മുംബൈ (മഹാരാഷ്‌ട്ര) : ബിസ്‌ക്കറ്റ്, കേക്ക് പാക്കറ്റുകളിലാക്കി പാമ്പുകളെ കടത്തിയ ആള്‍ കസ്റ്റംസ് പിടിയില്‍ (smuggling snakes in biscuit cake packets). ഛത്രപതി ശിവാജി മഹാരാജ് അന്താരാഷ്‌ട്ര വിമാനത്താവളത്തിലാണ് ബോങ്കോക്കില്‍ നിന്നെത്തിയ ആള്‍ പിടിക്കപ്പെട്ടത് (One held for smuggling snakes in biscuit cake packets at Mumbai airport). ഇയാളുടെ പക്കല്‍ നിന്ന് ഒമ്പത് പെരുമ്പാമ്പുകള്‍ അടക്കം 11 പാമ്പുകളെ പിടികൂടിയതായി ഡയറക്‌ടറേറ്റ് ഓഫ് റവന്യു ഇന്‍റലിജന്‍സ് ഉദ്യോഗസ്ഥര്‍ അറിയിച്ചു.
ഡിസംബര്‍ 20നാണ് ഇയാള്‍ ബാങ്കോക്കില്‍ നിന്ന് ഛത്രപതി ശിവാജി മഹാരാജ് അന്താരാഷ്‌ട്ര വിമാനത്താവളത്തില്‍ എത്തിയത്. ഇയാളുടെ ലഗേജ് പരിശോധിച്ചപ്പോള്‍ കേക്കിന്‍റെയും ബിസ്‌ക്കറ്റിന്‍റെയും പാക്കറ്റുകളില്‍ ഒളിപ്പിച്ച നിലയില്‍ പാമ്പുകളെ കണ്ടെത്തി. പാമ്പുകളുടെ കൂട്ടത്തില്‍ ഒമ്പത് പെരുമ്പാമ്പുകളും ഉണ്ടായിരുന്നു.
1962ലെ കസ്റ്റംസ് നിയമ പ്രകാരമാണ് ഇയാളെ പിടികൂടിയത്. പിടിച്ചെടുത്ത പാമ്പുകളെ സംരക്ഷിക്കുന്നതിനായി ബാങ്കോക്കിലേക്ക് തന്നെ അയക്കാന്‍ റീജിയണല്‍ ഡെപ്യൂട്ടി ഡയറക്‌ടര്‍ ഉത്തരവിറക്കി. പാമ്പുകളെ സ്‌പൈസ് ജെറ്റ് എയര്‍വേയ്‌സിന് കൈമാറിയതായും ഉദ്യോഗസ്ഥര്‍ അറിയിച്ചു.
Also Read: മാനന്തവാടിയിൽ ആനക്കൊമ്പുമായി ആറംഗ സംഘം അറസ്റ്റിൽ; പിടിച്ചെടുത്ത ആനക്കൊമ്പിന് അഞ്ചര കിലോ തൂക്കം
പ്രതിയെ ചോദ്യം ചെയ്‌ത് വരികയാണെന്നാണ് ഉദ്യോഗസ്ഥര്‍ നല്‍കുന്ന വിവരം. ഇയാള്‍ക്കെതിരെ ആവശ്യമായ നടപടി സ്വീകരിക്കുമെന്നും ഉദ്യോഗസ്ഥര്‍ അറിയിച്ചു. അതേസമയം നവംബര്‍ ഏഴിന് നീലാഞ്ചല്‍ എക്‌സ്‌പ്രസില്‍ 28 പാമ്പുകളും മറ്റ് ജീവികളുമായി ഒരു സ്‌ത്രീ പിടിയിലായിരുന്നു. ടാറ്റ നഗര്‍ റെയില്‍വേ പൊലീസ് ആണ് സ്‌ത്രീയെ അറസ്റ്റ് ചെയ്‌തത്. ഇവരില്‍ നിന്ന് വിദേശയിനം പാമ്പുകളടക്കം പിടിച്ചെടുത്തിരുന്നു.
