പാൽഘർ: വേർപിരിഞ്ഞ് കഴിയുകയായിരുന്ന ഭാര്യയുടെ കാമുകനെ ഭർത്താവ് കഴുത്ത് ഞെരിച്ച് കൊലപ്പെടുത്തി. സംഭവത്തിൽ കിരൺ ഹിംഗ (29) എന്നയാൾ ശനിയാഴ്‌ച അറസ്റ്റിലായി. ദിനേശ് റൗട്ടെ (39) ആണ് കൊല്ലപ്പെട്ടത്.
മഹാരാഷ്ട്രയിലെ പാൽഘർ ജില്ലയിലെ വസായ് തഹ്‌സിലിൽ വെള്ളിയാഴ്‌ച രാത്രിയോടെയായിരുന്നു സംഭവം. വസായിലെ നായിക് പാഡയിലാണ് കിരൺ ഹിംഗ താമസിച്ചിരുന്നത്. എന്നാൽ ഇയാളുടെ ഭാര്യ ഇയാളിൽ നിന്നും അകന്ന് കാമുകനായ ദിനേശിനോടൊപ്പം താമസിച്ചു വരികയായിരുന്നു.
വീട്ടിലേക്ക് മടങ്ങാൻ പ്രതി പലതവണ ആവശ്യപ്പെട്ടെങ്കിലും ഭാര്യ അത് നിരസിച്ചു. ഇതിൽ രോഷാകുലനായ കിരൺ രാത്രി 9 മണിയോടെ ദിനേശിന്‍റെ വീട്ടിലെത്തി ഇയാളെ കഴുത്ത് ഞെരിച്ച് കൊലപ്പെടുത്തുകയായിരുന്നുവെന്ന് പൊലീസ് പറയുന്നു.
ബഹളം കേട്ട് ഓടിക്കൂടിയ അയൽവാസികളിൽ ഒരാളാണ് പൊലീസിൽ വിവരമറിയിച്ചത്. ഉടൻതന്നെ പൊലീസ് സ്ഥലത്തെത്തി മൃതദേഹം പോസ്റ്റ്‌മോർട്ടത്തിനായി സർക്കാർ ആശുപത്രിയിലേക്ക് അയച്ചു. തുടർന്ന് ഇന്ന് പുലർച്ചെയോടെ പ്രതിയെ അറസ്റ്റ് ചെയ്യുകയായിരുന്നുവെന്നും പൊലീസ് അറിയിച്ചു.
ALSO READ: ശിവസേന നേതാവിനെ കൊലപ്പെടുത്താൻ ശ്രമിച്ച കേസ്; എസ്.ഡി.പി.ഐ പ്രവർത്തകർക്ക് പത്തുവർഷം തടവും പിഴയും
