ന്യൂഡൽഹി : മണിപ്പൂരിൽ വംശീയ കലാപത്തിന്‍റെ (Manipur Violence) പശ്ചാത്തലത്തിൽ കുക്കി സമുദായക്കാർക്കായി പ്രത്യേക ഭൂപ്രദേശം (Separate Territory For Kukis) അനുവദിക്കാനുള്ള സാധ്യതകൾ സർക്കാർ പരിശോധിക്കുന്നതായി ആഭ്യന്തര മന്ത്രാലയം. പുതുച്ചേരി മാതൃകയിൽ (Puducherry Model) തങ്ങൾക്കായി കേന്ദ്ര ഭരണ പ്രദേശം അനുവദിക്കണമെന്ന കുക്കി സമുദായക്കാരുടെ നീണ്ട നാളത്തെ ആവശ്യം പരിഗണിച്ചാണ് സർക്കാർ അത്തരം സാധ്യതകൾ പരിശോധിക്കുന്നത്. സംസ്ഥാനത്ത് സമാധാനം കൊണ്ടുവരാനുള്ള പരിഹാര മാർഗമെന്ന നിലയിലും ആഭ്യന്തര മന്ത്രാലയം ഇത് കണക്കാക്കുന്നു.
ആഭ്യന്തര മന്ത്രി അമിത് ഷായുമായി അടുത്തിടെ കുക്കി - സോ സമുദായക്കാർ (kuki-zo community) നടത്തിയ കൂടിക്കാഴ്‌ചയിൽ ഇവർക്ക് കേന്ദ്രഭരണ പ്രദേശ പദവി അനുവദിക്കണമെന്ന് ആവശ്യപ്പെട്ടിരുന്നു. ഈ വർഷം മെയ്‌ മൂന്നിനാണ് മണിപ്പൂരിൽ കുക്കി - മെയ്‌തി സമുദായക്കാർ തമ്മിൽ വംശീയ കലാപം ആരംഭിക്കുന്നത്. ഇതിന് പിന്നാലെ തന്നെ ചുരാചന്ദ്‌പൂർ, കാങ്‌പോക്‌പി, ചന്ദേൽ, തെങ്‌നൗപൽ, ഫെർസാവൽ തുടങ്ങിയ അഞ്ച് ജില്ലകളിൽ പ്രത്യേക ഭരണം നടപ്പാക്കണമെന്ന് കുക്കി സമുദായക്കാർ ആവശ്യപ്പെട്ടത്.
മണിപ്പൂരിലെ ഏറിയ ഭൂരിഭാഗവും മെയ്‌തി സമുദായത്തിൽപ്പെട്ടവരാണ്. തങ്ങളുടെ കമ്മ്യൂണിറ്റിക്കായി പ്രത്യേക ഭരണകൂടം സൃഷ്‌ടിക്കുന്നതിലൂടെ മാത്രമേ ഇപ്പോഴത്തെ പ്രതിസന്ധി പരിഹരിക്കാനാകൂ എന്നാണ് കുക്കി സമുദായത്തിന്‍റെ പക്ഷം. ന്യൂഡൽഹിയിൽ എ കെ മിശ്രയുമായാണ് ഇതിന് മുൻപ് കുക്കി - സോ സമുദായക്കാർ കൂടിക്കാഴ്‌ച നടത്തിയത്.
മണിപ്പൂരിൽ കുക്കികൾ പരാമർശിച്ച അഞ്ച് ജില്ലകളും ഭൂമിശാസ്‌ത്രപരമായി അടുത്തടുത്തല്ല സ്ഥിതി ചെയ്യുന്നത്. ഇക്കാരണത്താൽ തമിഴ്‌നാട്, കേരളം, ആന്ധ്രപ്രദേശ് എന്നീ സംസ്ഥാനങ്ങളോട് ചേർന്ന് കിടക്കുന്ന പുതുച്ചേരി മാതൃകയിലാണ് കുക്കി സമുദായക്കാർ കേന്ദ്രഭരണ പ്രദേശം ആവശ്യപ്പെടുന്നത്. അതേസമയം, കുക്കികൾക്കായി പ്രത്യേക ഭരണം സ്ഥാപിക്കുന്നതിനെ മെയ്‌തി സമുദായക്കാരും മണിപ്പൂർ മുഖ്യമന്ത്രി എൻ ബിരേൻ സിംഗും ഇതിനോടകം തന്നെ വിയോജിപ്പ് അറിയിച്ചിട്ടുണ്ട്.
മുഖ്യമന്ത്രിയുടെ കുടുംബവീടിന് നേരെ ആക്രമണ ശ്രമം : കഴിഞ്ഞ ദിവസം മണിപ്പൂർ മുഖ്യമന്ത്രി എന്‍ ബിരേന്‍ സിങ്ങിന്‍റെ (Manipur CM N Biren Singh) കുടുംബ വീടിന് നേരെ ആള്‍ക്കൂട്ട ആക്രമണം നടത്താന്‍ ശ്രമം നടന്നിരുന്നു. സംസ്ഥാന തലസ്ഥാനമായ ഇംഫാലിലെ വീടിന് നേരെയാണ് ആക്രമണത്തിന് ശ്രമം നടന്നത്. നിലവിൽ ആക്രമണം രൂക്ഷമായതിനെ തുടർന്ന് കർഫ്യൂ പ്രഖ്യാപിച്ചിട്ടുള്ള മണിപ്പൂരിൽ എല്ലാ സുരക്ഷ നിയന്ത്രണങ്ങളും അവഗണിച്ചാണ് ആള്‍ക്കൂട്ടം ഹെയിന്‍ഗാങിലെ വീട് ആക്രമിക്കാനെത്തിയത്. സംഭവത്തിന് പിന്നാലെ സുരക്ഷ ഉദ്യോഗസ്ഥര്‍ ആകാശത്തേക്ക് വെടിയുതിര്‍ത്തിരുന്നു.
