ഉദയ്‌പൂർ : രണ്ട് വയസുകാരിയെ കഴുത്തറുത്ത് കൊലപ്പെടുത്തി പിതാവ്. ഉദയ്‌പൂരിലെ ഗോഗുണ്ട പൊലീസ് സ്റ്റേഷൻ പരിധിയിലാണ് സംഭവം. പ്രതിയെ പൊലീസ് അടുത്തുള്ള വനത്തിൽ നിന്നും പിടികൂടി. കഴിഞ്ഞ ശനിയാഴ്‌ചയാണ് സംഭവം.
പ്രതി കുട്ടിയെ വീട്ടിൽ നിന്നും ശനിയാഴ്‌ച കൂട്ടിക്കൊണ്ടുപോവുകയും കഴുത്തറുത്ത് കൊലപ്പെടുത്തുകയുമായിരുന്നു. തുടർന്ന് കുട്ടിയുടെ മൃതദേഹം തുണിയിൽ പൊതിഞ്ഞ് അടുത്തുള്ള തടാകത്തിൽ എറിഞ്ഞു. കുട്ടിയുടെ അമ്മ ഇരുവരെയും അന്വേഷിച്ചുവെങ്കിലും കണ്ടെത്താനായില്ല. തുടർന്ന് ഞായറാഴ്‌ചയോടെ കുട്ടിയുടെ മൃതദേഹം തടാകത്തിൽ നിന്ന് കണ്ടെടുത്തു. ഇതോടെയാണ് കൊലപാതക വിവരം പുറത്തറിഞ്ഞത്.
കുട്ടിയുടെ മൃതദേഹം കണ്ടതോടെ പ്രദേശവാസികൾ പൊലീസിൽ വിവരം അറിയിച്ചു. തുടർന്ന് പൊലീസ് സ്ഥലത്തെത്തുകയും അന്വേഷണം ആരംഭിക്കുകയും ചെയ്‌തു. തുടർന്ന് നടത്തിയ തെരച്ചിലിൽ സമീപത്തെ വനമേഖലയിൽ നിന്ന് പിതാവിനെ പൊലീസ് പിടികൂടി. കുടുംബവഴക്കാണ് കൊലപാതകത്തിലേക്ക് നയിച്ചതെന്നാണ് പൊലീസ് സംശയിക്കുന്നത്. കുട്ടിയുടെ മൃതദേഹം ആശുപത്രി മോർച്ചറിയിലേക്ക് മാറ്റി.
Also read: പട്ടി ആട്ടിറച്ചി കഴിച്ചതിന്‍റെ പേരില്‍ അച്ഛന്‍ മകളെ വെടിവച്ച് കൊന്നു
തലോടേണ്ട കൈകൾ കൊലക്കത്തി എടുക്കുമ്പോൾ: മറ്റ് കുട്ടികളെ മർദിച്ചു എന്ന കാരണത്താൽ 12കാരനെ പിതാവ് കഴുത്തിൽ കയർ മുറുക്കി കൊലപ്പെടുത്തി എന്ന വാർത്ത കഴിഞ്ഞ ദിവസം ഏവരെയും ഞെട്ടിച്ചിരുന്നു. ബിഹാറിലെ ഗോപാൽഗഞ്ചിലെ എക്ദേർവ ഗ്രാമത്തിലാണ് സംഭവം. കൊലപാതകത്തിന് ശേഷം പിതാവും കുട്ടിയുടെ മാതാവും ചേർന്ന് മൃതദേഹം അടുത്തുള്ള തടാകത്തിൽ ഉപേക്ഷിക്കുകയായിരുന്നു. പിതാവ് ശംഭം സിങ്ങും മാതാവ് ചോട്ടി ദേവിയും പൊലീസ് പിടിയിലായി. മുങ്ങി മരണം ആണെന്നായിരുന്നു എല്ലാവരുടെയും വിലയിരുത്തൽ. എന്നാൽ പോസ്റ്റുമോർട്ടം റിപ്പോർട്ടിൽ കഴുത്തിന് ഇരുവശത്തും ആഴത്തിലുള്ള മുറിവുകൾ ഉണ്ടെന്ന് കണ്ടെത്തിയതോടെ കൊലപാതകമാണെന്ന് വ്യക്തമായി. തുടർന്ന് നടത്തിയ അന്വേഷണത്തിലാണ് ക്രൂരമായ കൊലപാതകത്തിന്‍റെ ചുരുളഴിഞ്ഞത്.
ആന്ധ്രാപ്രദേശിലെ നന്ദ്യാല ജില്ലയിൽ മകളെ കൊലപ്പെടുത്തി പിതാവ്. ആലമുരു ഗ്രാമത്തിലെ ദേവേന്ദ്ര റെഡ്ഡിയാണ് മകൾ പ്രസന്നയെ (21) ക്രൂരമായി കൊലപ്പെടുത്തിയത്. വിവാഹിതയായ മകൾക്ക് മറ്റൊരു യുവാവുമായി സൗഹൃദം ഉണ്ടെന്ന് കണ്ടെത്തിയതിനെ തുടർന്നായിരുന്നു കൊലപാതകം. കൃത്യം നടത്തിയ ശേഷം ബന്ധുക്കളുടെ സഹായത്തോടെ രണ്ട് കഷണങ്ങളാക്കി കാട്ടിൽ ഉപേക്ഷിക്കുകയായിരുന്നു.
Also read: ദുരഭിമാനക്കൊല : മകളെ കൊന്ന് രണ്ട് കഷണങ്ങളാക്കി കാട്ടിലുപേക്ഷിച്ച പിതാവ് പിടിയിൽ
തെലങ്കാനയിൽ പതിനഞ്ചുകാരിയെ പിതാവ് കോടാലി കൊണ്ട് വെട്ടിക്കൊലപ്പെടുത്തിയതും നടുക്കുന്ന സംഭവമായിരുന്നു. എട്ട് തവണയാണ് പിതാവ് പെൺകുട്ടിയെ കോടാലി കൊണ്ട് വെട്ടിയത്. പാത്തപ്പള്ളി സ്വദേശി രാജശേഖർ ആണ് മകളായ ഗീതയെ (15) കൊലപ്പെടുത്തിയത്. പെൺകുട്ടിക്ക് ഗ്രാമത്തിലെ തന്നെ യുവാവുമായുള്ള സൗഹൃദത്തെ തുടർന്നുള്ള തർക്കമാണ് കൊലപാതകത്തിൽ കലാശിച്ചത്.
Also read: യുവാവുമായുള്ള സൗഹൃദത്തെ ചൊല്ലി തർക്കം; അച്ഛന്‍ മകളെ കോടാലി കൊണ്ട് എട്ട് തവണ വെട്ടി കൊലപ്പെടുത്തി
ആട്ടിറച്ചി നായ കഴിച്ചതിന്‍റെ പേരിലായിരുന്നു മഹാരാഷ്‌ട്രയിലെ ഒസ്‌മാൻബാദിൽ മാതാപിതാക്കൾ മകളെ കൊലപ്പെടുത്തിയത്. കേസിൽ മഹാരാഷ്‌ട്രയിലെ ഗണേഷ് ബോസ്‌ലെ, മീരാബായി ഗണേഷ് ബോസ്‌ലെ എന്നീ ദമ്പതികൾ പിടിയിലായി. 22കാരിയായ കാജൾ മനോജ് എന്ന പെൺകുട്ടിയെ പിതാവായ ഗണേഷ് വെടിയുതിർത്ത് കൊലപ്പെടുത്തുകയായിരുന്നു.
