മധ്യപ്രദേശ്: മധ്യപ്രദേശ് നിയമസഭ തെരഞ്ഞെടുപ്പ് ഫലം പുറത്തുവന്നപ്പോൾ 163 സീറ്റുകൾ നേടി ബിജെപി അധികാരം നിലനിർത്തി. 2018ലെ 109 സീറ്റുകളാണ് ബിജെപിക്കുണ്ടായിരുന്നത്. 2018ൽ 114 സീറ്റുകൾ നേടിയ കോൺഗ്രസ് 2023ല്‍ 66 സീറ്റുകളായി ചുരുങ്ങി. പുതിയതായി വന്ന ഭാരത് ആദിവാസി പാർട്ടിക്ക് ഒരു മണ്ഡലത്തിൽ വിജയിക്കാൻ കഴിഞ്ഞു. തെരഞ്ഞെടുക്കപ്പെട്ട എംഎൽഎമാരിൽ ഏറ്റവും കുറഞ്ഞ ആസ്‌തിയുള്ളത് ഭാരത് ആദിവാസി പാർട്ടിയുടെ കമലേഷ് ദോദിയാറിനാണ്. 18 ലക്ഷം രൂപയുടെ ആസ്‌തിയാണ് മലേഷ് ദോദിയാറിനുള്ളത്.
എന്നാല്‍ ഏറ്റവും കൂടിയ ആസ്തിയുള്ള ശതകോടീശ്വരൻമാരാണ് മധ്യപ്രദേശിലെ ഭൂരിഭാഗം ജനപ്രതിനിധികളും. ആകെയുള്ള 230 എംഎൽഎമാരിൽ 205 പേരും കോടീശ്വരന്മാരാണെന്നാണ് അസോസിയേഷൻ ഫോർ ഡെമോക്രാറ്റിക് റിഫോംസ് (എഡിആർ) പുറത്തുവിട്ട റിപ്പോർട്ടിലുള്ളത്. 2018ൽ ഒരു കോടി രൂപയിലധികം ആസ്തിയുള്ള എംഎൽഎമാരുടെ എണ്ണം 187 ആയിരുന്നത് 2023ൽ 205 ആയി ഉയർന്നു. കോടീശ്വര എംഎൽഎമാരിൽ 144 പേർ ബിജെപിയിൽ നിന്നും 61 പേർ കോൺഗ്രസിൽ നിന്നുമാണ്.
രത്‌ലാം ജില്ലയിൽ നിന്ന് തെരഞ്ഞെടുക്കപ്പെട്ട ബിജെപി എംഎൽഎ ചൈതന്യ കശ്യപ് 296 കോടി രൂപയുടെ ആസ്‌തിയുമായി പട്ടികയിൽ ഒന്നാമതെത്തിയപ്പോൾ വിജയരാഘവ്ഗഡിൽ നിന്ന് വിജയിച്ച ബിജെപി എംഎല്‍എ സഞ്ജയ് സത്യേന്ദ്ര പതക് രണ്ടാം സ്ഥാനത്താണ്.
ഏറ്റവും കുറഞ്ഞ ആസ്തിയുള്ള എംഎല്‍എമാരില്‍ ബിജെപിയുടെ സന്തോഷ് വർക്കഡെ (സിഹോറ) 25 ലക്ഷം രൂപ, ബിജെപി നേതാവ് കാഞ്ചൻ മുകേഷ് തൻവെ (ഖാണ്ട്വ) 26 ലക്ഷം രൂപ എന്നിവരുണ്ട്.
ഏറ്റവും കൂടുതൽ ബാധ്യതയുള്ള സ്ഥാനാർത്ഥികളിൽ ബിജെപിയുടെ മുൻ മന്ത്രി സുരേന്ദ്ര പട്‌വ (ഭോജ്‌പൂർ) 57 കോടി രൂപയുടെ കടവുമായി മുന്നിട്ട് നിൽക്കുന്നു, കോൺഗ്രസിലെ ദിനേഷ് ജെയിൻ (മഹിദ്‌പൂർ) 30 കോടിയുമായി രണ്ടാം സ്ഥാനത്തും ബിജെപിയുടെ ഭൂപേന്ദ്ര സിംഗ് (ഖുറായി) (23 കോടി) മൂന്നാം സ്ഥാനത്തുമാണ്.
205 കോടീശ്വരന്മാരിൽ 102 എംഎൽഎമാർ 5 കോടി രൂപയോ അതിൽ കൂടുതലോ സ്വത്തുള്ളവരാണ്. 71 നിയമസഭാംഗങ്ങൾ 2 കോടി മുതൽ 5 കോടി രൂപ വരെ സ്വത്ത് കൈവശമുള്ളവരാണ്. കൂടാതെ, 48 നിയമസഭാംഗങ്ങൾ 50 ലക്ഷം മുതൽ 2 കോടി രൂപ വരെ ആസ്‌തിയുണ്ടെന്ന് പറയുമ്പോൾ ഒമ്പത് എംഎൽഎമാരുടെ സ്വത്ത് 50 ലക്ഷം രൂപയിൽ താഴെയാണ്.
