ഗുവാഹത്തി / ഡൽഹി / മുംബൈ : അസമിൽ മഴ തുടരുന്നു. വടക്കുകിഴക്കൻ സംസ്ഥാനത്തെ ഒമ്പത് ജില്ലകളിലായി നാല് ലക്ഷത്തിലധികം ആളുകളെയാണ് കഴിഞ്ഞ ദിവസങ്ങളിൽ തുടർച്ചയായി പെയ്‌ത മഴയിൽ പ്രളയം ബാധിച്ചത്. അതേസമയം ഡൽഹിയിലും മുംബൈയിലും കാലവർഷം ആരംഭിച്ചിട്ടുണ്ട്.
അസമിൽ പ്രളയം : അസമിൽ ജലനിരപ്പ് താഴ്‌ന്നെങ്കിലും കഴിഞ്ഞ ദിവസങ്ങളിലായുണ്ടായ വെള്ളപ്പൊക്കത്തിൽ ഇത് വരെ മൂന്ന് പേരുടെ മരണം റിപ്പോർട്ട് ചെയ്‌തതായി അസം സ്റ്റേറ്റ് ഡിസാസ്റ്റർ മാനേജ്‌മെന്‍റ് അതോറിറ്റി ഉദ്യോഗസ്ഥർ അറിയിച്ചു. ബക്‌സ, ബാർപേട്ട, ദരംഗ്, ധുബ്രി, ഗോൾപാറ, കാംരൂപ്, ലഖിംപൂർ, നാൽബാരി, ഉദൽഗുരി ജില്ലകളിലായി 4,07,700 ലധികം പേരെയാണ് പ്രളയം ബാധിച്ചിട്ടുള്ളത്. ഈ ജില്ലകളിലായി 101 ദുരിതാശ്വാസ ക്യാമ്പുകളാണ് പ്രവർത്തിക്കുന്നത്.
മൊത്തം 81,352 പേർ ഇവിടെ അഭയം പ്രാപിച്ചിട്ടുണ്ട്. ഇതിന് പുറമെ 119 ദുരിതാശ്വാസ വിതരണ കേന്ദ്രങ്ങളും ഭരണകൂടം തുറന്നിട്ടുണ്ട്. നിലവിൽ 1,118 ഗ്രാമങ്ങൾ വെള്ളത്തിനടിയിലാണ്. അസമിലുടനീളം 8,469.56 ഹെക്‌ടർ കൃഷിയാണ് പ്രളയത്തിൽ നശിച്ചത്. ബക്‌സ, ബാർപേട്ട, സോണിത്‌പൂർ, ധുബ്രി, കാംരൂപ്, കൊക്രജാർ, നാൽബാരി, സൗത്ത് സൽമാര, ഉദൽഗുരി എന്നിവിടങ്ങളിൽ വലിയ രീതിയിൽ മണ്ണൊലിപ്പും ഉണ്ടായിട്ടുണ്ട്.
നിരവധി ജലാശയങ്ങൾ കരകവിഞ്ഞൊഴുകിയതോടെ റോഡുകൾ, പാലങ്ങൾ തുടങ്ങി പല അടിസ്ഥാന സൗകര്യങ്ങളും താറുമാറായി. ദരാംഗ് ജില്ലയിൽ പലയിടത്തും നഗരപ്രദേശങ്ങൾ വെള്ളത്തിനടിയിലായി. ബ്രഹ്മപുത്ര നദിയിലെ ജലനിരപ്പ് അപകടരേഖയ്‌ക്ക് മുകളിലാണ്.
അസമിന് കേന്ദ്ര സഹായം ഉറപ്പ് നൽകി ഷാ : അതേസമയം അസമിലെ പ്രളയ ബാധിത പ്രദേശങ്ങളിൽ അവശ്യമായ കേന്ദ്ര സഹായം നൽകുമെന്ന് കേന്ദ്ര ആഭ്യന്തര മന്ത്രി അമിത് ഷാ അസം മുഖ്യമന്ത്രി ഹിമന്ത ബിശ്വ ശർമയ്‌ക്ക് ഉറപ്പ് നൽകിയിട്ടുണ്ട്. അസമിലെ ദുരിതാശ്വാസ, രക്ഷാപ്രവർത്തനങ്ങൾക്കായി എൻഡിആർഎഫ് ടീമുകൾ സജ്ജമാണെന്ന് ഷാ ട്വീറ്റ് ചെയ്‌തിരുന്നു.
മുംബൈയിലും ഡൽഹിയിലും കാലവർഷം : തെക്കുപടിഞ്ഞാറൻ മൺസൂൺ ഇന്ന് മുംബൈയിലും ഡൽഹിയിലും നല്ല മഴ നൽകി. കേന്ദ്ര കാലാവസ്ഥ വകുപ്പ് പ്രവചിച്ചതിനേക്കാൾ രണ്ട് ദിവസം മുൻപാണ് കാലവർഷം ഡൽഹിയിലെത്തിയതെങ്കിൽ രണ്ടാഴ്‌ച വൈകിയാണ് മുംബൈയിലെത്തിയത്. ഡൽഹിയുടെ മിക്ക ഭാഗങ്ങളിലും ചാറ്റൽ മഴ തുടരുകയാണ്.
also read : Karnataka| മണ്‍സൂണ്‍ എത്തിയിട്ടും മഴയില്ല; കൃഷിയും ജീവിതവും തുലാസിൽ, കൂട്ട പ്രാർഥനയിൽ കണ്ണീർ പൊഴിച്ച് ജനങ്ങൾ
മുംബൈയിൽ കെട്ടിടം തകർന്നുവീണു : മഴയെ തുടർന്ന് മുംബൈയിലെ സബർബൻ ഘാട്‌കോപ്പർ ഏരിയയിൽ മൂന്ന് നിലകളുള്ള പാര്‍പ്പിടസമുച്ചയം ഇന്ന് രാവിലെ തകർന്നു വീണു. സംഭവസ്ഥലത്ത് നിന്ന് ഇതുവരെ നാല് പേരെ രക്ഷപ്പെടുത്തിയിട്ടുണ്ട്. രക്ഷാപ്രവർത്തനം പുരോഗമിക്കുകയാണ്.
മൺസൂൺ എംപിയിലും : തെക്കുപടിഞ്ഞാറൻ മൺസൂൺ ഇന്ന് മധ്യപ്രദേശിന്‍റെ കിഴക്കൻ ഭാഗങ്ങളിലും പ്രവേശിച്ചു. അടുത്ത ദിവസങ്ങളിൽ സംസ്ഥാനത്ത് മഴ കനക്കുമെന്നാണ് മുന്നറിയിപ്പ്.
