നാക്കി മാറ്റിയാല്‍ ഭാവിയില്‍ ഇനിയും പേര് മാറ്റം നടത്തുമോ എന്നും അദ്ദേഹം പരിഹസിച്ചു. ഇന്ത്യ സഖ്യം (INDIA Alliance) അവരുടെ പേര് ഭാരത് എന്നാക്കിയാല്‍, ബിജെപി ഭാരതിന് പകരം മറ്റെന്തെങ്കിലും കൊണ്ടുവരുമോ എന്നായിരുന്നു അദ്ദേഹത്തിന്‍റെ ചോദ്യം.
തമിഴ്‌നാട് (Tamilnadu) മുഖ്യമന്ത്രി എംകെ സ്‌റ്റാലിന്‍റെ (MK Stalin) മകനും സംസ്ഥാന കായിക മന്ത്രിയുമായ ഉദയനിധി സ്‌റ്റാലിന്‍റെ (Udhayanidhi Stalin) സനാതന ധര്‍മത്തെക്കുറിച്ചുള്ള പരാമര്‍ശത്തെക്കുറിച്ചുള്ള ചോദ്യത്തിലും അദ്ദേഹം പ്രതികരിച്ചു. ഞാനും സനാതന ധർമത്തിൽപെട്ടയാളാണ്. നമ്മൾ മറ്റൊരാളുടെ വിശ്വാസത്തെ ബഹുമാനിക്കണം. മറ്റുള്ളവരുടെ വിശ്വാസത്തിനെതിരെ സംസാരിക്കുന്നത് തെറ്റാണെന്നും കെജ്‌രിവാള്‍ പറഞ്ഞു.
വിമര്‍ശിച്ച് മമതയും സ്‌റ്റാലിനും: അതേസമയം രാജ്യത്തിന്‍റെ പുനര്‍നാമകരണത്തില്‍ പശ്ചിമ ബംഗാള്‍ മുഖ്യമന്ത്രിയും പ്രതിപക്ഷ സഖ്യത്തിലെ അംഗവുമായ മമത ബാനർജിയും (Mamata Banerjee) പ്രതികരിച്ചു. ഈ രാജ്യത്തെ എല്ലാവർക്കും ഇന്ത്യ, ഭാരതമാണെന്ന് അറിയാമെന്നും എന്നാൽ പുറംലോകം നമ്മെ അറിയുന്നത് ഇന്ത്യയിലൂടെ മാത്രമാണെന്നായിരുന്നു അവരുടെ പ്രതികരണം. ഇന്ത്യയെ ഭാരതാക്കി മാറ്റാനുള്ള ബിജെപി നീക്കത്തെ തമിഴ്‌നാട് മുഖ്യമന്ത്രിയും ഡിഎംകെ അധ്യക്ഷനുമായ എംകെ സ്‌റ്റാലിനും വിമര്‍ശിച്ചു. പ്രതിപക്ഷ സഖ്യത്തിന്‍റെ പേര് ഇന്ത്യയാണെന്നറിഞ്ഞതോടെ തന്നെ ബിജെപി വിറച്ചുപോയെന്നും അദ്ദേഹം പറഞ്ഞു.
ഫാസിസ്‌റ്റുകളായ ബിജെപിയെ താഴെയിറക്കാന്‍ ബിജെപി ഇതര ശക്തികള്‍ ഒന്നിക്കുകയും അവരുടെ സഖ്യത്തിന് #INDIA എന്ന ഉചിതമായ പേര് നല്‍കുകയും ചെയ്‌തു, ഇപ്പോള്‍ ഇന്ത്യയെ ഭാരതാക്കി മാറ്റാന്‍ ബിജെപി ആഗ്രഹിക്കുന്നു. ഇന്ത്യയെ പരിവര്‍ത്തനപ്പെടുത്തുമെന്നായിരുന്നു ബിജെപി വാഗ്‌ദാനം ചെയ്‌തിരുന്നത്, എന്നാല്‍ ഒമ്പത് വര്‍ഷത്തിന് ശേഷം ഞങ്ങള്‍ക്ക് ലഭിച്ചത് ഒരു പേര് മാറ്റം മാത്രമാണെന്നും സ്‌റ്റാലിന്‍ എക്‌സില്‍ കുറിച്ചു.
പ്രതിപക്ഷത്തെ ഭയന്നോ?: 'ഇന്ത്യ' എന്ന ഒറ്റ പദം തന്നെ ബിജെപിയെ തളർത്തുന്നത് പോലെ തോന്നുന്നു. കാരണം അവർ പ്രതിപക്ഷ നിരയിലെ ഐക്യത്തിന്‍റെ ശക്തി തിരിച്ചറിയുന്നു. തെരഞ്ഞെടുപ്പ് കാലത്ത് 'ഇന്ത്യ' ബിജെപിയെ അധികാരത്തിൽ നിന്ന് തുരത്തുമെന്നും അദ്ദേഹം കൂട്ടിച്ചേര്‍ത്തു.
അടിയന്തരമായി വിളിച്ചുചേര്‍ത്തിരിക്കുന്ന പ്രത്യേക പാര്‍ലമെന്‍റ് സമ്മേളനത്തില്‍ (Special Parliament Session) 'ഇന്ത്യ'(India) എന്ന പേര് മാറ്റി ഭാരത് (Bharat) എന്നാക്കി പുനര്‍നാമകരണം ചെയ്യാനുള്ള കേന്ദ്ര നീക്കം നടക്കുന്നതായാണ് ബന്ധപ്പെട്ട വൃത്തങ്ങള്‍ അറിയിക്കുന്നത്. ഇതിന്‍റെ ഭാഗമായി സെപ്‌റ്റംബര്‍ 18 ന് വിളിച്ചുചേര്‍ത്തിട്ടുള്ള പാര്‍ലമെന്‍റിന്‍റെ പ്രത്യേക സമ്മേളനത്തില്‍ ഇതിനായി പ്രമേയം (Resolution) കൊണ്ടുവരാനും നരേന്ദ്രമോദി സര്‍ക്കാര്‍ തയ്യാറെടുക്കുന്നതായും കേന്ദ്രവുമായി ബന്ധമുള്ള വൃത്തങ്ങള്‍ ഇടിവി ഭാരതിനോട് പ്രതികരിച്ചിരുന്നു. അതേസമയം സെപ്‌റ്റംബര്‍ 22 വരെയാണ് ധൃതിയില്‍ വിളിച്ചുചേര്‍ത്തിട്ടുള്ള സഭാസമ്മേളനം (Parliament Session).
