ന്യൂഡല്‍ഹി : കുപ്രസിദ്ധ ഗുണ്ടാത്തലവന്‍ കപില്‍ സാങ് വാന്‍റെ സംഘത്തില്‍പ്പെട്ടയാള്‍ ആയുധങ്ങളുമായി ഡല്‍ഹി ഔട്ടറില്‍ പൊലീസ് പിടിയില്‍. ഹരിയാനയിലെ ജാജ്ജര്‍ ജില്ലക്കാരനായ സോംവീര്‍ എന്ന് വിളിക്കപ്പെടുന്ന സിദ്ധാര്‍ഥാണ്(25) അറസ്റ്റിലായത്. 12 പിസ്റ്റളുകളും 47 വെടിയുണ്ടകളും ഇയാളില്‍നിന്നും പൊലീസ് പിടിച്ചെടുത്തു. ഡല്‍ഹിയിലെ തന്‍റെ കൂട്ടാളികള്‍ക്ക് എത്തിക്കാന്‍ വേണ്ടിയാണ് ആയുധങ്ങള്‍ സിദ്ധാര്‍ഥ് കൈവശം വച്ചതെന്ന് പൊലീസ് അറിയിച്ചു.
ALSO READ:മൊബൈൽ മോഷണമാരോപിച്ച് യുവാവിനെ തലകീഴായി കെട്ടിത്തൂക്കി | video
പൊലീസുമായുള്ള ഏറ്റുമുട്ടലിന്‌ ശേഷമാണ് സിദ്ധാര്‍ഥ് പിടിയിലാവുന്നത്‌. തങ്ങളെ കണ്ടയുടനെ അക്രമി വെടിയുതിര്‍ക്കുകയായിരുന്നുവെന്ന് പൊലീസ് പറഞ്ഞു. തുടര്‍ന്ന്‌ പൊലീസ് സിദ്ധാര്‍ഥിന്‍റെ അരയ്‌ക്ക്‌ താഴെ വെടിവയ്ക്കുകയായിരുന്നു.
പ്രതിയെ അടുത്തുള്ള ആശുപത്രിയില്‍ പ്രവേശിച്ചെന്നും അപകട നില തരണംചെയ്തെന്നും പൊലീസ് വിശദീകരിച്ചു. നിരവധി കേസില്‍ പ്രതിയായ കപില്‍ സാങ് വാന്‍ ഇപ്പോള്‍ വിദേശത്താണ്.
