ദതിയ (മധ്യപ്രദേശ്) : ഭക്ഷണം വാങ്ങാന്‍ പണം ചോദിച്ചതിന് ആറുവയസുകാരനെ കഴുത്തുഞെരിച്ച് കൊലപ്പെടുത്തി പൊലീസ് ഉദ്യോഗസ്ഥന്‍. മധ്യപ്രദേശിലെ ദതിയയിലാണ് ദാരുണമായ സംഭവം നടന്നത്. സംഭവത്തില്‍ ഗ്വാളിയോറിലെ പൊലീസ് ട്രെയിനിങ് സെന്‍ററിലെ കോണ്‍സ്റ്റബിള്‍ രവി ശര്‍മയെ പൊലീസ് അറസ്റ്റ് ചെയ്‌തു.
'ദതിയയില്‍ വച്ച് നടന്ന രഥയാത്രക്കിടെ കുട്ടി രവിയോട് ഭക്ഷണം വാങ്ങാൻ കുറച്ച് പണം ചോദിച്ചു. എന്നാല്‍ പണം നല്‍കാന്‍ വിസമ്മതിച്ച രവി കുട്ടിയെ ഓടിച്ചുവിട്ടു. എന്നാൽ കുട്ടി വീണ്ടും വന്ന് പണം ചോദിക്കുകയും ഇതില്‍ രോഷാകുലനായ രവി കുട്ടിയെ കഴുത്ത് ഞെരിച്ചു കൊലപ്പെടുത്തുകയുമായിരുന്നു ' - ദതിയ പൊലീസ് സൂപ്രണ്ട് അമൻ സിങ് റാത്തോഡ് പറഞ്ഞു.
നിര്‍ണായകമായത് സിസിടിവി ദൃശ്യം : കൊലപാതകത്തിന് ശേഷം മൃതദേഹം കാറിന്‍റെ ഡിക്കിയില്‍ ഒളിപ്പിച്ച് രവി ഗ്വാളിയോറിലേക്ക് തിരികെ പോയി. ഇതിന് ശേഷം മൃതദേഹം ഒഴിഞ്ഞ സ്ഥലത്ത് ഉപേക്ഷിച്ചു. അതേസമയം പഞ്ച്ശീല്‍ നഗര്‍ സ്വദേശി സഞ്ജീവ് സെന്‍ എന്നയാള്‍ മകനെ രഥ യാത്രയ്ക്ക് ശേഷം കാണാനില്ലെന്ന് കാണിച്ച് പൊലീസില്‍ പരാതി നല്‍കിയിരുന്നു.
തുടര്‍ന്ന് നടത്തിയ അന്വേഷണത്തില്‍ കുട്ടിയുടെ മൃതദേഹം ലഭിച്ചു. കുറ്റകൃത്യം നടന്ന സ്ഥലത്തുകൂടി രവിയുടെ കാര്‍ കടന്നുപോകുന്നത് സിസിടിവി ദൃശ്യങ്ങളില്‍ നിന്ന് അന്വേഷണ സംഘം കണ്ടെത്തിയതാണ് കേസില്‍ നിര്‍ണായകമായത്. ദതിയയിലെ രഥ യാത്രയ്ക്ക് ഡ്യൂട്ടിക്ക് പോയതാണെന്ന് രവി അന്വേഷണ സംഘത്തോട് പറഞ്ഞത്.
മറ്റ് രണ്ട് പൊലീസ് കോൺസ്റ്റബിൾമാരും രവിയ്ക്ക് ഒപ്പം കാറില്‍ ഗ്വാളിയോറിലേക്ക് മടങ്ങിയിരുന്നു. ചോദ്യം ചെയ്യലില്‍ ഡിക്കിയില്‍ മറ്റാരോ മൃതദേഹം കാറില്‍ ഉപേക്ഷിച്ചതാകാമെന്നാണ് ഇയാള്‍ അന്വേഷണ സംഘത്തോട് പറഞ്ഞത്. എന്നാല്‍ പൊലീസ് സിസിടിവി ദൃശ്യം കാണിച്ചതോടെ ഇയാള്‍ കുറ്റസമ്മതം നടത്തി.
തനിക്ക് വിഷാദരോഗം ഉണ്ടായിരുന്നുവെന്നും കുട്ടി നിരന്തരം പണം ആവശ്യപ്പെട്ടപ്പോൾ പ്രകോപിതനായെന്നുമാണ് പ്രതി പൊലീസിന് നല്‍കിയ മൊഴി. ഇയാളെ സർവീസിൽ നിന്ന് പിരിച്ചുവിടണമെന്ന് ആവശ്യപ്പെട്ട് ദതിയ പൊലീസ് സൂപ്രണ്ട് സംസ്ഥാന പൊലീസ് ആസ്ഥാനത്തേക്ക് കത്തയച്ചിട്ടുണ്ട്.
