ഭുവനേശ്വർ : വിവിധ സംസ്ഥാനങ്ങളിലായി സ്ത്രീകളെ വിവാഹം ചെയ്ത് തട്ടിപ്പ് നടത്തിയ കേസില്‍ 66 കാരന്‍ കൂടുതല്‍ പേരെ വഞ്ചിച്ചതായി പൊലീസ് കണ്ടെത്തല്‍. ഒഡിഷയിലെ കേന്ദ്രപാര ജില്ലയിലെ ഒരു തീരദേശ ഗ്രാമത്തില്‍ നിന്നുള്ള രമേഷ് ചന്ദ്ര സ്വെയ്‌ക്കെതിരെ (66) പരാതിയുമായി മൂന്ന് സ്ത്രീകള്‍ കൂടി രംഗത്തെത്തി.
ഉന്നത വിദ്യഭ്യാസ യോഗ്യതകളുള്ളവരാണ് ഇവരെന്നത് തട്ടിപ്പിന്‍റെ വ്യാപ്‌തി വ്യക്തമാക്കുന്നുവെന്ന് പൊലീസ് അറിയിച്ചു. ഇതോടെ ഇതുവരെ പരാതി നല്‍കിയവരുടെ എണ്ണം 17 ആയി. 66 കാരന്‍ നിലവില്‍ ജുഡീഷ്യല്‍ കസ്റ്റഡിയിലാണ്.
മധ്യവയസ്‌കരും വിദ്യാസമ്പന്നരുമായ സ്ത്രീകളാണ് കേസിലെ ഇരകളെല്ലാം. പുതുതായി കണ്ടെത്തിയവര്‍ ഛത്തീസ്‌ഗഡില്‍ നിന്നുള്ള ചാര്‍ട്ടേര്‍ഡ് അക്കൗണ്ടന്‍റ്, അസമിൽ നിന്നുള്ള ഫിസിഷ്യന്‍, ഒഡിഷക്കാരിയായ ഉയര്‍ന്ന വിദ്യാഭ്യാസമുള്ള സ്ത്രീ എന്നിവരാണെന്ന് ഭുവനേശ്വർ ഡെപ്യൂട്ടി പൊലീസ് കമ്മീഷണർ യുഎസ് ഡാഷ് പറഞ്ഞു.
Also Read: വയസ് 62, ഏഴ് സംസ്ഥാനങ്ങളിലായി 14 വിവാഹം: ഒടുവില്‍ തട്ടിപ്പ് വീരൻ കുടുങ്ങി
ഡോ. ബിഭു പ്രകാശ് സ്വെയിൻ, ഡോ. രമണി രഞ്ജൻ സ്വെയിൻ എന്നിങ്ങനെ വ്യത്യസ്ത പേരുകളിലാണ് ഇയാള്‍ വിവാഹങ്ങള്‍ നടത്തിയിരുന്നത്. സ്ത്രീകളെ വശീകരിക്കുന്നതിൽ വൈദഗ്ധ്യമുള്ള സ്വെയ്ൻ, കോളജ് അധ്യാപികമാരെയും പൊലീസുകാരെയും അഭിഭാഷകരേയും വഞ്ചിച്ചു.
മാട്രിമോണിയല്‍ സൈറ്റുകള്‍ വഴിയാണ് ഇയാള്‍ സ്ത്രീകളെ കണ്ടെത്തി വിവാഹം കഴിച്ചിരുന്നത്. വിവാഹശേഷം പണവും ആഭരണങ്ങളും സ്വന്തമാക്കി വിദഗ്‌ധമായി മുങ്ങുന്നതാണ് രീതി. വിവിധ പേരുകളില്‍ ക്രഡിറ്റ് കാര്‍ഡ് സ്വന്തമാക്കുന്ന ഇയാള്‍ കൊച്ചിയില്‍ അടക്കം ബാങ്ക് തട്ടിപ്പ് കേസിലും പ്രതിയാണ്.
