ബെംഗളൂരു: ഒരു വർഷത്തെ ശമ്പളം കൊവിഡ് ദുരിതാശ്വാസ പ്രവര്‍ത്തനങ്ങള്‍ക്കായി സംഭാവന ചെയ്ത് കർണാടക മന്ത്രിമാർ. സംസ്ഥാനത്താകെ പുതുതായി 230 ഏക്കർ ഭൂമി ശ്മശാന ആവശ്യങ്ങൾക്കായി മാറ്റിവച്ചതായും റവന്യൂ മന്ത്രി ആർ.അശോക പറഞ്ഞു.
സംസ്ഥാനത്ത് കൊവിഡ് ബാധിതരുടെ എണ്ണം പ്രതിദിനം വർധിക്കുന്ന സാഹചര്യത്തിൽ മൃതദേഹങ്ങൾ മറവുചെയ്യുന്നതിൽ പ്രതിസന്ധിയുണ്ടായി. ഈ സാഹചര്യത്തിലാണ് മവല്ലിപുര, ഗിദ്ദനഹള്ളി, തവാരകെരെ പ്രദേശങ്ങളിൽ പുതിയതായി ശ്മാശാനങ്ങൾ ആരംഭിക്കാൻ തീരുമാനിച്ചത്. ഗിദ്ദനഹള്ളി, തവാരകെരെ എന്നിവിടങ്ങളില്‍ 70 മൃതദേഹങ്ങൾ സംസ്‌കരിക്കാനുള്ള ശേഷിയുള്ള ശ്മശാനങ്ങള്‍ പ്രവർത്തനമാരംഭിച്ചു. 40 മൃതദേഹങ്ങൾ സംസ്‌കരിക്കാന്‍ സാധിക്കുന്ന ശ്മശാനം മവല്ലിപ്പുരയിൽ ഉടൻ പ്രവർത്തനം ആരംഭിക്കും.
സംസ്ഥാനത്ത് കൊവിഡ് നിയന്ത്രങ്ങൾ കർശനമാക്കാന്‍ എല്ലാ ജില്ലകളിലെയും എസ്പിമാര്‍ക്ക് നിർദേശം നൽകിയതായി ആഭ്യന്തരമന്ത്രി ബസവരാജ് ബൊമ്മൈ പറഞ്ഞു. കൊവിഡ് രോഗികളെ കണ്ടെത്തുന്നതിനും വീട് ഐസോലേറ്റ് ചെയ്യുന്നതിനും 15,000 സിവിൽ ഡിഫൻസ് വോളന്റിയർമാരെ നിയോഗിക്കാനും സർക്കാർ തീരുമാനിച്ചു.
മുന്നൂറോളം തടവുകാർക്ക് കൊവിഡ് സ്ഥിരീകരിച്ചതായും മന്ത്രി വ്യക്തമാക്കി. ജയിലുകളിൽ ശുചിത്വവൽക്കരണം നടക്കുന്നുണ്ട്. രോഗം സ്ഥിരീകരിച്ച തടവുകാരെ നിരീക്ഷണത്തിലാക്കിയിട്ടുണ്ട്. കർണാടകയിൽ ബുധനാഴ്ച 39,000 പേർക്കാണ് രോഗം സ്ഥിരീകരിച്ചത്. ഏപ്രിൽ 27 ന് രാത്രി മുതൽ മെയ് 12ന് രാവിലെ വരെ കർണാടകയിലെ നഗരപ്രദേശങ്ങളിൽ ലോക്ക് ഡൗൺ ഏർപ്പെടുത്തിയിട്ടുണ്ട്.
