സുരേന്ദ്രനഗർ : ഗുജറാത്തിൽ രണ്ട് സംഘങ്ങൾ തമ്മിൽ നടുറോഡിൽ വടിവാളുകളുമായി ഏറ്റുമുട്ടി. ഗുജറാത്തിലെ സുരേന്ദ്രനഗറിലെ വാധ്‌വാൻ റോഡിൽ തിങ്കളാഴ്‌ചയായിരുന്നു (28.07.22) നടുക്കുന്ന സംഭവം. കാട്ടുപന്നിയുടെ പേരിലാണ് തർക്കമെന്നാണ് പ്രാഥമിക നിഗമനം.
ബൊലേറോയിലെത്തിയ ഒരു സംഘം, കാട്ടുപന്നികളുമായി വരികയായിരുന്ന എതിർസംഘത്തിന്‍റെ കാര്‍ ഇടിച്ചുതകര്‍ത്തു. തുടരെ കാറിലിടിക്കുന്നത് പുറത്തുവന്ന ദൃശ്യങ്ങളിലുണ്ട്. തുടർന്ന് ഇരുകൂട്ടരും വാളുകളും മറ്റ് ആയുധങ്ങളുമായി നടുറോഡിലിറങ്ങി ഏറ്റുമുട്ടുകയായിരുന്നു.
ഇതിനിടെ കാറിലുണ്ടായിരുന്ന പന്നികളിലൊന്ന് രക്ഷപ്പെടാൻ ശ്രമിക്കുന്നതും സംഘത്തിലെ ഒരാളെത്തി അതിനെ പിടികൂടാൻ ശ്രമിക്കുന്നതും ദൃശ്യങ്ങളിലുണ്ട്. ഏറ്റുമുട്ടലിൽ മൂന്നുപേർക്ക് പരിക്കേറ്റതായും ഇവരെ ആശുപത്രിയിൽ പ്രവേശിപ്പിച്ചതായും പൊലീസ് അറിയിച്ചു.
സംഘർഷത്തിന് പിന്നാലെ പ്രദേശത്ത് മണിക്കൂറുകളോളം നിലനിന്ന ഗതാഗതക്കുരുക്ക് പൊലീസിന്‍റെ നീണ്ട ഇടപെടലുകള്‍ക്കൊടുവിലാണ് അവസാനിച്ചത്. ഇരുസംഘങ്ങളും തമ്മിൽ മുൻവൈരാഗ്യം നിലനിന്നിരുന്നതായാണ് സൂചന. ഏറ്റുമുട്ടലിന് പിന്നിലെ യഥാർഥ കാരണം പൊലീസ് അന്വേഷിച്ചുവരികയാണ്.
