പനാജി: മഹാരാഷ്‌ട്രയില്‍ വിശ്വാസവോട്ടെടുപ്പിന് ശേഷം മന്ത്രിസഭ രൂപീകരണം സംബന്ധിച്ച് തീരുമാനമെടുക്കുമെന്ന് ശിവസേന വിമത എം.എൽ.എ ദീപക് കേസർകർ. മുഖ്യമന്ത്രി ഏക്‌നാഥ് ഷിൻഡെയും ഉപമുഖ്യമന്ത്രി ദേവേന്ദ്ര ഫഡ്‌നാവിസും പ്രഖ്യാപനം നടത്തുമെന്നും അദ്ദേഹം വെള്ളിയാഴ്‌ച പറഞ്ഞു. വിമത എം.എല്‍.എമാര്‍ ക്യാമ്പ് ചെയ്യുന്ന ഗോവയിലെ ഹോട്ടലില്‍വച്ച് മാധ്യമങ്ങളോട് സംസാരിക്കുകയായിരുന്നു കേസര്‍കര്‍.
'അതേ, 'ഇ.ഡി' സര്‍ക്കാര്‍ തന്നെ': പുതിയ സർക്കാരിന്‍റെ വിശ്വാസവോട്ടെടുപ്പ് ജൂലൈ നാലിന് നടക്കും. മന്ത്രിസഭയില്‍ ഉള്‍പ്പെടേണ്ടവരെക്കുറിച്ചോ അവര്‍ക്ക് വീതിച്ചുനല്‍കേണ്ട വകുപ്പുകൾ സംബന്ധിച്ചോ ഇതുവരെ ഒരു ചർച്ചയും നടന്നിട്ടില്ലെന്നും അദ്ദേഹം പറഞ്ഞു. മഹാരാഷ്‌ട്രയില്‍ അധികാരമേറ്റത് 'ഇ.ഡി' സര്‍ക്കാരാണെന്ന സോഷ്യല്‍ മീഡിയയുടെ പരിഹാസം ചൂണ്ടിക്കാണിച്ച മാധ്യമങ്ങളുടെ ചോദ്യത്തോടും അദ്ദേഹം പ്രതികരിച്ചു.
'ഇ.ഡി' എന്നാൽ ഏക്‌നാഥ്- ദേവേന്ദ്ര കൂട്ടുകെട്ടാണ്. അത് മഹാരാഷ്‌ട്രയുടെ പുരോഗതിക്കായുള്ളതാണെന്നും വിമത എം.എല്‍.എ മറുപടി നല്‍കി. ''ഇ.ഡി (എൻഫോഴ്‌സ്‌മെന്‍റ് ഡയറക്‌ടറേറ്റ്) നിങ്ങളെ അന്വേഷണത്തിനായി വിളിച്ചേക്കാം. എന്നാല്‍, ആ സമയത്ത് നിങ്ങൾ ഹാജരാകുകയും കൃത്യമായ വിശദീകരണം നല്‍കുകയും ചെയ്‌ത് ക്ലീൻ ചിറ്റ് നേടുകയുമാണ് വേണ്ടത്.'' - കേസര്‍കര്‍ പറഞ്ഞു.
ഉദ്ധവ് താക്കറെയുടെ നേതൃത്വത്തിലുള്ള ശിവസേനയെയും ബി.ജെ.പിയുടെ എതിരാളികളായ പ്രതിപക്ഷ പാര്‍ട്ടികളെയും ഇല്ലാതാക്കാന്‍ ഇ.ഡിയെ കേന്ദ്രം ദുരുപയോഗം ചെയ്യുന്നുവെന്ന് മാധ്യമങ്ങള്‍ ഉന്നയിച്ചപ്പോഴാണ് കേസര്‍കര്‍ ഇക്കാര്യം വ്യക്തമാക്കിയത്.
ഷിൻഡെ മുഖ്യമന്ത്രിയായതോടെ ശിവസേന സ്ഥാപകൻ ബാല്‍ താക്കറേയുടെ സ്വപ്‌നം പൂവണിഞ്ഞു. ശിവസൈനികൻ സംസ്ഥാനത്തിന്‍റെ മുഖ്യമന്ത്രിയാകാനായിരുന്നു ബാലാസാഹേബ് എപ്പോഴും ആഗ്രഹിച്ചിരുന്നതെന്നും അദ്ദേഹം പറഞ്ഞു. എന്നാല്‍, 2019 അഘാഡി സർക്കാർ രൂപീകരിച്ചപ്പോൾ ഉദ്ധവ് താക്കറെയെ മുഖ്യമന്ത്രിയാക്കാൻ എൻ.സി.പി അധ്യക്ഷൻ ശരദ് പവാറാണ് നിർബന്ധിച്ചതെന്നും അദ്ദേഹം ആരോപിച്ചു.
ALSO READ| ശിവസേനയുടെ ഹർജി: ജൂലൈ 11ന് പരിഗണിക്കുമെന്ന് സുപ്രീം കോടതി
