ന്യൂഡല്‍ഹി : ചോദ്യത്തിന് കോഴ വാങ്ങിയെന്ന ആരോപണത്തില്‍ ലോക്‌സഭയില്‍ നിന്ന് പുറത്താക്കപ്പെട്ടിന് (Mahua Moitra expels from Lok Sabha on cash for query case) പിന്നാലെ പ്രതികരണം വ്യക്തമാക്കി തൃണമൂല്‍ കോണ്‍ഗ്രസ് നേതാവ് മഹുവ മൊയ്‌ത്ര. കംഗാരു കോടതി അതിന്‍റെ വധശിക്ഷ നടപ്പിലാക്കി എന്നായിരുന്നു മഹുവയുടെ പ്രതികരണം. പ്രതിപക്ഷത്തെ തകര്‍ക്കാന്‍ സര്‍ക്കാര്‍ ഒരു പാര്‍ലമെന്‍ററി പാനലിനെ ആയുധമാക്കുകയാണ് എന്നും മഹുവ മൊയ്‌ത്ര പറഞ്ഞു. താന്‍ പണമോ സമ്മാനങ്ങളോ കൈപ്പറ്റിയതിന് തെളിവില്ലെന്നും തൃണമൂല്‍ നേതാവ് വ്യക്തമാക്കി.
അതേസമയം ബിജെപി നയിക്കുന്ന കേന്ദ്രസര്‍ക്കാരിന്‍റെ പകപോക്കല്‍ രാഷ്‌ട്രീയമാണ് മഹുവ മൊയ്‌ത്രയുടെ പുറകത്താകലിലൂടെ വ്യക്തമാകുന്നതെന്ന് ഇന്ത്യ സഖ്യം ആരോപിച്ചു (INDIA block on Mahua Moitra Expelling from Lok Sabha). പുതിയ സഭയിലെ കറുത്ത അധ്യായം എന്നാണ് കോണ്‍ഗ്രസ് നേതാവ് അധിര്‍ രഞ്ജൻ ചൗധരി തൃണമൂല്‍ നേതാവിനെതിരായ നടപടിയെ വിശേഷിപ്പിച്ചത്.
എത്തിക്‌സ് പാനല്‍ അംഗമായ ബഹുജന്‍ സമാജ് പാര്‍ട്ടി (ബിഎസ്‌പി) എംപി ഡാനിഷ് അലി എത്തിക്‌സ് കമ്മിറ്റി റിപ്പോര്‍ട്ട് അപൂര്‍ണമാണെന്ന് പ്രതികരിച്ചു (opposition leaders on Mahua Moitra Expelling from Lok Sabha). പാനല്‍ മേധാവി വിനോദ് കുമാര്‍ സോങ്കര്‍ മഹുവയോട് ചോദിച്ച ചോദ്യങ്ങളില്‍ പ്രതിഷേധിച്ച് ഇറങ്ങിപ്പോയ അംഗങ്ങളില്‍ ഒരാളും ആിരുന്നു ഡാനിഷ് അലി.
'റിപ്പോര്‍ട്ട് പൂര്‍ണമാണെന്ന് ഞങ്ങള്‍ വിശ്വസിക്കുന്നില്ല. കാരണം അഞ്ച് എംപിമാരാണ് ഇറങ്ങി പോയത്. രണ്ടര മിനിറ്റിനുള്ളില്‍ റിപ്പോര്‍ട്ട് അംഗീകരിക്കുകയും ചെയ്‌തു. ഇതിന്‍മേല്‍ ഒരു ചര്‍ച്ച വേണമെന്നാണ് ഞങ്ങള്‍ ആവശ്യപ്പെടുന്നത്. ചില മോശം ചോദ്യങ്ങള്‍ ഉന്നയിച്ചതുകൊണ്ടാണ് എംപിമാര്‍ ഇറങ്ങിപ്പോയത്. സഭയുടെ മിനുട്‌സില്‍ അതെല്ലാം ഉണ്ട്' -ഡാനിഷ് അലി പറഞ്ഞു.
More Read : 'ചോദ്യത്തിന് കോഴ': മഹുവ മൊയ്‌ത്ര എംപിയെ ലോക്‌ സഭയില്‍ നിന്ന് പുറത്താക്കി
സിപിഐ നേതാവ് ബിനോയ്‌ വിശ്വം മഹുവക്കെതിരായ നടപടിയെ രാഷ്‌ട്രീയ പകപോക്കല്‍ എന്നാണ് വിശേഷിപ്പിച്ചത്. 'എത്തിക്‌സ് കമ്മിറ്റി പെരുമാറിയ രീതി തികച്ചും പകപോക്കല്‍ രാഷ്‌ട്രീയമാണ്. സര്‍ക്കാരിനെ വിമര്‍ശിച്ച അംഗത്തിനെതിരെ ഉള്ള പ്രതികാരണാണിത്' -അദ്ദേഹം പറഞ്ഞു.
എത്തിക്‌സ് കമ്മിറ്റി റിപ്പോര്‍ട്ട് അപര്യാപ്‌തമാണെന്നായിരുന്നു കോണ്‍ഗ്രസ് എംപി ശശി തരൂരിന്‍റെ പ്രതികരണം. 'ഈ റിപ്പോര്‍ട്ട് തികച്ചും അപര്യാപ്‌തമായൊരു രേഖയാണ്. പുറത്താക്കല്‍ എന്ന നാടകീയ ശുപാര്‍ശയുമായി വന്ന ഈ റിപ്പോര്‍ട്ട് , റിപ്പോര്‍ട്ടുകളുടെ അടിസ്ഥാന മാനദണ്ഡങ്ങള്‍ പാലിക്കുന്നതില്‍ പരാജയപ്പെട്ടു. ഗൗരവമേറിയ ചര്‍ച്ചകളൊന്നും ഇല്ലാതെ തന്നെ രണ്ടര മിനിറ്റില്‍ റിപ്പോര്‍ട്ട് അംഗീകരിക്കുകയായിരുന്നു' -തരൂര്‍ വ്യക്തമാക്കി.
