ഭോപ്പാല്‍ : ഉടമ മരിച്ചെന്ന വ്യാജ രേഖ ചമച്ച് ബാങ്ക് അക്കൗണ്ടില്‍ നിന്ന് ലക്ഷങ്ങള്‍ തട്ടിയതായി പരാതി. മധ്യപ്രദേശിലെ ശിവ്പൂർ സ്വദേശി ഹരിഓം ശർമയാണ് തട്ടിപ്പിനിരയായത്. ശിവ്പൂര്‍ സ്വദേശിയായ ശ്യാംലാല്‍ ജാതവ് എന്നയാളാണ് വ്യാജരേഖ ചമച്ച് ഹരിഓം ശര്‍മയുടെ അക്കൗണ്ടില്‍ നിന്ന് നാല് ലക്ഷം രൂപ തട്ടിയെടുത്തത്.
അക്കൗണ്ടില്‍ നിന്ന് പണം പിന്‍വലിക്കാനായി ബാങ്കില്‍ എത്തിയപ്പോഴാണ് തട്ടിപ്പിനിരയായ വിവരം ഹരിഓം ശർമ മനസിലാക്കിയത്. ജീവിച്ചിരിക്കുന്നതിന്‍റെ രേഖകള്‍ സമര്‍പ്പിക്കാന്‍ ഇയാളോട് ബാങ്ക് ജീവനക്കാര്‍ ആവശ്യപ്പെടുകയും ചെയ്‌തു. അക്കൗണ്ടില്‍ നിന്ന് പണം തട്ടിയ വിവരമറിഞ്ഞ തനിക്ക് ഹൃദയാഘാതമുണ്ടായെന്ന് ഹരിഓം ശർമ പറയുന്നു.
തട്ടിപ്പിന് ശ്യംലാല്‍ ജാതവിന് ബാങ്ക് ജീവനക്കാര്‍ ഒത്താശ ചെയ്‌തുവെന്നാണ് ഹരിഓം ശർമയുടെ ആരോപണം. സംഭവത്തില്‍ കലക്‌ടറേറ്റിലെ പൊതു പരാതി പരിഹാര ഫോറത്തെ സമീപിക്കാനുള്ള തീരുമാനത്തിലാണ് ഹരിഓം ശർമ.
