തുടർഭരണത്തിന് ബിജെപി, തിരിച്ചുവരാൻ കോണ്‍ഗ്രസ്, പ്രതാപം തേടി ജെഡിഎസ്; കന്നഡ മണ്ണില്‍ രാഷ്ട്രീയപ്പോര്

ഇത്തരത്തിൽ പിടിച്ചെടുത്ത സംസ്ഥാനം എന്ന നിലയിലും അധികാരത്തിലുള്ള ഒരേ ഒരു സംസ്ഥാനം എന്ന നിലയില്‍ കർണാടക നിയമസഭ തെരഞ്ഞെടുപ്പ് ബിജെപിക്ക് ഏറെ നിർണായകമാണ്.

ബെംഗളൂരു (കർണാടക): കർഷക മനസ് വോട്ടാക്കിയും പണക്കൊഴുപ്പിന്‍റെ പോരാട്ടവും ഒരുപോലെയാണ് കർണാടകയിലെ രാഷ്‌ട്രീയപ്പോരിനുള്ളത്. കോണ്‍ഗ്രസിനും ബിജെപിക്കും ഒരുപോലെ വേരോട്ടമുള്ള മണ്ണ്. സോഷ്യലിസ്റ്റ് വളക്കൂറുള്ള കന്നഡ മണ്ണില്‍ ജെഡിഎസിനും സ്വാധീനം.

നിയമസഭ തെരഞ്ഞെടുപ്പ് പ്രഖ്യാപിക്കുന്നതിന് മുന്നേ തന്നെ ശക്തമായ പ്രചാരണവും ആരോപണ പ്രത്യാരോപണങ്ങളും കൊണ്ട് തിളച്ചുമറിയുകയാണ് കന്നഡ നാട്. ഭരണം നിലനിർത്താൻ ബിജെപിയും അധികാരം തിരിച്ചു പിടിക്കാൻ കോൺഗ്രസും ശ്രമിക്കുമ്പോൾ പഴയ പ്രതാപത്തിന്‍റെ നിഴലില്‍ നിന്ന് പോരാടാനൊരുങ്ങുകയാണ് ജെഡിഎസ്. ബിജെപി തുടർഭരണമാണ് ലക്ഷ്യമിടുന്നതെങ്കിൽ 2018ല്‍ റിസോർട്ട് രാഷ്‌ട്രീയത്തിൽ തകർന്ന കോണ്‍ഗ്രസിനും ജെഡിഎസിനും തിരിച്ചുവരവിന്‍റെ തെരഞ്ഞെടുപ്പ് കൂടിയാണിത്.

കോൺഗ്രസ് അധ്യക്ഷനായി തെരഞ്ഞെടുക്കപ്പെട്ട ശേഷം ജന്മനാട്ടില്‍ ആദ്യമായി നടക്കുന്ന തെരഞ്ഞെടുപ്പ് എന്ന നിലയില്‍ മല്ലികാർജുൻ ഖാർഗെയ്‌ക്കും ഈ പോരാട്ടം ഏറെ നിർണായകമാണ്. ദക്ഷിണേന്ത്യൻ സംസ്ഥാനങ്ങളിൽ പ്രാദേശിക പാർട്ടികളെക്കാൾ ദേശീയ പാർട്ടികൾക്ക് കൂടുതൽ പിന്തുണയുള്ള സംസ്ഥാനങ്ങളിൽ ഒന്നാണ് കർണാടക. അതിനാൽ തന്നെ തെരഞ്ഞെടുപ്പിൽ മേൽക്കൈ നേടുന്നതിനായി വ്യത്യസ്‌തങ്ങളായ തന്ത്രങ്ങളുമായാണ് ദേശീയ പാർട്ടികൾ കർണാടകയിൽ കളത്തിലിറങ്ങുന്നത്.

224 അംഗ കർണാടക നിയമസഭയുടെ നിലവിലെ കാലാവധി മേയ് 24ന് അവസാനിക്കും. 1985 മുതൽ ആർക്കും ഭരണത്തുടർച്ചയില്ലാത്ത കർണാടകയിൽ നിലവിൽ ബിജെപിയാണ് ഭരണപക്ഷത്തുള്ളത്. 119 എംഎൽഎമാരുടെ ഭൂരിപക്ഷത്തിലാണ് ബിജെപി അഞ്ച് വർഷം പൂർത്തിയാക്കിയത്. കോൺഗ്രസിന് 75 എംഎൽഎമാരും ജെഡിഎസിന് 28 എംഎൽഎമാരുമുണ്ട്. 2018ലെ തെരഞ്ഞെടുപ്പ് ഫലം വന്നതിന് ശേഷം ഒട്ടേറെ രാഷ്‌ട്രീയ നാടകങ്ങൾക്ക് സാക്ഷ്യം വഹിച്ച സംസ്ഥാനം കൂടിയാണ് കർണാടക.

റിസോർട്ട് രാഷ്‌ട്രീയത്തിൽ മുങ്ങി: 2018 ലെ നിയമസഭ തെരഞ്ഞെടുപ്പിൽ ബിജെപി 104 സീറ്റുകളും കോൺഗ്രസ് 80 സീറ്റുകളും ജെഡിഎസ് 37 സീറ്റുകളും നേടിയിരുന്നു. ഭൂരിപക്ഷം ലഭിച്ചതോടെ ജെഡിഎസും കോണ്‍ഗ്രസും സഖ്യമുണ്ടാക്കി സർക്കാർ രൂപീകരിച്ചു. ജെഡിഎസിലെ എച്ച്‌ഡി കുമാരസ്വാമിയായിരുന്നു മുഖ്യമന്ത്രി. എന്നാൽ ഒന്നര വർഷത്തിന് ശേഷം ശേഷം ഭരണപക്ഷത്തെ ഞെട്ടിച്ചുകൊണ്ട് കോണ്‍ഗ്രസിന്‍റെ 14 എംഎൽഎമാരും ജെഡിഎസിന്‍റെ മൂന്ന് എംഎൽഎമാരും രാജി സമർപ്പിച്ചു.

കർണാടകയിൽ റിസോർട്ട് രാഷ്‌ട്രീയത്തിന്‍റെ നാളുകളായിരുന്നു പിന്നീട്. എംഎൽഎമാരുടെ രാജിക്ക് പിന്നാലെ 2019 ഡിസംബറിൽ 15 മണ്ഡലങ്ങളിലേക്ക് ഉപതെരഞ്ഞെടുപ്പ് നടന്നു. കർണാടക ഹൈക്കോടതിയിൽ ഹർജികൾ നിലനിൽക്കുന്നതിനാൽ മസ്‌കി (റായിച്ചൂർ ജില്ല), ആർആർ നഗർ (ബാംഗ്ലൂർ സൗത്ത് വെസ്റ്റ്) മണ്ഡലങ്ങളിലേക്കുള്ള ഉപതെരഞ്ഞെടുപ്പ് നടന്നില്ല. ഉപതെരഞ്ഞെടുപ്പ് തൂത്തുവാരിയ ബിജെപി 12 സീറ്റുകൾ നേടി.

കോണ്‍ഗ്രസ് രണ്ട് സീറ്റുകളിലേക്ക് ചുരുങ്ങിയപ്പോൾ ഒരു സീറ്റിൽ സ്വതന്ത്ര സ്ഥാനാർഥിയും വിജയിച്ചു. ഇതോടെ 119 എംഎൽഎമാരുമായി ബിജെപി അധികാരം പിടിച്ചെടുക്കുകയായിരുന്നു. പിന്നാലെ യെദ്യൂരപ്പയുടെ നേതൃത്വത്തിൽ ബിജെപി സർക്കാർ രൂപീകരിച്ചു. പിന്നീട് ഒരു വർഷത്തോളം ഭരിച്ച യെദ്യൂരപ്പ സ്ഥാനമൊഴിഞ്ഞതിനെ തുടർന്ന് ബസവരാജ് ബൊമ്മൈ മുഖ്യമന്ത്രിയായി.

പണി തുടങ്ങി പാർട്ടികൾ: നിയമസഭ തെരഞ്ഞെടുപ്പ് തീയതി പ്രഖ്യാപിക്കുന്നതിന് മുമ്പ് തന്നെ സംസ്ഥാനത്ത് രാഷ്ട്രീയ പാർട്ടികൾ പ്രചാരണം തുടങ്ങിക്കഴിഞ്ഞിരുന്നു. സംസ്ഥാനത്തുട നീളം ബിജെപി ‘വിജയ് സങ്കൽപ യാത്ര’ ആരംഭിച്ചപ്പോൾ ബിജെപി സർക്കാരിനെതിരെ അഴിമതിയാരോപണങ്ങൾ ഉന്നയിച്ച് 'പ്രജാധ്വനി യാത്ര' നടത്തിയാണ് കോൺഗ്രസ് പാർട്ടി പ്രചാരണം ആരംഭിച്ചത്. മറുവശത്ത് 'പഞ്ചരത്ന യാത്ര'യുമായി ജെഡിഎസും പ്രചാരണ രംഗത്ത് സജ്ജീവമാണ്.

ബിജെപിക്കായി പ്രധാനമന്ത്രി നരേന്ദ്ര മോദി ഉൾപ്പെടെയുള്ളവർ സംസ്ഥാനത്ത് പ്രചാരണത്തിന് എത്തിയിരുന്നു. തെരഞ്ഞെടുപ്പ് തീയതി പ്രഖ്യാപിക്കുന്നതിന് മുന്നേ തന്നെ കോണ്‍ഗ്രസ് 124 സ്ഥാനാർഥികളുടെ ആദ്യഘട്ട പട്ടിക പുറത്തിറക്കിയിരുന്നു. 93 മണ്ഡലങ്ങളിലേക്കുള്ള സ്ഥാനാർഥി പട്ടിക ജെഡിഎസും പുറത്തുവിട്ടിട്ടുണ്ട്. അതേസമയം ബിജെപി തങ്ങളുടെ സ്ഥാനാർഥി പട്ടിക ഇതുവരെ പ്രഖ്യാപിച്ചിട്ടില്ല.

മുൻ മന്ത്രിയും ബിജെപിയുടെ ദീർഘകാല പ്രവർത്തകനുമായിരുന്ന ജനാർദൻ റെഡ്ഡി സ്വന്തം പാർട്ടിയായ 'കല്യാൺ രാജ്യ പ്രഗതി പക്ഷ'യുമായി 30ൽ അധികം മണ്ഡലങ്ങളിൽ ഇത്തവണ മത്സര രംഗത്തുണ്ട്. എഎപി 80 സ്ഥാനാർഥികളുടെ ആദ്യ പട്ടികയും ബിഎസ്‌പി 53 സ്ഥാനാർഥികളുടെ ആദ്യ പട്ടികയും പുറത്തിറക്കി മത്സര രംഗത്തെ തങ്ങളുടെ സാന്നിധ്യം അറിയിച്ച്‌ കഴിഞ്ഞിട്ടുണ്ട്.

അഞ്ച് കോടി 21 ലക്ഷം വോട്ടർമാരാണ് കർണാടകയില്‍ ഇത്തവണ തങ്ങളുടെ സമ്മതിദാനാവകാശം രേഖപ്പെടുത്തുക. ഇതില്‍ 2.59 കോടി സ്‌ത്രീ വോട്ടര്‍മാരും 2.62 കോടി പുരുഷ വോട്ടര്‍മാരും ഉള്‍പ്പെടുന്നു. പുതുതായി 9,17,241 വോട്ടര്‍മാര്‍ ഇത്തവണ വോട്ട് രേഖപ്പെടുത്തും. 52,282 പോളിങ് ബൂത്തുകളിലായാണ് തെരഞ്ഞെടുപ്പ് നടക്കുക.