വാരാണസി: അടുത്ത വര്‍ഷം നടക്കാനിരിക്കുന്ന ലോക്‌സഭ തെരഞ്ഞെടുപ്പില്‍ കോണ്‍ഗ്രസ് മുന്‍ അധ്യക്ഷനും മുതിര്‍ന്ന നേതാവുമായ രാഹുല്‍ ഗാന്ധി അമേഠി മണ്ഡലത്തില്‍ നിന്ന് മത്സരിക്കുമെന്നറിയിച്ച് ഉത്തര്‍പ്രദേശിലെ കോണ്‍ഗ്രസ് അധ്യക്ഷന്‍ അജയ് റായ്. പ്രിയങ്ക ഗാന്ധി വാരാണസിയില്‍ നിന്ന് നരേന്ദ്രമോദിക്കെതിരെ മത്സരിക്കാന്‍ താത്പര്യപ്പെടുന്നെങ്കില്‍ പ്രവര്‍ത്തകര്‍ വിജയമുറപ്പാക്കുമെന്നും അദ്ദേഹം പറഞ്ഞു.
ശ്രദ്ധാകേന്ദ്രമായി അമേഠിയും വാരാണസിയും : ഉറപ്പായും രാഹുല്‍ ഗാന്ധി അമേഠിയില്‍ നിന്ന് മത്സരിക്കും. പ്രിയങ്ക ഗാന്ധി ആഗ്രഹിക്കുന്നുവെങ്കില്‍, വാരാണസിയില്‍ മത്സരിക്കാം. അങ്ങനെയെങ്കില്‍ ഓരോ പാർട്ടി പ്രവർത്തകരും അവരുടെ വിജയത്തിനായി കഠിനാധ്വാനം ചെയ്യുമെന്നും അജയ് റായ് പറഞ്ഞു.
സ്മൃതി ഇറാനിക്ക് രൂക്ഷ വിമര്‍ശനം: സ്മൃതി ഇറാനി പരിഭ്രാന്തിയിലാണ്. അമേഠിയിലെ ജനങ്ങൾക്ക് 13 രൂപയ്ക്ക് പഞ്ചസാര എത്തിക്കുമെന്ന് വാഗ്ദാനം ചെയ്യുകയും ബിജെപിക്ക് വോട്ട് ചെയ്യാൻ ജനങ്ങളോട് അവര്‍ ആവശ്യപ്പെടുകയും ചെയ്തിരുന്നു. എന്നിട്ട് അവര്‍ക്ക് അതിന് കഴിഞ്ഞോയെന്ന് അജയ് റായ് ചോദിച്ചു. അതേസമയം 2014 ലെയും 2019 ലെയും ലോക്‌സഭ തെരഞ്ഞെടുപ്പില്‍ ഉത്തര്‍പ്രദേശിലെ വാരാണസിയില്‍ പ്രധാനമന്ത്രി നരേന്ദ്രമോദിക്കെതിരെ അജയ് റായ് മത്സരിക്കുകയും പരാജയപ്പെടുകയും ചെയ്തിരുന്നു. വ്യാഴാഴ്‌ചയാണ് (17.08.2023) കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ അജയ് റായിയെ ഉത്തര്‍പ്രദേശ് കോണ്‍ഗ്രസ് കമ്മിറ്റിയുടെ പ്രസിഡന്‍റായി നിയമിച്ചത്.
പ്രസംഗവും കേസും അയോഗ്യതയും: 2019 ലെ ലോക്‌സഭ തെരഞ്ഞെടുപ്പില്‍ രാഹുല്‍ ഗാന്ധി അമേഠിയില്‍, കേന്ദ്രമന്ത്രിയും ബിജെപി നേതാവുമായ സ്മൃതി ഇറാനിയോട് പരാജയപ്പെട്ടിരുന്നു. എന്നാല്‍ കേരളത്തിലെ വയനാട് ലോക്‌സഭ മണ്ഡലത്തില്‍ നിന്ന് അദ്ദേഹം വിജയിക്കുകയും ചെയ്‌തു. എന്നാല്‍ തെരഞ്ഞെടുപ്പിന്‍റെ ഭാഗമായി 2019 ഏപ്രിൽ 13ന് കർണാടകയിലെ കോലാറിൽ തെരഞ്ഞെടുപ്പ് റാലിക്കിടെ രാഹുൽ ഗാന്ധി നടത്തിയ മോദി പരാമർശം കേസിലേക്കും അതുവഴി അയോഗ്യതയിലേക്കും നയിച്ചിരുന്നു.
അയോഗ്യത വന്നത് ഇങ്ങനെ: നീരവ് മോദിയോ ലളിത് മോദിയോ നരേന്ദ്ര മോദിയോ ആകട്ടെ. എന്തുകൊണ്ടാണ് എല്ലാ കള്ളന്മാരുടെയും പേരിൽ മോദി എന്നുള്ളത് എന്നായിരുന്നു രാഹുൽ ഗാന്ധിയുടെ ഈ വിവാദ പരാമർശം. തുടർന്ന് ബിജെപി സൂറത്ത് വെസ്റ്റ് എംഎൽഎ പൂർണേഷ് മോദി രാഹുല്‍ ഗാന്ധിക്കെതിരെ പരാതി നൽകുകയായിരുന്നു.
രാഹുൽ നടത്തിയ പരാമർശം മോദി സമുദായത്തെ അപകീർത്തിപ്പെടുത്തി എന്ന് ചൂണ്ടിക്കാട്ടിയായിരുന്നു പൂർണേഷ് മോദിയുടെ പരാതി .ഇതിനെ തുടർന്ന് ഇന്ത്യൻ ശിക്ഷാ നിയമത്തിലെ (ഐപിസി) 499, 500 (അപകീർത്തിപ്പെടുത്തൽ) പ്രകാരം, മാർച്ച് 23ന് സൂറത്ത് കോടതി രാഹുലിന് രണ്ട് വർഷത്തെ തടവ് ശിക്ഷ വിധിച്ചു.
