ചമോലി/ രുദ്രപ്രയാഗ് (ഉത്തരാഖണ്ഡ്): അന്താരാഷ്‌ട്ര യോഗ ദിനം ആചരിച്ച് രാജ്യം. ഇന്ത്യന്‍ സൈന്യവും ഇന്‍ഡോ ടിബറ്റന്‍ ബോര്‍ഡര്‍ പൊലീസും ഇന്ത്യ-ചൈന അതിർത്തിയിലാണ് യോഗ ദിനം ആചരിച്ചത്. മഞ്ഞുകൊണ്ട് ചുറ്റപ്പെട്ട കൊടുമുടികള്‍ക്കിടയില്‍ വച്ചുള്ള സേനയുടെ യോഗ ദിനാചരണം വ്യത്യസ്‌ത അനുഭവമാണ് രാജ്യത്തിന് സമ്മാനിച്ചത്. ഇന്ത്യയില്‍ ഏറ്റവും ഉയരത്തിലായി സ്ഥിതി ചെയ്യുന്ന ഗ്രാമമായ മന, ഔലി തുടങ്ങി പിത്തോരഗഡിലെ ഗുഞ്ചി, മിർതി, നാഭിദംഗ് തുടങ്ങി ഉയര്‍ന്ന പ്രദേശങ്ങളിലുള്ള ഔട്ട്‌പോസ്‌റ്റുകളിലും സൈനികര്‍ യോഗ ചെയ്യുകയും രാജ്യത്തിന് ആരോഗ്യത്തിന്‍റെ സന്ദേശം പകരുകയും ചെയ്‌തു.
കൊടുമുടിയും കൊടും മഞ്ഞും വകവയ്‌ക്കാതെ : ഉത്തരാഖണ്ഡിലെ പിത്തോരഗഡ് ജില്ലയിൽ ഇന്ത്യ-ചൈന അതിർത്തിയിൽ സ്ഥിതി ചെയ്യുന്ന നാഭിദംഗിലെ ഗുഞ്ചിലാണ് ഇന്‍ഡോ ടിബറ്റന്‍ ബോര്‍ഡര്‍ പൊലീസിന്‍റെ ഏഴാം ബറ്റാലിയൻ യോഗ അവതരിപ്പിച്ചത്. ഇതുകൂടാതെ ഐടിബിപി ജവാന്മാര്‍ ചമോലി ജില്ലയിലെ ഔലിയില്‍ കൊടും മഞ്ഞിനിടയില്‍ നിന്നാണ് യോഗയുടെ ഭാഗമായത്. ഇവിടെ ഹിമവീറുകളായ വനിത സൈനികാംഗങ്ങളും യോഗയില്‍ പങ്കെടുത്തിരുന്നു.
ധാമുകളിലും യോഗ ദിനാഘോഷം : ഭൂ ബൈകുന്ത് ബദ്രീനാഥ് ധാമിലും രാജ്യത്തെ ആദ്യത്തെ ഗ്രാമമായ മനയിലും യോഗാദിനം ആവേശത്തോടെ തന്നെ ആഘോഷിച്ചു. മനയിൽ ജില്ല ഭരണകൂടത്തിന്‍റെ നേതൃത്വത്തിൽ നടന്ന യോഗ ക്യാമ്പില്‍ ലോകത്തിന്‍റെ പലഭാഗങ്ങളില്‍ നിന്നായുള്ള യോഗ പ്രേമികൾ പങ്കെടുത്തിരുന്നു. ഇവര്‍ക്ക് യോഗാധ്യാപകർ അഭ്യാസമുറയുടെ പ്രാധാന്യത്തെക്കുറിച്ച് വിശദീകരിക്കുകയും ചെയ്‌തു. യോഗയിലൂടെ ശാരീരിക അവയവങ്ങൾക്കൊപ്പം മനസിനും തലച്ചോറിനും ആത്മാവിനും സന്തുലിതാവസ്ഥ സാധ്യമാകുന്നുവെന്ന് ഇവര്‍ അറിയിച്ചു. കൂടാതെ സ്ഥിരമായുള്ള യോഗാഭ്യാസത്തിലൂടെ ശാരീരികവും മാനസികവുമായ പ്രശ്‌നങ്ങളെ മറികടക്കാമെന്നും ക്യാമ്പില്‍ വിശദീകരിച്ചു.
യോഗ ദിനാചരണം ഇവിടങ്ങളിലും : ബദ്രീനാഥ് ധാമിലെ യോഗ ദിനാഘോഷം ക്ഷേത്ര സമുച്ചയത്തിലാണ് നടന്നത്. ജില്ല ഭരണകൂടത്തിന്‍റെ നേതൃത്വത്തിലുള്ള യോഗ ക്യാമ്പില്‍ 50 ലധികം പേർ പങ്കെടുത്ത് പരിശീലനം നേടിയതായി ജില്ല ആയുർവേദ, യുനാനി ഓഫിസർ സുനിൽ റാത്തൂരി പറഞ്ഞു. അതേസമയം കേദാര്‍നാഥ് ധാമിലും അന്താരാഷ്‌ട്ര യോഗ ദിനം പ്രൗഢമായി തന്നെ ആചരിച്ചു.
സമുദ്രനിരപ്പില്‍ നിന്ന് 11,700 അടി ഉയരത്തിലായി 12 ജ്യോതിര്‍ലിംഗങ്ങള്‍ സ്ഥിതി ചെയ്യുന്ന ഇവിടെ ഇന്‍ഡോ ടിബറ്റന്‍ ബോര്‍ഡര്‍ പൊലീസ്, ദേശീയ ദുരന്ത നിവാരണ സേന, സംസ്ഥാന ദുരന്ത നിവാരണ സേന, പൊലീസ്, കേദാര്‍നാഥ് ബദ്രീനാഥ് ക്ഷേത്രങ്ങളിലെ ഭാരവാഹികള്‍, തീര്‍ഥാടകര്‍ എന്നിവര്‍ പങ്കെടുത്തു. ഇവിടങ്ങളിലെല്ലാം തന്നെ ഏതാണ്ട് ഒരു മണിക്കൂര്‍ സമയമാണ് യോഗാഭ്യാസങ്ങളുണ്ടായിരുന്നത്.
അന്താരാഷ്‌ട്ര യോഗ ദിനത്തില്‍ ഐക്യരാഷ്‌ട്രസഭ ആസ്ഥാനത്താണ് പ്രധാനമന്ത്രി നരേന്ദ്ര മോദി യോഗ പരിപാടിക്ക് നേതൃത്വം നല്‍കിയത്. രാജ്യാന്തര തലത്തില്‍ യോഗയുടെ പ്രാധാന്യം പ്രചരിപ്പിക്കുക എന്നതിന്‍റെ ഭാഗമായാണ് പ്രധാനമന്ത്രി യുഎന്‍ ആസ്ഥാനത്ത് യോഗ പരിപാടിക്ക് ആദ്യമായി നേതൃത്വം നല്‍കുന്നത്. ഐക്യരാഷ്‌ട്രസഭയുടെ പ്രത്യേക ക്ഷണപ്രകാരമാണ് പ്രധാനമന്ത്രി നരേന്ദ്രമോദി പരിപാടിയില്‍ പങ്കെടുത്തത്. ഈ പരിപാടിയില്‍ ഐക്യരാഷ്‌ട്രസഭ ഉദ്യോഗസ്ഥര്‍, അംബാസഡര്‍മാര്‍, വിവിധ രാജ്യങ്ങളിലെ പ്രമുഖ വ്യക്തികള്‍ എന്നിവര്‍ പങ്കെടുത്തിരുന്നു.
