ബെംഗളൂരു : ബെലഗാവി ചിക്കോടിയിലെ ദിഗംബര്‍ ജൈന സന്യാസിയുടെ കൊലപാതകം രാഷ്‌ട്രീയവത്കരിക്കുന്നത് ശരിയല്ലെന്ന് കര്‍ണാടക ആഭ്യന്തരമന്ത്രി ജി.പരമേശ്വര. കേസിൽ സിബിഐ അന്വേഷണം ആവശ്യമില്ലെന്നും പൊലീസ് ആവശ്യമായ നിയമ നടപടി സ്വീകരിക്കുമെന്നും അദ്ദേഹം പറഞ്ഞു. തിങ്കളാഴ്‌ച ഹുബ്ബള്ളിയിലെ വിമാനത്താവളത്തില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
ഇത്തരമൊരു കൊലപാതക വിഷയവുമായി ബന്ധപ്പെട്ട് ആരും യാതെരുവിധ വിവേചനവും കാണില്ലെന്നും പ്രതികളെ പിടികൂടുന്നതിനുള്ള നീക്കത്തിലാണ് പൊലീസെന്നും മന്ത്രി പറഞ്ഞു. അതുകൊണ്ടാണ് ജൈന സന്യാസിയായ ആചാര്യ ശ്രീ കാമകുമാര നന്ദി മഹാരാജിനെ കാണാതായെന്നുള്ള പരാതി ലഭിച്ച ഉടന്‍ തന്നെ പൊലീസ് അന്വേഷണം ആരംഭിച്ചതെന്നും അദ്ദേഹം വ്യക്തമാക്കി.
കേസില്‍ സിബിഐ അന്വേഷണം വേണമെന്ന കേന്ദ്രമന്ത്രി പ്രഹ്ളാദ് ജോഷിയുടെ പ്രസ്‌താവനയിലും അദ്ദേഹം പ്രതികരിച്ചു. ഇത്തരം കേസുകള്‍ കൈകാര്യം ചെയ്യാന്‍ നമ്മുടെ പൊലീസിന് കഴിവുണ്ട്. കേസില്‍ പ്രതികള്‍ നേരത്തേ അറസ്റ്റിലായിട്ടുണ്ട്. കേസില്‍ ഉന്നതതല അന്വേഷണം ആരംഭിച്ചിട്ടുണ്ട്. അതുകൊണ്ട് കേസ് നിലവില്‍ സിബിഐയ്‌ക്ക് കൈമാറേണ്ട ആവശ്യമില്ലെന്നും പൊലീസ് യാതൊരു സമ്മര്‍ദ്ദവുമില്ലാതെ നിഷ്‌പക്ഷമായാണ് കേസ് അന്വേഷിക്കുന്നതെന്നും മന്ത്രി പരമേശ്വര്‍ പറഞ്ഞു. സന്യാസിയുടെ കൊലപാതത്തില്‍ സമഗ്രമായ അന്വേഷണം നടത്തണമെന്നാവശ്യപ്പെട്ട് കര്‍ണാടക ബിജെപിയും കഴിഞ്ഞ ദിവസം രംഗത്ത് വന്നിരുന്നു.
ജൈന സന്യാസിയായ ആചാര്യ ശ്രീ കാമകുമാര നന്ദി മഹാരാജിനെ കൊലപ്പെടുത്തി മൃതദേഹം കഷ്‌ണങ്ങളാക്കി ചിക്കോടിയിലെ ഹിരേകോടി ഗ്രാമത്തിലെ ഉപയോഗശൂന്യമായ കുഴല്‍ കിണറില്‍ തള്ളിയതാണ് കേസ്. ജൂലൈ എട്ട് മുതലാണ് സന്യാസിയെ കാണാതായത്. കേസുമായി ബന്ധപ്പെട്ട് നാരായണ ബസപ്പ മാഡി, ഹസ്സന്‍ ദളയത്ത് എന്നീ പ്രതികളെ പൊലീസ് അറസ്റ്റ് ചെയ്‌തിട്ടുണ്ട്. പണമിടപാടാണ് കൊലപാതകത്തിന് കാരണമെന്നാണ് അന്വേഷണ സംഘത്തിന്‍റെ കണ്ടെത്തല്‍.
ഗുരുതര ആരോപണവുമായി ബിജെപി എംഎല്‍എ സിദ്ദു സവാദി : സ്വാമിജിയുടെ കൊലപാതകത്തിന് ഉത്തരവാദി ഐഎസ്ഐഎസ്‌ ആണെന്ന് എംഎല്‍എ സിദ്ദു സവാദി. വൈദ്യുതാഘാതവും ക്രൂര മര്‍ദ്ദനവും ഏറ്റാണ് സന്യാസി കൊല്ലപ്പെട്ടതെന്നും കഴിഞ്ഞ ദിവസം വിധാന്‍ സൗധയില്‍ സംസാരിക്കവേ അദ്ദേഹം പറഞ്ഞിരുന്നു. സംഭവത്തിന് പിന്നിൽ ഐഎസ് ഭീകരരുടെ ഗൂഢാലോചനയുണ്ടെന്ന് അദ്ദേഹം ആരോപിച്ചു.
കേസ് സിബിഐ അന്വേഷിക്കണം. വിഷയം മൂടിവയ്‌ക്കാനാണ് സര്‍ക്കാര്‍ ശ്രമിക്കുന്നത്. അങ്ങനെയെങ്കില്‍ എല്ലാ സന്യാസിമാരെയും സംരക്ഷിക്കുന്ന ജോലി സര്‍ക്കാര്‍ ചെയ്യണമെന്നും സിദ്ദു സവാദി പറഞ്ഞു.
