ബെംഗളൂരു: വരുന്ന ലോക്‌സഭ തെരഞ്ഞെടുപ്പിൽ ബിജെപിയുമായി ജെഡിഎസ് സഖ്യമുണ്ടാക്കില്ലെന്ന് മുൻ പ്രധാനമന്ത്രി എച്ച്‌ഡി ദേവഗൗഡ. സംസ്ഥാനത്തെ ഭരണകക്ഷിയായ കോൺഗ്രസിനെതിരെ ജെഡിഎസും ബിജെപിയും ഒറ്റക്കെട്ടായി പോരാടുമെന്ന് അദ്ദേഹത്തിന്‍റെ മകനും കര്‍ണാടക മുൻ മുഖ്യമന്ത്രിയുമായ എച്ച്‌ഡി കുമാരസ്വാമി നേരത്തേ പറഞ്ഞിരുന്നു. പിന്നാലെയാണ്, കുമാരസ്വാമിയെ പൂര്‍ണമായും തള്ളി നിലപാട് വ്യക്തമാക്കി എച്ച്‌ഡി ദേവഗൗഡ രംഗത്തെത്തിയത്.
'2024 പാർലമെന്‍റ് തെരഞ്ഞെടുപ്പിനെ ജെഡിഎസ് സ്വതന്ത്രമായി നേരിടും. ലോക്‌സഭ തെരഞ്ഞെടുപ്പിന് ഇനിയും സമയമുണ്ട്. ഉചിതമായ തീരുമാനം പിന്നീട് എടുക്കും. ജെഡിഎസ് രണ്ട് മുതല്‍ ആറ് സീറ്റില്‍ വരെയാണ് വിജയിക്കാന്‍ സാധ്യതയെങ്കില്‍ പോലും പാർട്ടി സ്വതന്ത്രമായി തെരഞ്ഞെടുപ്പിനെ അഭിമുഖീകരിക്കും. ശക്തമായ അടിത്തറയുള്ള സീറ്റുകളിലാണ് പാർട്ടി മത്സരിക്കുക.' - എച്ച്‌ഡി ദേവഗൗഡ വാര്‍ത്താസമ്മേളനത്തില്‍ പറഞ്ഞു.
'നിതീഷിന് താത്‌പര്യമുണ്ടായിരുന്നു, പക്ഷേ...': നിലവിലെ സാഹചര്യം കണക്കിലെടുത്ത് പാർട്ടി, ഭാവി നടപടി പിന്നീട് തീരുമാനിക്കുമെന്നും ദേവഗൗഡ പറഞ്ഞു. പ്രത്യേക സാഹചര്യം കണക്കിലെടുത്ത് മൻമോഹൻ സിങ്ങിന്‍റെ നേതൃത്വത്തിലുള്ള കോൺഗ്രസ് സർക്കാരിന് തന്‍റെ പാർട്ടി പിന്തുണ നൽകിയതിനെക്കുറിച്ചും അദ്ദേഹം ഓര്‍മ പങ്കുവച്ചു. അതേസമയം, ജൂലൈ 17ന് ബംഗളൂരുവിൽ നടന്ന യോഗത്തിന് പ്രതിപക്ഷ പാർട്ടികൾ എന്തുകൊണ്ട് ക്ഷണിച്ചില്ലെന്ന ചോദ്യത്തിനും അദ്ദേഹം മറുപടി നല്‍കി. കർണാടകയിലെ ഒരു വിഭാഗം കോൺഗ്രസ് നേതാക്കളാണ് തന്നെ ക്ഷണിക്കുന്നതില്‍ എതിർത്തതെന്നും ഗൗഡ ചൂണ്ടിക്കാട്ടി.
ദേവഗൗഡയെ ക്ഷണിച്ചാൽ തങ്ങൾ പരിപാടിയിൽ പങ്കെടുക്കില്ലെന്ന് കർണാടകയിലെ കോൺഗ്രസിലെ ഒരു വിഭാഗം ഭീഷണി മുഴക്കിയെന്നും ദോവഗൗഡ ആരോപിച്ചു. നിതീഷ് കുമാര്‍ തന്നെ ക്ഷണിക്കാന്‍ ആഗ്രഹിച്ചിരുന്നെങ്കിലും ചില പ്രാദേശിക കോൺഗ്രസ് നേതാക്കൾ അനുകൂലിച്ചില്ലെന്നും അദ്ദേഹം വാര്‍ത്താസമ്മേളനത്തില്‍ വ്യക്തമാക്കി.
കർണാടകയിൽ കോൺഗ്രസിനെതിരായ ജെഡിഎസ് - ബിജെപി സഖ്യത്തെ കുറിച്ച് മുഖ്യമന്ത്രി സിദ്ധരാമയ്യയോട് മാധ്യമങ്ങള്‍ ചോദ്യം ഉയര്‍ത്തിയിരുന്നു. ഇരുപാർട്ടികളും ഇക്കാര്യത്തിൽ സജീവ ചർച്ചകൾ നടത്തുന്നുണ്ടെന്നായിരുന്നു കോണ്‍ഗ്രസ് നേതാവ് സിദ്ധരാമയ്യയുടെ പരിഹാസം. 2019ലെ ലോക്‌സഭ തെരഞ്ഞെടുപ്പിൽ ജെഡിഎസും കോൺഗ്രസും ഒരുമിച്ചാണ് മത്സരിച്ചത്. അന്ന് കർണാടകയിലെ 28ൽ 25 സീറ്റും ബിജെപി നേടിയിരുന്നു. ജെഡിഎസും കോൺഗ്രസും ഓരോ സീറ്റ് വീതം നേടിയപ്പോൾ ബിജെപി പിന്തുണച്ച ഒരു സ്വതന്ത്രനും വിജയിച്ചിരുന്നു. തുംകുരു ലോക്‌സഭ മണ്ഡലത്തിൽ നിന്ന് മത്സരിച്ച ദേവഗൗഡയും 2019ല്‍ പരാജയപ്പെട്ടിരുന്നു.
നിലപാട് വ്യക്തമാക്കി, കോണ്‍ഗ്രസിനെ വിമര്‍ശിച്ച് എച്ച്‌ഡികെ: ബിജെപി പക്ഷത്തേക്ക് ചായുന്നത് സംബന്ധിച്ച ചര്‍ച്ചകള്‍ സജീവമാണെന്ന് കര്‍ണാടക മുന്‍ മുഖ്യമന്ത്രിയും ജെഡിഎസ് നേതാവുമായ എച്ച്‌ഡി കുമാരസ്വാമി ജൂലൈ 17ന് മാധ്യമങ്ങളോട് വ്യക്തമാക്കിയിരുന്നു. മാധ്യമപ്രവര്‍ത്തകരോട് സംസാരിക്കവെ അദ്ദേഹം കോണ്‍ഗ്രസിനെതിരെ രൂക്ഷവിമര്‍ശനവും ഉന്നയിച്ചു. സംസ്ഥാനത്ത് രണ്ട് മാസത്തിനിടെ 42 കര്‍ഷകര്‍ ആത്മഹത്യ ചെയ്‌ത സംഭവത്തില്‍ യാതൊരുവിധ നടപടിയും കൈക്കൊള്ളാന്‍ കോണ്‍ഗ്രസ് സര്‍ക്കാരിനായില്ലെന്നും അദ്ദേഹം കുറ്റപ്പെടുത്തി.
ALSO READ | BJP-JDS Alliance | ബിജെപി പക്ഷത്തേക്ക് ചായാന്‍ ജെഡിഎസ് ; ചര്‍ച്ച പുരോഗമിക്കുന്നുവെന്ന് എച്ച് ഡി കുമാരസ്വാമി
വരാനിരിക്കുന്ന ലോക്‌സഭ തെരഞ്ഞെടുപ്പില്‍ സ്ഥാനം പിടിക്കാനുള്ള ഓട്ടത്തിലാണ് കോണ്‍ഗ്രസ്. തങ്ങളുടെ പാര്‍ട്ടിയെ കോണ്‍ഗ്രസ് ഗൗരവമായി പരിഗണിച്ചില്ല. ജെഡിഎസ് അവസാനിച്ചുവെന്ന മിഥ്യാധാരണയാണ് കോണ്‍ഗ്രസിനുള്ളത്. തന്‍റെ ശ്രദ്ധ എന്തായാലും രാജ്യത്തിന്‍റെ പ്രശ്‌നങ്ങളിലാണെന്നും കുമാരസ്വാമി പറഞ്ഞു.
