അഹമ്മദാബാദ്: ഗുജറാത്തിലെ ദേശീയപാത 48 ല്‍ 10 കിലോമീറ്ററില്‍ നിറയെ കുഴികള്‍ രൂപപ്പെട്ടു. വാപി - സിൽവാസ പ്രദേശത്താണ് സംഭവം. കനത്ത മഴ നിര്‍ത്താതെ പെയ്‌തതിനെ തുടര്‍ന്നാണ് കുഴി ഉണ്ടായതെന്നാണ് ദേശീയ പാത അധികൃതരുടെ (National Highways Authority of India) വാദം.
കുഴികൾ രൂപപ്പെട്ടതിനെ തുടര്‍ന്ന് വാഹന, കാല്‍നട യാത്രക്കാര്‍ വന്‍ പ്രതിസന്ധിയാണ് അഭിമുഖീകരിക്കുന്നത്. ദക്ഷിണ ഗുജറാത്തിലെയും സൗരാഷ്‌ട്ര മേഖലയിലെയും (അറബിക്കടലിന്‍റെ തീരപ്രദേശം) പല പ്രദേശങ്ങളിലും കനത്ത മഴ തുടരുകയാണ്. ഗ്രാമങ്ങള്‍, വിവിധ നഗരങ്ങള്‍ എന്നിവിടങ്ങളിലെ നിരവധി റോഡുകളും തകര്‍ന്നിട്ടുണ്ട്. അതേസമയം, കുണ്ടും കുഴിയും നിറഞ്ഞ വാപി - സിൽവാസ ദേശീയ പാതയുടെ ചിത്രങ്ങളും ദൃശ്യങ്ങളും സാമൂഹ്യ മാധ്യമങ്ങളില്‍ വൈറലയി.
വിമര്‍ശിച്ച് സോഷ്യല്‍ മീഡിയ, നടപടിയുമായി അധികൃതര്‍: ദേശീയ പാത അധികൃതര്‍ക്ക് നിര്‍മാണത്തില്‍ വന്ന വീഴ്‌ചയെന്ന് ആരോപിച്ച് നിരവധി പേരാണ് സോഷ്യല്‍ മീഡിയയില്‍ രംഗത്തെത്തിയത്. വിമര്‍ശനം ഉയര്‍ന്നതോടെ മഴയെ പഴിച്ച് ദേശീയ പാത അതോറിറ്റി രംഗത്തെത്തി. കുഴികള്‍ നിറഞ്ഞ റോഡില്‍ മെറ്റല്‍ ഇറക്കി മൂടാനുള്ള ശ്രമം അധികൃതര്‍ ആരംഭിച്ചു.
അതേസമയം, സംഭവത്തില്‍ വൽസാദ് ജില്ല കലക്‌ടര്‍ ക്ഷിപ്ര ആഗ്രേ പ്രതികരിച്ചു. എൻ.എച്ച്.എ.ഐയുമായി സംസാരിച്ചിരുന്നു. റോഡ് പുനര്‍നിര്‍മിക്കുന്നതിനായി ടെൻഡർ അംഗീകരിച്ചിട്ടുണ്ടെന്നും ഇപ്പോള്‍ നടക്കുന്നത് താത്‌ക്കാലിക അറ്റകുറ്റപ്പണികൾ മാത്രമാണെന്നും അവര്‍ അറിയിച്ചതായും കലക്‌ടര്‍ പറഞ്ഞു.
