ഇംഫാൽ: അഞ്ച് സംസ്ഥാനങ്ങളിലെ നിയമസഭാ തെരഞ്ഞെടുപ്പിന്‍റെ നിർണായക ഫലം അറിയാൻ ഏതാനും മണിക്കൂറുകൾ മാത്രം. എട്ട് മണി മുതലാണ് പോസ്റ്റൽ വോട്ടുകൾ എണ്ണിത്തുടങ്ങുക. ഹിന്ദിഹൃദയഭൂമിയായ ഉത്തർപ്രദേശ്, പഞ്ചാബ്, ഉത്തരാഖണ്ഡ്, ഗോവ എന്നീ സംസ്ഥാനങ്ങളോടൊപ്പം മണിപ്പൂരും നിർണായക ജനവിധിയിലേക്ക് ഉറ്റുനോക്കുകയാണ്.
മണിപ്പൂരിലെ 60 മണ്ഡലങ്ങളിലേക്ക് രണ്ട് ഘട്ടങ്ങളിലായാണ് തെരഞ്ഞെടുപ്പ് നടന്നത്. ആദ്യ ഘട്ടത്തിൽ 38 മണ്ഡലങ്ങളിലും രണ്ടാം ഘട്ടത്തിൽ 22 മണ്ഡലങ്ങളിലുമാണ് വോട്ടെടുപ്പ് നടന്നത്. 265 സ്ഥാനാർഥികളുടെ വിധി നിർണയിക്കുന്നതിനായി 1,247 പോളിങ് സ്റ്റേഷനുകളിലായി 8.38 ലക്ഷം വോട്ടർമാർ തങ്ങളുടെ ജനാധിപത്യാവകാശം വിനിയോഗിച്ചു.
അതേസമയം മണിപ്പൂരിൽ ബിജെപിക്ക് ഭരണത്തുടർച്ചയുണ്ടാകുമെന്നാണ് എക്‌സിറ്റ് പോൾ സർവേ ഫലങ്ങൾ പ്രവചിക്കുന്നത്. നിലവിൽ രാജ്യം ഉറ്റുനോക്കുന്ന വോട്ടെണ്ണൽ സംസ്ഥാനത്തിന് മാത്രമല്ല, വടക്കുകിഴക്കൻ മേഖലയിലാകെ പ്രാധാന്യമർഹിക്കുന്നു. തെരഞ്ഞെടുപ്പ് ഫലം അടുത്ത വർഷം നടക്കാനിരിക്കുന്ന മേഘാലയ, നാഗാലാൻഡ്, ത്രിപുര എന്നിവിടങ്ങളിലെ തെരഞ്ഞെടുപ്പുകളെ ബാധിക്കുന്നതോടൊപ്പം തന്നെ, 2016 മുതൽ ശക്തിപ്രാപിച്ചുവരുന്ന മേഖലയിലെ ബിജെപി പാർട്ടിയുടെ സാധ്യതയെ രൂപപ്പെടുത്തുകയും ചെയ്യുന്നതാണ്.
ഭരണത്തുടർച്ച പ്രതീക്ഷിച്ച് ബിജെപി
പ്രാദേശിക പാർട്ടികളുടെ സഹായത്തോടെ 2016ൽ അസമിൽ ആദ്യമായി അധികാരത്തിലെത്തിയ ബിജെപി, 2017ലാണ് മണിപ്പൂരിൽ അധികാരം സ്ഥാപിക്കുന്നത്. അഞ്ച് വർഷം പിന്നിടുമ്പോൾ, മണിപ്പൂർ ഉൾപ്പെടെയുള്ള പല സംസ്ഥാനങ്ങളിലെയും പ്രാദേശിക പാർട്ടികളുമായുള്ള ബിജെപിയുടെ സഖ്യബന്ധം തകർന്ന അവസ്ഥയിലാണ്. ഏറ്റവും ഒടുവിലായി നടന്ന മണിപ്പൂർ തെരഞ്ഞെടുപ്പിൽ നാഷണൽ പീപ്പിൾസ് പാർട്ടി (എൻപിപി), നാഗാ പീപ്പിൾസ് ഫ്രണ്ട് (എൻപിഎഫ്) എന്നിവയുമായി വേർപിരിഞ്ഞ ബിജെപി, സ്വതന്ത്രമായി പാർട്ടി സ്ഥാനാർഥികളെ നിർത്തി. അതേസമയം എൻപിപിയും എൻപിഎഫും ബിജെപിക്കെതിരെ സ്ഥാനാർഥികളെ നിർത്തുക മാത്രമല്ല, വിമത ബിജെപി സിറ്റിങ് എംഎൽഎമാരെ സ്വാധീനിക്കാൻ സഹായിക്കുകയും ചെയ്തു.
പ്രധാനമന്ത്രി നരേന്ദ്ര മോദി മണിപ്പൂരിൽ രണ്ടുതവണ പ്രചാരണത്തിനെത്തിയപ്പോൾ കേന്ദ്ര ആഭ്യന്തരമന്ത്രി അമിത് ഷായും രണ്ട് ഘട്ടങ്ങളിലായി നടന്ന തെരഞ്ഞെടുപ്പിന് മുന്നോടിയായി രണ്ട് തവണ സംസ്ഥാനം സന്ദർശിച്ചു. കൂടാതെ പ്രതിരോധ മന്ത്രി രാജ്‌നാഥ് സിങ്, ബിജെപി അധ്യക്ഷൻ ജെപി നദ്ദ, കേന്ദ്രമന്ത്രി സ്മൃതി ഇറാനി എന്നിവരും പാർട്ടിയുടെ വിവിഐപി പ്രചാരകരിൽ ഉൾപ്പെട്ടിരുന്നു.
അതേസമയം രാഹുൽ ഗാന്ധിയുടെ നേതൃത്വത്തിൽ സംസ്ഥാനത്ത് കോൺഗ്രസിന്‍റെ ശക്തമായ തെരെഞ്ഞെടുപ്പ് പ്രചാരണം നടന്നു. തെരഞ്ഞെടുപ്പിന്‍റെ ഭാഗമായി നടന്ന വെർച്വൽ റാലിയെ അഭിസംബോധന ചെയ്‌തുകൊണ്ട് പ്രിയങ്ക ഗാന്ധിയും രംഗത്തുണ്ടായിരുന്നു. കൂടാതെ തെരഞ്ഞെടുപ്പ് മേൽനോട്ടം വഹിക്കാൻ ജയറാം രമേശിനെപ്പോലുള്ള മുതിർന്ന നേതാക്കളെയും കോൺഗ്രസ് നിയോഗിച്ചിരുന്നു.
മണിപ്പൂരിലെ പ്രതിസന്ധികൾ
മണിപ്പൂരിൽ കഴിഞ്ഞ അഞ്ച് വർഷമായി സർക്കാർ നടത്തിയ വികസന പ്രവർത്തനങ്ങൾക്കൊണ്ട് തുടർച്ചയായി രണ്ടാം തവണയും അധികാരത്തിൽ തിരിച്ചെത്താൻ സാധിക്കുമെന്ന് ബിജെപി ആത്മവിശ്വാസം പ്രകടിപ്പിക്കുമ്പോൾ, സായുധസേനയുടെ പ്രത്യേക അധികാര നിയമം (AFSPA) റദ്ദാക്കുന്നതിൽ സർക്കാരിന്‍റെ പരാജയം തെരഞ്ഞെടുപ്പ് ഫലങ്ങളിലും പ്രകടമാകുമെന്ന് കോൺഗ്രസും മറ്റ് പ്രതിപക്ഷ പാർട്ടികളും പ്രതീക്ഷിക്കുന്നു.
മുഖ്യമന്ത്രി എൻ ബിരേൻ സിങിന്‍റെ നേതൃത്വത്തിലുള്ള ബിജെപി സർക്കാർ ഭരണത്തിൽ കഴിഞ്ഞ അഞ്ച് വർഷത്തിനിടെ മണിപ്പൂരിൽ വികസനം നടന്നുവെന്ന വസ്തുത നിഷേധിക്കാനാവില്ല. ക്രമസമാധാനനില ഗണ്യമായി മെച്ചപ്പെടുത്താൻ കഴിഞ്ഞതുവഴി സംസ്ഥാനത്ത് ബന്ദുകളിലും ഉപരോധങ്ങളിലും ഗണ്യമായ കുറവുണ്ടായി. റോഡ് ഗതാഗതം മെച്ചപ്പെടുത്തുന്നതിനും രാജ്യത്തെ റെയിൽവേ ശൃംഖലയുമായി സംസ്ഥാനത്തെ ബന്ധിപ്പിക്കുന്നതിനും സർക്കാർ നടപടികൾ സ്വീകരിച്ചിട്ടുണ്ട്.
കൂടാതെ ഇംഫാൽ വിമാനത്താവളത്തെ അന്താരാഷ്‌ട്ര നിലവാരത്തിലേക്ക് ഉയർത്തിയതിലും ഇന്ത്യയിലെ പ്രധാന നഗരങ്ങളുമായുള്ള സംസ്ഥാനത്തന്‍റെ ബന്ധം വിപുലീകരിച്ചതിലും ബിജെപി സർക്കാരിന്‍റെ പങ്ക് തള്ളിക്കളയാനാവില്ല. നിർദിഷ്‌ട ഇന്ത്യ-മ്യാൻമർ-തായ്‌ലൻഡ് ട്രൈലാറ്ററൽ ഹൈവേയും മേഖലയിൽ വരാനിരിക്കുന്ന 9,000 കോടി രൂപയുടെ പ്രകൃതി വാതക പൈപ്പ് ലൈനും സർക്കാരിന്‍റെ വികസന അവകാശവാദങ്ങളെ സാക്ഷ്യപ്പെടുത്തുന്നു.
എന്നിരുന്നാലും മണിപ്പൂരിലെ താഴ്‌വരയും കുന്നുകളും തമ്മിലുള്ള 'വികസന വിഭജനം' പരിഹരിക്കുന്നതിൽ സർക്കാർ പരാജയപ്പെട്ടു. താഴ്‌വരയുടെ കീഴിലുള്ള പല പ്രദേശങ്ങളിലും കാര്യമായ വികസനം വന്നിട്ടുണ്ടെങ്കിലും, ഇത് മലയോര മേഖലകളിലേക്ക് ഇനിയും എത്തിയിട്ടല്ല. അതുകൊണ്ട് തന്നെ ഈ മേഖലകളിലെ ജനജീവിതം ഇപ്പോഴും ദയനീയമാണ്. കൂടാതെ മണിപ്പൂരിലെ 20 അസംബ്ലി സെഗ്‌മെന്‍റുകളിലെ ജനങ്ങൾക്കായി വെറുമൊരു മെഡിക്കൽ കോളജ് മാത്രമാണുള്ളത് എന്നതും സർക്കാരിന്‍റെ വലിയൊരു പോരായ്‌മയാണ്.
READ MORE:അഞ്ചിൽ ആര് നേടും? ജനവിധി കാത്ത് രാജ്യം; വോട്ടെണ്ണൽ എട്ട് മണിക്ക്
സായുധസേനയുടെ പ്രത്യേക അധികാര നിയമമായ അഫ്‌സ്‌പയുമായി (AFSPA) ബന്ധപ്പെട്ടുള്ള നിലപാട് വ്യക്തമാക്കുന്നതിലും ബിജെപി സർക്കാർ പരാജയപ്പെട്ടു. കലാപം നാശം വിതച്ച മണിപ്പൂരിലെ ജനത ഏറെക്കാലമായി അഫ്‌സ്‌പ പിൻവലിക്കണമെന്ന ആവശ്യം ഉന്നയിക്കുന്നു. നാഗാലാൻഡിലെ മോൺ ജില്ലയിലെ ഒട്ടിംഗിൽ 16 സാധാരണക്കാർ കൊല്ലപ്പെട്ടതിന് പിന്നാലെ മണിപ്പൂരിലും വടക്കുകിഴക്കൻ ഇന്ത്യയുടെ മറ്റ് ഭാഗങ്ങളിലും അഫ്‌സ്‌പ വിരുദ്ധ പ്രക്ഷോഭം ശക്തമായി. ബിജെപി ഈ വിഷയത്തിൽ മൗനം പാലിക്കുമ്പോൾ, മണിപ്പൂരിൽ അധികാരത്തിലെത്തിയാൽ നിയമം പിൻവലിക്കുമെന്ന് കോൺഗ്രസും മറ്റ് പാർട്ടികളും ഉറപ്പ് നൽകിയിരിക്കുകയാണ്.
