വാഷിങ്‌ടൺ: ഇന്ത്യയടക്കമുള്ള ലോകരാജ്യങ്ങൾക്ക്‌ വാക്സിൻ വിതരണം ചെയ്യാനുള്ള യുഎസ്‌ പ്രസിഡന്‍റ്‌ ജോ ബൈഡന്‍റെ തീരുമാനം സ്വാഗതാർഹമെന്ന്‌ അമേരിക്കയിലെ ഇന്ത്യൻ അംബാസിഡർ തരൺജിത്ത്‌ സിങ്‌ സന്ധു. കൊവിഡ്‌ വാക്സിൻ പങ്കുവെക്കുന്ന പദ്ധതിയുടെ ഭാഗമായാണ്‌ അമേരിക്കയുടെ നീക്കമെന്നും സന്ധു പറഞ്ഞു. ഇന്ത്യയുൾപ്പെടയുള്ള രാജ്യങ്ങൾ വാക്സിൻ ക്ഷാമം നേരിടുന്ന സാഹചര്യത്തിലാണ്‌ ബൈഡന്‍റെ പ്രഖ്യാപനമെത്തുന്നത്‌. 25 ദശലക്ഷം ഡോസ് വാക്‌സിനാണ് യു.എസ് ആദ്യഘട്ടത്തിൽ വിതരണം ചെയ്യുന്നത്. കഴിയുന്നത്ര രാജ്യങ്ങളെ സഹായിക്കാനാണ് യു.എസ് സർക്കാർ ശ്രമിക്കുന്നതെന്നും ആഗോളതലത്തിൽ കൊവിഡിനെതിരെ വിജയമുണ്ടാക്കാനാണ് നീക്കമെന്നും യുഎസ്‌ വൈസ്‌ പ്രസിഡന്‍റ്‌ കമല ഹാരിസ് പറഞ്ഞു.
READ MORE:ഇന്ത്യയ്ക്ക് വാക്സിന് നല്‍കുമെന്ന് കമല ഹാരിസ്; നന്ദിയറിയിച്ച് പ്രധാനമന്ത്രി
ഇന്ത്യ, കാനഡ, മെക്‌സികോ, കൊറിയ, വെസ്റ്റ് ബാങ്ക്, ഗാസ, ജോർദ്ദാൻ, ഇറാഖ്, യെമൻ തുടങ്ങിയ രാഷ്ട്രങ്ങൾക്കാണ് അമേരിക്ക വാക്സിൻ നൽകുക. വാക്സിന് വേണ്ടി പല രാജ്യങ്ങളുടെയും അഭ്യർഥനയ്ക്കിടയിലാണ് അമേരിക്കയുടെ പ്രഖ്യാപനം. ഏഷ്യക്ക് ഇത്തരത്തിൽ ലഭിക്കുക ഏഴ് മില്യൺ ഡോസ് വാക്‌സിനാണ്
അതേസമയം, പ്രധാനമന്ത്രി നരേന്ദ്ര മോദി കമല ഹാരിസിന് നന്ദിയറിയിച്ച് ട്വീറ്റ് ചെയ്തു. യു.എസ് ആഗോളതലത്തിൽ വാക്സിന് വിതരണം ചെയ്യുന്നതിന്‍റെ ഭാഗമായി, ഇന്ത്യയ്ക്കും വാക്സിന് നൽകുമെന്ന് ഉറപ്പാക്കിയതിന് അഭിന്ദനം അറിയിക്കുന്നുവെന്നും ഇന്ത്യയ്ക്ക് പിന്തുണയും ഐക്യദാർഢ്യവും നൽകിയതിനും നന്ദിയറിയിക്കുന്നുവെന്നും പ്രധാനമന്ത്രി ട്വിറ്ററിൽ കുറിച്ചു.
