ഭോപ്പാല്‍ : ഒറ്റ പ്രസവത്തില്‍ ഒന്നിലധികം കുഞ്ഞുങ്ങള്‍ ജനിയ്ക്കുന്ന സംഭവങ്ങള്‍ നമ്മെ അത്ഭുതപ്പെടുത്തുകയും സന്തോഷിപ്പിക്കുകയും ചെയ്യാറുണ്ട്. അത്തരമൊരു അപൂര്‍വതയാണ് മധ്യപ്രദേശിലെ സത്‌നയില്‍ സംഭവിച്ചത്. വര്‍ഷങ്ങളായുള്ള കാത്തിരിപ്പിനൊടുവില്‍ മൂന്ന് കുഞ്ഞുങ്ങളുടെ അച്ഛനായിരിക്കുകയാണ് 62 കാരന്‍.
അടര്‍വേദിയ ഗുര്‍ദ്‌ ഗ്രാമത്തിലെ താമസക്കാരനായ ഗോവിന്ദ് കുശ്‌വാഹയുടെ ഭാര്യ ഹീരാബായ്‌ കുശ്‌വാഹയാണ് (30) ഒറ്റ പ്രസവത്തില്‍ മൂന്ന് കുഞ്ഞുങ്ങള്‍ക്ക് ജന്മം നല്‍കിയത്. പ്രസവ വേദനയെ തുടര്‍ന്ന് തിങ്കളാഴ്‌ചയാണ് ഗോവിന്ദ് കുശ്‌വാഹ ഭാര്യ ഹീരാബായിയെ ജില്ല ആശുപത്രിയില്‍ പ്രവേശിപ്പിച്ചത്. എന്നാല്‍ സുഖ പ്രസവം സാധ്യമല്ലെന്ന് തിരിച്ചറിഞ്ഞ് ഡോക്‌ടര്‍മാര്‍ ശസ്‌ത്രക്രിയയിലൂടെ പുറത്തെടുക്കാന്‍ തീരുമാനിക്കുകയായിരുന്നു.
ഇത്തരത്തില്‍ പുറത്തെടുത്തതാകട്ടെ മൂന്ന് കുഞ്ഞുങ്ങളെ. ഹീരാബായിക്ക് ഇടയ്‌ക്കിടെ വേദന അനുഭവപ്പെടുന്നതുകൊണ്ട് ഗര്‍ഭകാലം പൂര്‍ത്തിയാക്കാതെയാണ് ശസ്‌ത്രക്രിയ നടത്തിയത്. അതുകൊണ്ടുതന്നെ കുഞ്ഞുങ്ങളുടെ ആരോഗ്യ സ്ഥിതി അത്ര തൃപ്‌തികരമല്ല. നിലവില്‍ കുഞ്ഞുങ്ങള്‍ എന്‍ഐസിയുവില്‍ (നിയോനാറ്റൽ ഇന്‍റന്‍സീവ് കെയർ യൂണിറ്റ്) നിരീക്ഷണത്തിലാണ്. അതേസമയം, മൂന്ന് കുഞ്ഞുങ്ങളുണ്ടായ സന്തോഷത്തിലാണ് ഗോവിന്ദ് കുശ്‌വാഹ.
ഇരട്ടി സന്തോഷം രണ്ടാം ഭാര്യയിലൂടെ : 62 കാരനായ ഗോവിന്ദ് കുശ്‌വാഹയ്‌ക്ക് രണ്ട് ഭാര്യമാരാണുള്ളത്. ആദ്യ ഭാര്യയായ കസ്‌തൂരി ബായിയില്‍ (60) അദ്ദേഹത്തിന് ഒരു മകനുണ്ടായിരുന്നു. 18ാം വയസില്‍ അവന്‍ വാഹനാപകടത്തില്‍ മരിച്ചു.
ശേഷമാണ് ഗോവിന്ദ് കുശ്‌വാഹ ഹീരാബായിയെ വിവാഹം ചെയ്‌തത്. തുടര്‍ന്ന് 6 വര്‍ഷത്തെ കാത്തിരിപ്പിനൊടുവിലാണ് ഹീരാബായ്‌ മൂന്ന് ജുഞ്ഞുങ്ങള്‍ക്ക് ജന്മം നല്‍കിയിരിക്കുന്നത്. ഐസിയുവില്‍ പ്രവേശിപ്പിക്കപ്പെട്ട കുഞ്ഞുങ്ങളുടെ ആരോഗ്യത്തിനായ് മനമുരുകി പ്രാര്‍ഥിച്ചുവരികയാണ് ഗോവിന്ദ് കുശ്‌വാഹ.
40 ആഴ്‌ചയാണ് ഒരു സ്‌ത്രീയുടെ ഗര്‍ഭകാലം. എന്നാല്‍ ഹീരാബായ്‌ കുശ്‌വാഹ പ്രസവിച്ചത് 34 ആഴ്‌ചകള്‍ പിന്നിട്ടപ്പോഴാണ്. അതുകൊണ്ടുള്ള ചെറിയ ആരോഗ്യ പ്രശ്‌നങ്ങള്‍ മാത്രമേ കുഞ്ഞുങ്ങള്‍ക്കുള്ളൂവെന്നും നിലവില്‍ എന്‍ഐസിയുവില്‍ (നിയോനേറ്റൽ ഇന്റൻസീവ് കെയർ യൂണിറ്റ്) നിരീക്ഷണത്തിലാണെന്നും ജില്ല ആശുപത്രി അഡ്‌മിനിസ്ട്രേറ്റർ ഡോ.അമർ സിങ് പറഞ്ഞു.
റാഞ്ചിയില്‍ ഒറ്റ പ്രസവത്തില്‍ 5 കുഞ്ഞുങ്ങള്‍ : ജാര്‍ഖണ്ഡില്‍ അടുത്തിടെ ഒരു യുവതി അഞ്ച് പെണ്‍കുഞ്ഞുങ്ങള്‍ക്ക് ജന്മം നല്‍കിയിരുന്നു. ഛത്ര ഇത്‌ഖോരി സ്വദേശിനി ഏഴാം മാസത്തിലാണ് പ്രസവിച്ചത്. കുഞ്ഞുങ്ങള്‍ അഞ്ച് പേരും എന്‍ഐസിയുവില്‍ നിരീക്ഷണത്തിലായിരുന്നു.
ജാര്‍ഖണ്ഡില്‍ ആദ്യമായാണ് ഒറ്റ പ്രസവത്തില്‍ അഞ്ച് കുഞ്ഞുങ്ങള്‍ ഉണ്ടാകുന്നത്. വിവാഹ ശേഷം ഏറെ നാളുകളായിട്ടും കുഞ്ഞുങ്ങള്‍ ഉണ്ടാകാതിരുന്നതിനെ തുടര്‍ന്ന് യുവതി വിവിധ ആശുപത്രികളില്‍ ചികിത്സ തേടിയിരുന്നു. തുടര്‍ന്നാണ് ഗര്‍ഭിണിയാകുന്നത്.
ജാര്‍ഖണ്ഡില്‍ ആദ്യമായാണ് ഇത്തരമൊരു സംഭവം റിപ്പോര്‍ട്ട് ചെയ്യുന്നതെന്നും കുഞ്ഞുങ്ങള്‍ എന്‍ഐസിയുവില്‍ നിരീക്ഷണത്തിലാണെന്നും ഡോക്‌ടര്‍മാര്‍ പറഞ്ഞു.
